تاراپتار قازاقستاندا جەمقورلىققا قارسى ساياساتتى دامىتۋ جانە ەلىمىزدىڭ دۇنيەجۇزىلىك بانك انىقتايتىن «مەملەكەتتىك باسقارۋ ينديكاتورلارى» بويىنشا قول جەتكىزگەن جەتىستىكتەرى ماسەلەلەرىن تالقىلاپ, ىنتىماقتاستىقتى ودان ءارى كەڭەيتۋ جوسپارلارىن بەلگىلەدى.
كەزدەسۋ بارىسىندا اگەنتتىك توراعاسى ەكىنشى تاراپتىڭ نازارىن قازاقستاننىڭ ساياسي جاڭعىرۋىنىڭ نەگىزگى اسپەكتىلەرىنە اۋدارا وتىرىپ, جەمقورلىققا قارسى زاڭنامانىڭ وزەكتى نوۆەللالارىن تانىستىردى.
ا. شپەكباەۆ مەملەكەت باسشىسىنىڭ ساياسي ەرىك-جىگەرىنىڭ ارقاسىندا قازاقستاندا سىبايلاس جەمقورلىققا قارسى ءىس-قيمىل بويىنشا جۇيەلى جانە كەشەندى جۇمىس جۇرگىزىلىپ, جەمقورلىققا قارسى الدىڭعى قاتارلى حالىقارالىق ستاندارتتار جوسپارلى تۇردە ەنگىزىلە وتىرا, پارمەندى قىلمىستىق-قۇقىقتىق شارالار ىسكە اسىرىلىپ جاتقاندىعىن اتاپ ءوتتى.
ءوز كەزەگىندە جان-فرانسۋا مارتو ەلىمىزدىڭ سىبايلاس جەمقورلىققا قارسى ءىس-قيمىلداعى جەتىستىكتەرىن جوعارى باعالاپ, «قازاقستان مەملەكەتتىك باسقارۋدىڭ 6 ينديكاتورىنىڭ ىشىنەن ءدال وسى جەمقورلىقتى باقىلاۋ كورسەتكىشى بويىنشا ىلگەرى جەتىستىككە قول جەتكىزدى. بۇل اگەنتتىكتىڭ ەلدىك تابىستاعى جەتەكشى ءرولىن ايعاقتايدى. سوڭعى ەكى جىلدا قازاقستان جەمقورلىقتى ءتيىمدى باقىلايتىن ەلدەر ساناتىنا ايتارلىقتاي جاقىنداي وتىرىپ, پايىزدىق دارەجەنى 19,7%-دان 43,8%-عا دەيىن ەكى ەسەگە جاقسارتتى. بۇل قابىلدانىپ جاتقان شارالاردىڭ ناتيجەلىلىگىن جانە جەمقورلىقتى جويۋعا باعىتتالعان ناقتى ارەكەتتەردى كورسەتەتىنى ءسوزسىز», - دەپ اتاپ ءوتتى.
كەزدەسۋ قورىتىندىسى بويىنشا تاراپتار جەمقورلىق تاۋەكەلدەرىن انىقتاۋ جانە الدىن الۋ-پروفيلاكتيكالىق جۇمىس بويىنشا تسيفرلىق جۇيەلەردى ەنگىزۋ, اگەنتتىكتىڭ وزەكتى جوبالارىن ماقساتتى قارجىلاندىرۋ, سونداي-اق ورتا ازيا وڭىرىندە جەمقورلىققا قارسى ءىس-قيمىلدىڭ قازاقستاندىق تاجىريبەسىن تاراتۋ ماسەلەلەرىن پىسىقتاۋعا كەلىستى.
