ەڭبەككە بەيىم ەلوردالىقتار

15 مىڭنان اسا جاڭا جۇمىس ورنى قۇرىلادى

«جۇمىسپەن قامتۋدىڭ جول كارتاسى» باعدارلاماسى حالىقتى جۇمىسپەن قام­تۋ ماسەلەلەرىن جەدەل ءارى جۇيەلى شەشۋ ماقساتىندا ازىرلەنگەن. بۇل باع­دارلامانىڭ اياسىندا قوسىمشا جۇمىس ورىندارى قۇرىلادى, سونداي-اق الەۋ­مەتتىك, ينجەنەرلىك-كولىك ين­فرا­قۇ­رى­لىمدى جانە تۇرعىن ءۇي-كوم­مۋنال­دىق شا­رۋاشىلىقتى دامىتۋ, ەلدى مەكەن­دەردى اباتتاندىرۋ جوبالارىن ىسكە اسى­رۋعا جۇمىسشىلار تارتىلادى.

جۇمىسپەن قامتۋدىڭ 2020-2021 جىل­­دارعا ارنالعان جول كارتاسى بويىن­شا­ نۇر-سۇلتان قالاسىندا 15 253 جاڭا جۇ­مىس ورنىن قۇرۋ كوزدەلگەن. ونىڭ جارتىسىنا, ياعني 7 627 بوس ورىنعا جۇ­مىس­سىزداردى ورنالاستىرۋ حالىقتى جۇ­مىسپەن قامتۋ ورتالىعىنا جۇكتەلگەن.

حالىقتى جۇمىسپەن قامتۋ ورتا­لى­عىنىڭ ديرەكتورى باقىتبەك قابجانوۆ­تىڭ ايتۋىنشا, بۇگىنگى تاڭدا اتالعان باع­دارلاما اياسىندا ەلوردادا 13 912 ادام جۇمىسپەن قامتىلدى. ونىڭ 7 489-ى­ حا­لىقتى جۇمىسپەن قامتۋ ورتالىعى ار­قىلى جۇمىسقا ورنالاستى. ال 6 423 بوس جۇمىس ورنى جۇمىس بەرۋشىلەر تارا­پىنان كەلگەن جۇمىسسىز ازاماتتارعا بەرىلدى.

جوعارىدا كەلتىرگەندەي, جول كارتا­سىنىڭ ءبىر باعىتى – ورتاق يگىلىك ءۇشىن قول­­عا الىنعان ىرگەلى جوبالاردى ورىن­داۋ­عا جۇمىس ىزدەپ جۇرگەن جۇرتتى جۇ­مىل­دىرۋ. ايتالىق بيىل ەلوردادا 151 ين­فراقۇرىلىمدىق جوبانى ىسكە اسىرۋ جوسپارلانعان. قازىرگى تاڭدا 148 نىسان بويىنشا جۇمىستار جۇرگىزىلىپ جاتىر. بۇل باعدارلاما اياسىندا مەكتەپتەر, اۋرۋ­­حانالار, تۇرعىن ۇيلەر قۇرىلىسىن جۇر­­گىزۋ نەمەسە جوندەۋ, ينجەنەرلىك-كولىك ين­فرا­­قۇرىلىمىن كۇردەلى ورتاشا جانە اعىم­­داعى جوندەۋ, قايتا جاڭارتۋ جانە سالۋ, كوگالداندىرۋ بويىنشا بوس جۇمىس ورىندارى ۇسىنىلادى.

جالپى, باعدارلاما شەڭبەرىندە قاراس­تىرىلعان جۇمىستارعا حالىقتى جۇمىس­پەن قامتۋ ورتالىعىنا جۇمىسسىز رەتىندە تىركەلگەندەر تارتىلادى, سونداي-اق ين­فراقۇرىلىمدىق جوبالاردى ىسكە اسىراتىن جۇمىس بەرۋشى-مەردىگەرلەرگە ۋا­قىتشا تىركەلگەن ادامداردى قوسا العاندا وسى قالادا تۇراتىن جۇمىسسىزدار جىبە­رىلەدى. بۇدان باعدارلاما نەگىزىنەن تۇر­عىن­داردى تۇراقتى جۇمىسپەن قامتۋدى كوز­دەيتىنىن بايقاۋعا بولادى.

جول كارتاسى بويىنشا بوس جۇمىس ورىندارى تۋرالى مالىمەتتەر www.enbek.kz پورتالىندا جاريالانادى.

