تىرنەكتەپ تاپقانىڭدى جالدامالى پاتەر يەسىنىڭ قالتاسىنا قۇيىپ وتىرساڭ, قور جيناپ جەكە باسپاناڭا قول جەتكىزۋدىڭ اۋىلى الىستاي بەرەتىنى انىق. ودان گورى پايىزدىق مولشەرلەمەسى تومەن, ءبىراز جىلدان كەيىن ءوز يەلىگىڭدە قالاتىن ۇيدە قامسىز ءومىر ءسۇرىپ, تولەم قابىلەتىڭە ساي قارىزىڭنان قۇتىلۋ كوڭىلگە دە جۇبانىش سىيلايدى. مۇنداي مۇمكىندىكتىڭ قاقپاسى الماتى قالاسىندا الەۋمەتتىك سالادا جۇمىس ىستەيتىن كەز كەلگەن جاس ءۇشىن ايقارا اشىق. «الماتى جاستارى 3.0» باعدارلاماسى ىسكە قوسىلعان از ۋاقىت ىشىندە قانشاما وتباسى قونىس تويىن تويلادى. ناقتىراق ايتساق, جىل باسىنان بەرى 725 وتباسى باسپانالى بولعان.
بىرەر اي بۇرىن باعدارلاماعا قاتىسۋ ءۇشىن «الماتى قالاسىندا تۇراقتى تىركەۋ بولۋى مىندەتتى» دەگەن تالاپ الىنىپ تاستالعالى بەرى باعىن سىناپ كورۋگە بەل بايلاعانداردىڭ دەنى ارتقان. قالا اكىمدىگى تاراپىنان قولداۋ تاپقان جوبانىڭ ءۇشىنشى كەزەڭىنە ءوتىنىش بەرگەندەر قازىر جولداما الىپ, قۇجاتتارىن رەسىمدەۋدە. قۇزىرلى ورىن وكىلدەرى ءار كەزەڭ سايىن ءۇي الۋشىلارعا باعدارلاما تالاپتارى بارىنشا جەڭىلدەتىلىپ وتىرعانىن جەتكىزدى.
بۇگىنگە دەيىن 10 599 ءوتىنىش كەلىپ تۇسكەن. ونىڭ ىشىندە 1 858 ازاماتتىڭ قۇجاتى تالاپتارعا سايكەس كەلىپ, باسپانا الۋعا جولداما بەرىلدى. ءوتىنىش تۇسىرگەندەردىڭ ىشىندە دەنساۋلىق جانە ءبىلىم سالاسىنىڭ ماماندارى كوپ. الماتىلىق جاستار ءۇشىن ءتيىمدى باعدارلاما قاتارىنان 3 كەزەڭ بويىنا جالعاسىپ كەلەدى. سوڭعى كەزەڭدە رەزەرۆكە الىنعاندار از ەمەس. ال جولداماعا قول جەتكىزگەندەر بەلگىلى ۋاقىتتا تولەم قابىلەتتىلىگىن راستاي الماسا نەمەسە قۇجاتتارى سايكەس كەلمەگەن جاعدايدا ولاردىڭ ورنىنا رەزەرۆتەگى ءوتىنىش بەرۋشىلەر قۇجات تاپسىرۋعا مۇمكىندىك الادى.
– العاشقى قۇجات قابىلداۋ بويىنشا 3 220, ەكىنشى قابىلداۋدا 5 مىڭ, ءۇشىنشى قابىلداۋدا 2 مىڭ ءوتىنىش كەلىپ ءتۇستى. ءبىرىنشى جانە ەكىنشى قۇجات قابىلداۋدا 7 سالا بويىنشا, ءۇشىنشى قۇجات قابىلداۋدا 5 سالا بويىنشا وتىنىشتەر قابىلداندى. سەبەبى دەنساۋلىق پەن ءبىلىم سالاسىنداعىلار كوپ بولعاندىقتان, ەكى سالانى الىپ تاستاۋعا تۋرا كەلدى, – دەيدى قالالىق تۇرعىن ءۇي ساياساتى باسقارماسىنىڭ ءبولىم باسشىسى عالىمجان ابدىشۇكىر ۇلى.
«الماتى جاستارى 3.0» باعدارلاماسىنا 10 ملرد تەڭگە بولىنگەن. سونداي-اق تۇرعىن ءۇي قۇرىلىس جيناق بانكى 3 ملرد تەڭگە قاراستىرىپ وتىر. تومەن پايىزدىق مولشەرلەمەمەن – 13 ملن تەڭگەگە دەيىنگى نەسيە جىلدىق 5 پايىزدىق جەڭىلدىكپەن بەرىلەدى. نەسيەنى وتەۋ مەرزىمى 3 جىلدان 25 جىلعا دەيىن ازاماتتاردىڭ تولەم قابىلەتتىلىگىنە قاراي ەسەپتەلەدى. باستاپقى تولەم – 10%. قاتىسۋشىلار باستاپقى جانە ەكىنشى دەڭگەيلى تۇرعىن ءۇي باعدارلاماسى بويىنشا پاتەر ساتىپ الا الادى.
ەسكە سالا كەتەلىك, اتالعان باعدارلاما 35 جاسقا دەيىنگى الەۋمەتتىك سالا قىزمەتكەرلەرىن قولداۋعا باعىتتالعان. ولاردىڭ ساپىندا مۇعالىمدەر, دارىگەرلەر, جوعارى وقۋ ورىندارىنىڭ وقىتۋشىلارى, مادەنيەت, سپورت سالاسىنىڭ وكىلدەرى, جۋرناليس پەن عالىمدار بار. جاۋاپتى ماماندار, جالپى باعدارلاما نەگىزىندە الماتىلىق 1 مىڭ وتباسىنى تۇرعىن ۇيمەن قامتۋ جوسپارلانىپ وتىرعانىن ايتادى.
8,4 مىڭ كوپپاتەرلى تۇرعىن ءۇيى بار الماتى ەلدەگى تۇرعىن ءۇي قورى ەڭ باي قالا ەكەنىن اتاپ وتكەن ءجون. كۇن ساناپ اۋماعى ارتقان مەگاپوليستە باسپانا كەزەگى قارقىنداپ ءوسىپ كەلەدى. بۇگىنگى تاڭدا 25 مىڭنان استام ادام تۇرعىن ءۇي كەزەگىندە تۇر. بۇل وتكەن جىلمەن سالىستىرعاندا 4,5 مىڭ ادامعا ارتىق. بىلتىر شاھاردا 3 162 مۇقتاج تۇرعىن ۇيمەن قامتاماسىز ەتىلگەن. باسپانالى بولۋ باقىتى بۇيىرعانداردىڭ ىشىندە 520 كوپبالالى وتباسى مەن بالالار ءۇيىنىڭ 114 تۇلەگى بار.
الماتى
