سوندا اڭگىمەمىز اباي تۋرالى دا وربىگەن. ەلباسى: «ابايدىڭ اقىلى, جامبىلدىڭ جىرىنسىز وسكەن ۇرپاق ۋىزىنا جاري قويا ما؟.. اباي ولەڭدەرىن قايتالاپ وقىعان سايىن جاڭا قىرىنان تاني تۇسەمىن. اسىل وي, توزباس تۇجىرىم الدىمنان شىعادى دا تۇرادى. ابايدىڭ قوس تومدىعىن قايتا-قايتا وقۋدامىن. «مىڭمەن جالعىز الىستىم, كىنا قويما», دەگەن داۋىسى الىستان تالىپ ەستىلەدى... ۇلىلىقتىڭ ەشبىر شەكتەۋ مەن ولشەمگە كەلمەس قۇدىرەتى وسىنداي-اق بولار» دەگەن ەدى.
ال ۇلى ابايدىڭ 175 جىلدىعىنا ارناپ جازعان ماقالاسىندا جاسىنان ۇلى حاكىمنىڭ جىرى مەن قارا سوزدەرىنەن ءنار الىپ, ءوزىنىڭ بۇكىل عۇمىرىنىڭ باعدار بەرۋشى تەمىرقازىعىنا اينالدىرعانىن ايتقان ەكەن.
«كەيدە ءبىزدىڭ بۋىن ءومىر بويىنا ۇلى اباي مەكتەبىنەن, ياعني عۇلامانىڭ مۇحيتتاي شالقار وي قازىناسىنان تولاسسىز ءبىلىم الىپ كەلە جاتقانداي كورىنەدى» دەپتى. ول قانداي ىرگەلى ءىستى قولعا السا دا ابايعا جۇگىنىپ وتىرعانىن, ۇلى ويشىلدىڭ تۋعان توپىراعىن 40 جىل بويى ۋلاپ كەلگەن تاجالدى پوليگوننىڭ جابىلۋى تۋرالى جارلىققا قول قويعاندا دا دانىشپاننىڭ ءسوزى ويىندا تۇرعانىن تىلگە تيەك ەتىپتى.
اباي ايتقان «ادامزاتتىڭ ءبارىن ءسۇي باۋىرىم دەپ» دەگەن گۋمانيستىك قاعيدا قازاق ۇلتى مەن باسقا ۇلىستاردىڭ باسىن بىرلىك يدەياسىنا باعىندىراتىن جاڭا تاۋەلسىز مەملەكەت قۇرۋدا باستى ۇستانىمعا اينالعان ەكەن.
«ەل بىرلىگى ۇرانىن باعزى زامانداردان بەرى تالاي سۇڭعىلا بابالارىمىز قايتا-قايتا كوتەرىپ وتىرعان. سوناۋ ءحVىىى عاسىردىڭ وزىندە بۇقار جىراۋ:
...ەگەر ابىلاي الدىندا بىتپەسەڭ,
اتاسىن بىلمەس الىسپىن.
كوشىڭ كەتەر ءبىر جاققا,
مالىڭ كەتەر ءبىر جاققا,
كوش سوڭىندا جەتە الماي
ەسىڭ شىعار سول شاقتا, – دەپ بىرلىككە شاقىرسا, اباي: ء«بىرىڭدى, قازاق, ءبىرىڭ دوس, كورمەسەڭ ءىستىڭ ءبارى بوس» دەپ, ءحىح عاسىردا-اق بىرلىك ارقىلى كۇللى ادامزاتتىڭ كوشىنە ىلەسە بىلۋگە شاقىردى», – دەپ جازادى ەلباسى «اباي اماناتى» اتتى ماقالاسىندا.
ۇلى ابايدىڭ 175 جىلدىعى الەمدى قاۋسىرعان پاندەمياعا تۇسپا-تۇس كەلگەنىنە قىنجىلا وتىرىپ, بۇل ۋاقىتشا قيىندىقتى ەڭسەرەتىنىمىزگە سەنىم بىلدىرەدى.
ابايدىڭ اماناتىن ورىنداي بىلگەن الاش ۇرپاقتارىنىڭ كەلەشەگى زور بولاتىنىنا ءبىزدىڭ دە سەنىمىمىز كامىل.
ۇلىقبەك ەسداۋلەت,
اقىن, مەملەكەتتىك سىيلىقتىڭ لاۋرەاتى, قازاقستان جازۋشىلار وداعى باسقارماسىنىڭ توراعاسى