از ۋاقىتتا 220 ادام جاڭا كاسىپ مەڭگەردى

بىلىكتى مامانعا قوعامدا قاشاندا سۇرانىس بار ەكەنى بەلگىلى. سوندىقتان جا­ھاندانۋ مەن يندۋستريالاندىرۋ جاع­دايىندا كادر دايارلاۋدى جاقسارتۋ مەم­لەكەت ساياساتىنداعى نەگىزگى مىن­دەت­تەر­دىڭ ءبىرى ەكەنى ءسوزسىز. ەلىمىزدە جۇمىس­سىز­داردى كاسىبي دايارلاۋ, قىسقا مەرزىمدى كا­سىپ­تىك وقىتۋ مەملەكەتتىك «ەڭبەك» باع­دار­لاماسىنىڭ اياسىندا جۇزەگە اسىرىلىپ جاتىر.

اتالعان باعدارلاما ارقىلى نۇر-سۇلتان قالاسىندا وسى جىلى 220 ادام كاسىپتىك ءبىلىم بەرۋ, قايتا دايارلاۋدى قام­تيتىن وقۋلارعا جىبەرىلدى. ارنايى كۋرستار اسپاز, كونديتەر, تىگىنشى, شاشتاراز, كاسسير-باقىلاۋشى, ناۋبايشى, تار­بيەشى-كومەكشى, انيماتسيا جانە بەينەگرافيكا سياقتى ماماندىقتار بويىنشا ۇيىمداستىرىلدى. ناتيجەسىندە 52 ادام – اسپاز, 41 ادام – شاشتاراز جانە 30 ادام تىگىنشى كاسىبىنە بەيىمدەلدى. وسىلايشا ەلوردادا سۇرانىسقا يە مامانداردىڭ قاتارى تولىقتى.

حالىقتى جۇمىسپەن قامتۋ ورتالى­عىنىڭ ارنايى وقىتۋ كۋرستارىنا قاتى­سۋعا بەيىلدى ازاماتتاردىڭ جاڭا كاسىپ ۇي­رەن­ۋىنە كومەكتەسەتىن وقۋ ورداسىنىڭ ءبىرى – قوعامدىق تاماقتانۋ جانە سەرۆيس كول­لەدجى. قازىر بۇل جەردە 30 ادام ارنايى كۋرستاردان ءوتىپ جاتىر. ونىڭ 10-ى ناۋبايشى بولعىسى كەلسە, 20 ادام ءىس تىگۋ شەبەرلىگىن شىڭداعىسى كەلەدى. كوللەدج ديرەكتورىنىڭ كاسىبي ءبىلىم بەرۋ بويىنشا ورىنباسارى نۇرجانات مۇراتقىزىنىڭ ايتۋىنشا, ءبىلىم وشاعىندا وقىپ, جاڭا كاسىپ مەڭگەرگەن ءاربىر ازامات جۇمىسپەن قام­تىلادى. بۇل تۇرعىدا بىرنەشە كاسىپ­ورىنمەن, جەكە كاسىپكەرلەرمەن ارنا­يى كەلىسىمشارت جاسالعان. مىسالى, «بال-جيدەك» جشس-دە ناۋبايشىلار, «ۆەستە» اتەلەسىندە وسى كوللەدجدىڭ كۋر­سىنان وتكەن تىگىنشىلەر جۇمىس ىستەيدى ەكەن.

بۇگىنگە دەيىن نۇر-سۇلتان قالاسىندا كاسىپتىك وقۋدان وتكەن ازاماتتاردىڭ 90 پا­يىزى جۇمىسقا ورنالاستىرىلعان.

جاڭا كاسىپ ۇيرەنىپ, كۋرسقا قاتىسىپ جۇرگەندەردىڭ ءبىرى – اقمارال قوسجانوۆا. ول ون جەتى جىلعا جۋىق سالىق سالاسىندا, مەملەكەتتىك قىزمەتتە جۇمىس ىستەپتى. الاي­دا ءوزىنىڭ جەكە بيزنەسىن اشۋ تۋرالى ءبىرازدان ويلاپ جۇرگەن. وسىدان بىر­نەشە اي بۇرىن حالىقتى جۇمىسپەن قامتۋ ورتالىعىنا كەلىپ, كاسىپتىك وقىتۋ بويىنشا تەگىن كۋرسقا قاتىسۋ ءۇشىن ءوتىنىش قالدىرعان بولاتىن. قازىر ول تىگىنشى كۋرسىندا وقىپ ءجۇر. بۇگىنگە دەيىن كورپە-جاستىق, پەردە تىگۋدى جاقسى مەڭگەرىپتى. اقمارال ديزاينەرلىك ۇلگىدەگى كيىم تىگىپ, جەكە كاسىپ اشىپ, ءوز برەندىن قالىپتاستىرۋدى ارماندايدى.

