«قۇس فابريكالارىنداعى قۇس ءولىمى تولىعىمەن توقتادى. «بەسكول قۇس فابريكاسى» جشس-دە ءبىر ايدا قۇس تۇماۋىنان 184 621 قۇس قىرىلدى. بارلىق زالال ءۇشىن وتەماقى بەرىلەدى. «اگروينتەرپتيتسا» جشس-نە 391 مىڭنان استام باس ءولدى. ونىڭ ىشىندە جەلدەتۋدىڭ بولماۋى سالدارىنان اسفيكسيادان 256 040 قۇس قىرىلدى, ولار وتەلۋگە جاتپايدى. قۇس تۇماۋىنان 135 384 باس قۇس قىرىلدى. تاعى 41 642 باس تاركىلەنىپ, جويىلدى. وسىلايشا, ەكى قۇس فابريكاسىنا 361 647 باس قۇس ءۇشىن وتەماقى بەرىلەدى», - دەپ حابارلادى تۇرسىن قابدولدانوۆ.
سونداي-اق, ول قازاقستان رەسپۋبليكاسىندا 64 قۇس فابريكاسى جۇمىس ىستەيتىنىن جانە ولاردىڭ تەك ەكەۋىندە عانا قۇس تۇماۋى سالدارىنان ءولىم بولعانىن اتاپ ءوتتى.
«قۇس فابريكالارىندا تەكسەرۋ جۇرگىزۋ كەزىندە ولاردىڭ يەلەرى ۆەتەريناريالىق-سانيتاريالىق تالاپتاردى ساقتاماعانى انىقتالدى. اتاپ ايتقاندا, قۇس فابريكالارىنىڭ اۋماعىندا جەم-شوپكە ەركىن قول جەتكىزە الاتىن جابايى جانە قونىس اۋداراتىن قۇستار تابىلدى», - دەدى ۆەتەريناريالىق باقىلاۋ جانە قاداعالاۋ كوميتەتىنىڭ وكىلى.
بۇعان دەيىن تۇرسىن كابدۋلدانوۆ بريفينگتە قازاقستاندا قۇستاردىڭ تاۋلىك ىشىنلە ءولىمى 22 باسقا دەيىن قىسقارعانىن حابارلادى. جاڭا جاعدايلار تەك سولتۇستىك قازاقستان وبلىسىنىڭ جەكە قوسالقى شارۋاشىلىقتارىندا تىركەلگەن. رەسپۋبليكانىڭ باسقا وڭىرلەرىندە ا.ج. 11 قازاندا قۇس ءولىمى تىركەلگەن جوق. سوڭعى 10 كۇندەگى ديناميكانى ەسكەرە وتىرىپ, ۆەتەريناريالىق باقىلاۋ جانە قاداعالاۋ كوميتەتى ماماندارى قازاقستاندا جوعارعى پاتوگەندى قۇس تۇماۋىنان قۇس ءولىمىنىڭ تولىق توقتاعانىن اتاپ ءوتتى.
«قىركۇيەك ايىنىڭ ورتاسىنان باستاپ جەكە قوسالقى شارۋاشىلىقتاردا جوعارى پاتوگەندى قۇس تۇماۋىن جۇقتىرۋدىڭ سالدارىنان 25 مىڭعا جۋىق قۇس ءولىمى تىركەلدى. سونىمەن قاتار, ينفەكتسيا وشاقتارىنان 20 177 باس قۇس تاركىلەندى. وسىلايشا, قازىرگى ۋاقىتتا بارلىعى جەكە قوسالقى شارۋاشىلىقتاعى 45 110 باس قۇسقا, ونىڭ ىشىندە 27 393 باس تاۋىق, 777 كۇركەتاۋىق, 10 141 قاز, 6 799 باس ۇيرەك ءۇشىن وتەماقى بەرىلەدى», – دەپ ناقتىلادى سپيكەر.
