قازاقستاننىڭ بارلىق وڭىرىندەگى 3 مىڭعا جۋىق مۇعالىم مەن بالاباقشا تاربيەشىسى ينكليۋزيۆتى ورتادا وقىتۋعا ءۇش اپتالىق دايىندىق باعدارلاماسى بويىنشا ءبىلىم الۋدى باستادى. باعدارلامانى نازارباەۆ ۋنيۆەرسيتەتى جوعارى ءبىلىم بەرۋ مەكتەبىنىڭ ينكليۋزيۆتى ءبىلىم بەرۋ سالاسىنداعى پروفەسسور-ساراپشىلاردىڭ حالىقارالىق كومانداسى ازىرلەپ, «دارا» قايىرىمدىلىق قورىمەن بىرگە «شەۆرون» كومپانياسىنىڭ قولداۋىمەن ىسكە اسىرۋدا.
«بۇل اۋقىمدى جوبا ءاربىر بالاعا, ونىڭ ىشىندە مۇمكىندىكتەرى شەكتەۋلى بالالارعا دا ساپالى ءبىلىم الۋعا كەپىلدىك بەرۋ ءۇشىن قوعامداعى وزگەرىستەردىڭ جولسەرىگى بولاتىن, ينكليۋزيۆتى پراكتيكاعا ىنتالى جانە قابىلەتتى پەداگوگتەردى دايارلاۋ ارقىلى ينكليۋزيۆتى ءبىلىم جۇيەسىن دامىتۋعا ۇلەس قوسادى», دەيدى جوبانىڭ جەتەكشىسى, نازارباەۆ ۋنيۆەرسيتەتى جوعارى ءبىلىم بەرۋ مەكتەبىنىڭ پروفەسسورى سۋلوشني پاتەر.
«ينكليۋزيۆتى ءبىلىم بەرۋدى قالىپتاستىرۋ» جوباسى ەلىمىزدەگى ءبىلىم بەرۋ جانە عىلىمدى دامىتۋدىڭ 2020-2025 جىلدارعا ارنالعان مەملەكەتتىك باعدارلاماسىنىڭ ماقساتىنا سايكەس بارلىق مەكتەپتەردى ينكليۋزيۆتى ەتۋ ماقساتىنا قول جەتكىزۋگە جاردەمدەسپەك.
نازارباەۆ ۋنيۆەرسيتەتىنىڭ جوعارى ءبىلىم بەرۋ مەكتەبىندە وسى تاقىرىپ بويىنشا قازاقستانداعى ۇزدىك ساراپشىلار كومانداسى جۇمىس ىستەيدى. «دارا» قورىنىڭ ماماندارىمەن بىرگە ولار ينكليۋزيۆتى ءبىلىم بەرۋگە كوشۋ كەزىندە قولداۋدى, بىلىكتىلىكتى ارتتىرۋدى جانە ارنايى داعدىلاردى دامىتۋدى قاجەت ەتەتىن پەداگوگتەردى وقىتۋ باعدارلاماسىن ازىرلەدى.
كوروناۆيرۋس پاندەمياسىنا بايلانىستى وقىتۋ ونلاين فورماتىندا وتەدى. جوبا كومانداسى باعدارلاما ناتيجەلەرىن باعالاۋ جانە بىلىكتىلىكتى ارتتىرۋدان وتكەن پەداگوگتەرگە ودان ءارى قولداۋ كورسەتۋ ءۇشىن وقۋدى اياقتاعاننان كەيىن وففلاين كەزدەسۋلەردى دە جوسپارلاپ وتىر. سونداي-اق باعدارلاما بارىسىندا مەكتەپ ديرەكتورلارىنا ارنايى ترەنينگتەر وتەدى. ءبىلىم جانە عىلىم مينيسترلىگى, التىنسارين اتىنداعى ءبىلىم اكادەمياسىنىڭ جانە ۋنيۆەرسيتەتتەردىڭ قاتىسۋىمەن سەمينارلار ۇيىمداستىرىلادى.
بۇگىندە قازاقستاندا جالپى ءبىلىم بەرۋ مەكتەپتەرىندە ەرەكشە قاجەتتىلىكتەرى مەن مۇمكىندىگى شەكتەۋلى بالالاردىڭ سانى وسۋدە. الايدا بۇل ۇدەرىس وتە باياۋ ءجۇرىپ جاتىر. ال جۇرگىزىلگەن زەرتتەۋلەر كورسەتكەندەي, مۇعالىمدەر ينكليۋزيۆتى ءبىلىم بەرۋدىڭ ءساتتى ىسكە اسىرىلۋىنا سەنسە دە, ولار كوبىنەسە بارلىق بالانى, اسىرەسە اۋىر مۇگەدەكتىگى بار بالالاردى قۇرداستارىمەن بىرگە وقىتۋعا قارسىلىق تانىتادى. سوندىقتان مۇعالىمدەردىڭ كوزقاراسى ينكليۋزيۆتى ءبىلىم بەرۋگە كوشۋدىڭ شەشۋشى فاكتورى سانالادى.