قىسقا مەرزىمدى كاسىپتىك وقۋعا مامان­دىعى جوق نەمەسە ەڭبەك نارىعىندا سۇرا­نىس­قا يە ەمەس ماماندىق يەلەرى, بىلىك­تىلىگىن جوعالتىپ العان جانە ماماندىعىن اۋىس­تىرعىسى كەلەتىن ازاماتتار قاتىسا الادى. كاسىپتىك وقىتۋدىڭ ۇزاقتىعى كاسىپ­تىڭ ەرەكشەلىگىنە قاراي ءبىر ايدان ءۇش ايعا دەيىنگى مەرزىمدى قۇرايدى.

باعدارلاما قاتىسۋشىلارىنىڭ مەم­لەكەتتىك قولداۋ مەن شاكىرتاقىمەن قام­تىلۋى بۇل باستاماعا قىزىعۋشىلىق تا­نى­تاتىنداردى دا ارتتىرا تۇسەدى. ال بيىلعى كاسىپتىك وقىتۋ بويىنشا كۋرس­تارعا قابىلداۋ اياقتالدى. سوندىقتان ال­داعى جىلدىڭ جاڭالىقتارىنا تالاپتى ەلور­دالىقتاردىڭ قۇلاعى تۇرىك جۇرگەنى ءجون.

«جاستار تاجىريبەسىنە» تالاپتاناتىندار كوپ

«جاس كەلسە – ىسكە» دەگەندەي, جاستار­دى مەيلىنشە مولىنان جۇمىسپەن قام­تۋ ماسەلەسى دە «ەڭبەك» مەملەكەتتىك باع­­دار­لاماسىندا قاراستىرىلعان. بۇل ءۇشىن ارنايى ءبىر باعىت رەتىندە جاستار پراك­تيكاسى بەلگىلەندى. ونىڭ اياسىندا جۇمىسسىز جۇرگەن جاستار «ەكى قولعا – ءبىر كۇرەك» تاۋىپ, تاجىريبە جيناۋعا مول مۇمكىندىك الادى. ءىس-تاجىريبەدەن وتۋ­گە كەلگەندەرگە جالاقى دا تولەنەدى. ناق­تىراق ايتساق, تالاپتى جاستار اي سايىن 76 800 تەڭگە قاراجات الادى. بۇل كوپ­شىلىكتى ايتارلىقتاي ىنتالاندىرىپ, ما­مان­دىعىن تەرەڭ مەڭگەرۋگە, تاجىريبە جي­ناۋعا تالاپتانعان جاستاردىڭ قاتارى كوبەيگەن.

وسى باعدارلاما بويىنشا جۇمىسقا ورنالاسقان جاس ماماننىڭ ءبىرى – ەراسىل سەرىك ۇلى. ول ل.ن.گۋميلەۆ اتىنداعى ەۇۋ-ءدىڭ «يادرولىق فيزيكا» ماماندىعى بويىنشا ءبىلىم العان. قولىنا ديپلومىن العان سوڭ ەلورداداعى حالىقتى جۇمىس­پەن قامتۋ ورتالىعىنا كەلىپ, «جاستار پراكتيكاسى» باعدارلاماسىنا تىركەلدى. ءىس-تاجىريبەدەن ءوتۋ ءۇشىن قارۋ­لى كۇشتەردىڭ «جاس سارباز» اسكەري پاتريوت­تىق ۇيىمىنا جۇمىسقا جىبەرىلدى. الداعى ۋاقىتتا ەراسىل وسى ۇيىمدا تۇراقتى جۇ­مىس­قا قابىلدانادى.

نۇر-سۇلتان قالاسىنداعى حالىقتى جۇمىسپەن قامتۋ ورتالىعى جىل باسىنان بەرى 602 جاس ماماندى جۇمىسقا جىبەردى. ونىڭ 188-ءى تاجىريبەدەن وتسە, 22 جاس مامان تۇراقتى جۇمىسپەن قامتىلدى. ولار قازىر ءتۇرلى مەكەمە مەن كاسىپورىنداردا ەڭ­ب­ەك ەتەدى. اتالعان ورتالىق «جاستار پراك­تيكاسى» بويىنشا نۇر-سۇلتان قالا­سىنداعى 269 مەكەمەمەن كەلىسىمشارت جاسادى. بۇل جەردە 1700-گە جۋىق بوس ورىن بەرىل­گەن.

