وتكەن جىلدارى كومىر تاسيتىن ۆاگونداردىڭ جەتىسپەۋشىلىگىنەن وتىن بازالارىندا ۇزىن-سونار كەزەك ورىن الىپ, ورىندى وكپە-ناز تۋىنداپ, دۇربەلەڭ قاتتى بولىپ ەدى. بيىل جاعداي ءبىرشاما تۇراقتى. وبلىستىق ەنەرگەتيكا جانە تۇرعىن ءۇي-كوممۋنالدىق شارۋاشىلىعى باسقارماسىنىڭ باسشىسى يۆان يۋرچەنكونىڭ ايتۋىنا قاراعاندا, وبلىسقا 1,4 ملن توننا كومىر قاجەت ەكەن. ونىڭ 730 مىڭ تونناسى كوممۋنالدىق-تۇرمىستىق سەكتورعا, 662 مىڭ تونناسى جەرگىلىكتى تۇرعىندارعا تيەسىلى.
قازىرگى كۇنى جەرگىلىكتى تۇرعىندار ءۇشىن 412 مىڭ توننا كومىر جەتكىزىلگەن. بۇل جالپى قاجەتتى كولەمنىڭ 62 پايىزىن قۇرايدى. وبلىستا 52 وتىن بازاسىندا كومىر ىركىلىسسىز ساتىلۋدا. ەندى ءبىر اۋىز ءسوز باعا تۋرالى. وبلىستاعى كومىردىڭ ءار تونناسىنىڭ ورتاشا باعاسى 12 مىڭ تەڭگەنى قۇرايدى. ماسەلەن, جاقسى جاناتىن, تۇتىنۋشىلار تاراپىنان سۇرانىسقا يە شۇباركول كومىرى – 14 250, مايكوبە – 10 740, قاراجىرا – 12 870, بوگاتىر 9 790 تەڭگەدەن ساتىلۋدا. دەمەك, وتكەن جىلمەن سالىستىرعاندا, كومىر باعاسى وزگەرگەن جوق. ءتىپتى, بىرقاتار اۋداندا كومىردىڭ كەي سۇرپىنىڭ ءسال-ءپال ارزانداعانى دا بايقالدى. كوممۋنالدىق-تۇرمىستىق سەكتور 368 مىڭ توننا كومىر قورىن جيناقتاعان. بۇل قىسقا قاجەتتى بارلىق كولەمنىڭ تەڭ جارتىسى. قازىر بەلگىلەنگەن كەستە بويىنشا قالعان كولەم جەتكىزىلۋدە.
كەيبىر قازاندىقتار وتىن رەتىندە مازۋتتى دا پايدالانادى. وبلىسقا 46 مىڭ توننا مازۋت قاجەت. پاۆلودار مۇناي زاۋىتىمەن كەلىسىمشارت جاسالىپ, مازۋت جەتكىزىلە باستادى. قازىر 500 توننا قور جيناقتالعان. قازان ايىندا مازۋت قورى 3 مىڭ تونناعا جەتكىزىلمەك.
كوپشىلىكتى تولعاندىرىپ وتىرعان باعا ماسەلەسى تۋرالى ايتقان كەزدە مىنا ءبىر جايدى ەسكەرگەن ءجون. ۇلتتىق ەكونوميكا مينيسترلىگى باسەكەلەستىكتى قورعاۋ جانە دامىتۋ كوميتەتىنىڭ اقمولا وبلىسى بويىنشا دەپارتامەنتى باسشىسىنىڭ مىندەتىن اتقارۋشى المات فازىلدىڭ ايتۋىنا قاراعاندا, كومىر تۇتىنۋشىعا جەتكەنشە قىمباتتاپ كەتەدى. ونىڭ نەگىزگى سەبەبى, ەكى ورتاداعى دەلدالداردىڭ باعانى ۇستەمەلەۋى. ماسەلەن, وبلىستا قاتتى وتىنمەن 70 پايىزعا قامتاماسىز ەتەتىن كوتەرمە ساۋدا يەلەرى جۇرت ۇستىنەن جونىپ جەپ, تابىسقا كەنەلىپ وتىر. ماسەلەن, شۇباركول كومىرى رازرەزدە ءار تونناسى 5 819 تەڭگەدەن بوساتىلادى. كومىر تاسۋمەن اينالىساتىن 17 كوتەرمە ساۋدا كاسىپورىندارىنىڭ يەلەرى ۇستەمە باعاسىن قوسقان كەزدە الگى باعا 12 500 تەڭگە بولىپ شىعادى. بارلىق كومىر ءتۇرىنىڭ قىمباتتاپ كەتۋىنىڭ نەگىزگى سەبەبى وسىدان بولىپ وتىر.
شاعىن وتىن بازاسىنداعىلار مۇنداي ەسەپ-قيساپتى بىلە بەرمەۋى دە مۇمكىن. كومىردى كوتەرمە ساۋدا ارقىلى تولايىم ساتىپ الۋ ءۇشىن قىرۋار قارجى قاجەت. وعان ەكىنىڭ ءبىرىنىڭ شاماسى كەلە بەرمەيدى. دەمەك, ەل جايىن ەكشەپ, قالتاسىن قاقپاۋ ءۇشىن وسى ماسەلەگە مۇقيات نازار اۋدارۋ قاجەت.
اقمولا وبلىسى