«جاستار پراكتيكاسى» – تيىمدىلىگىمەن تانىلعان مەملەكەتتىك باعدارلامانىڭ ءبىرى. تۇلەكتەردى جۇمىسقا بەيىمدەۋ ماق­ساتىندا قولعا الىنعان باستاماعا تەحني­كالىق جانە كاسىپتىك ءبىلىم العان, جوعارى وقۋ ورىندارىن بىتىرگەن 29 جاسقا دەيىنگى تۇ­لەكتەر قاتىسادى. ءىس-تاجىريبە جيناقتاۋ باع­دارلاماسىنىڭ ۇزاقتىعى 6 ايدان اس­پايدى. ياعني, «جاستار پراكتيكاسى» وقۋىن اياقتاعان جاستاردىڭ 3 جىل ىشىندە ال­عان كاسىبى نەمەسە ماماندىعى بويىنشا جۇمىسقا ورنالاسۋىنا ۇلكەن سەپتىگىن تيگىزەدى.

«جاستار پراكتيكاسىنا» قاتىسقىسى كەلەتىندەر حالىقتى جۇمىسپەن قامتۋ ورتالىعىنا تىركەلۋى قاجەت. ءوتىنىم بەرۋ ءۇشىن جەكە كۋالىكتىڭ كوشىرمەسىن, بار بولسا ەڭبەك كىتاپشاسىنىڭ كوشىرمەسىن, سونداي-اق تەحنيكالىق جانە كاسىپتىك, ورتا بىلىمنەن كەيىنگى جوعارى ءبىلىمى بار ەكەنىن راستايتىن قۇجاتتىڭ كوشىرمەسىن قوسا تاپسىرۋ كەرەك.

كارانتيندە سۇرانىسقا يە ماماندىقتار

نۇر-سۇلتان قالاسىندا قۇرىلىس, ساۋ­دا, تاماقتانۋ جانە دەنساۋلىق ساقتاۋ سالا­سىنداعى ماماندىقتارعا سۇرانىس كوپ. اسىرەسە جۇمىسشىلار, جۇك كولىگى جۇرگى­زۋشىلەرى مەن مونتاجشىلار جەتىس­پەي جاتىر. بۇل تۋرالى ەلوردا اكىمدىگىنىڭ رەسمي سايتى حابارلادى.

تارقاتىپ ايتار بولساق, قۇرىلىس سالاسىندا پروراب, شەبەر, تاس قالاۋشى, ارماتۋراشى, ينجەنەر-سمەتاشى, بەتونشى, ون­دىرىستىك-تەحنيكالىق ءبولىم ينجەنەرى, ءار­تۇرلى جۇمىس ىستەۋشى جۇمىسشىلار قا­جەت. ال ساۋدا سالاسىندا ساتۋشى, كاسسير, مەنەدجەر, سۋپەرۆايزەر, مەرچەنداي­زەر سياقتى كادرلاردىڭ تاپشىلىعى باي­قالادى.

دەنساۋلىق ساقتاۋ جۇيەسىندە دارىگەر, مەدبيكە, سانيتارلار جەتىسپەي جاتسا, تا­ماق­تانۋ سالاسىندا ءتۇرلى تاعامدار تسەحىنا اسپاز, اس ءۇي قىزمەتكەرى, ناۋبايشى, كون­ديتەرلەر كەرەك.

7 قازاندا حالىقتى جۇمىسپەن قامتۋ ورتا­لىعىنىڭ «ەلەكتروندى ەڭبەك بيرجاسى» پورتالىندا سۇرانىسقا يە 1 678 بوس ورىن جاريالاندى. 653 جۇمىس بەرۋشىدەن 5 712 بوس جۇمىس ورنى تىركەلگەن. ونىڭ ىشىن­دە 313-ءى – مۇمكىندىگى شەكتەۋلى ازا­مات­تارعا ارنالعان ۆاكانسيا.

سونداي-اق يكەمدى جۇمىس كەستەسى بار 89 جۇمىس ورنى تىركەلگەن. جاستارعا ار­نالعان بوس ورىندار – 1 315. پروباتسيا قىز­مەتىندە ەسەپتە تۇرعان ازاماتتار دا قا­پەرگە الىنىپ, 10 كاسىپورىن 394 جۇمىس ورنىن ۇسىنعان.

ال ۇسىنىلعان جۇمىستارىنىڭ اقى­­­سىنا كەلسەك, 2 085 ادام 100 000 تەڭ­­گە كولەمىندە جالاقى السا, 2 090 ادامعا 150 000 تەڭگەگە دەيىن ەڭبەكاقى تاعايىندالعان. سونداي-اق 1 537 ادامنىڭ جالاقىسى 150 000 تەڭ­گەدەن اسادى.

جوعارىدا اتاپ وتكەندەي, ەلورداداعى حالىقتى جۇمىسپەن قامتۋ ورتالىعى «جۇمىسپەن قامتۋدىڭ جول كارتاسى» جانە «ەڭبەك» مەملەكەتتىك باعدارلاماسى اياسىندا «جاستار تاجىريبەسى», «الەۋمەتتىك جۇمىس ورىندارى» جانە «قوعامدىق جۇمىستار» بويىنشا بوس جۇمىس ورىندارىن ۇسىنادى.

ءوز يدەياڭدى ىسكە اسىرۋعا قولداۋ كورسەتەدى

استانادا ءومىر ءسۇرىپ وتىرعان ورتاڭدى جاقسارتۋعا ۇلەسىڭدى قوسىپ, الەۋمەتتىك يدەيالارىڭدى جۇزەگە اسىرۋعا مۇمكىندىك بار. ياعني, تىڭ باستاماسى, ۇتىمدى ۇسى­نىسى بار بەلسەندى تۇرعىندارعا ازامات­تىق باستامالار ورتالىعىنىڭ ەسىگى ءار­دايىم اشىق. بۇل ورتالىق بەلسەندىلەر مەن ۇكىمەتتىك ەمەس ۇيىمداردىڭ يدەيالارىن جوباعا اينالدىرۋعا, ىسكە اسىرۋعا كو­مەك كورسەتەدى.

ء«بىز اقپاراتتىق-ادىستەمەلىك قولداۋ, كونسۋلتاتسيالار, وقىتۋ سياقتى كومەك كور­سەتەمىز جانە ۇيلەستىرۋ نەتۆوركينگىن قۇ­رامىز. ياعني, ءبىر-بىرىمىزگە قاجەتتى ۇيىم­داردى, ادامداردى بىرىكتىرەمىز. جەر­گىلىكتى دەڭگەيدە دە, ۇلتتىق دەڭگەيدە دە وزگەرىستەر بويىنشا ۇسىنىستار دا­يىن­داۋعا كومەكتەسەمىز. سونداي-اق ادام­داردىڭ ويىن تىڭداپ, ونى جو­باعا اينالدىرۋعا كومەكتەسەمىز», دەدى ەلور­دالىق ازاماتتىق باستامالار ورتا­لىعىنىڭ ديرەكتورى ماحاببات ەسپەنوۆا.

اتالعان ورتالىقتا جوبالاردىڭ قۇ­نىن ەسەپتەۋ, قارجىلاندىرۋ بويىنشا دا قول­داۋ كورسەتىلەدى. مۇندا ءوز باستامالا­رىمەن كەلەتىن ازاماتتار مەن ۇكىمەتتىك ەمەس ۇيىمداردىڭ يدەيالارى وتە كوپ. ولار كوبىنە قالاداعى ورتانى جاقسارتۋ, ەكولوگيا, ينكليۋزيۆتى ءبىلىم بەرۋ, ۇلتتىق بىرە­گەيلىكتى جاڭعىرتۋ ماسەلەلەرىنە كوڭىل اۋدارادى.

«جاز مەزگىلىندە ءبىز اۋدان اكىمدىكتەرى جۇزەگە اسىراتىن «بيۋدجەتكە قاتىسۋ» جوباسى بويىنشا تۇرعىندارعا اۋلالاردى اباتتاندىرۋعا قالاي ءوتىنىش جازاتىنىن ۇيرەتەمىز. سونداي-اق ءبىز جۇيەلى وقىتۋ, ەرەكشە قاجەتتىلىكتەرى بار بالالاردى بەيىمدەۋ, ينكليۋزيۆتى ءبىلىم بەرۋ, تاريحي رەكونسترۋكتسيا كلۋبىن قۇرۋ بويىنشا كومەك كورسەتۋ جوبالارىن ۇسىنامىز», دەدى ورتالىق ديرەكتورى.

تابىستى باستامانىڭ ءبىرى جاسوسپىرىم­دەردى جانە ومىرلىك قيىن جاعدايعا تاپ بولعان بالالاردى قولداۋعا باعىتتالعان «Asyl Urpaq Jarqyn» جوباسى بولدى. بۇل شىعارماشىلىق ءۇشىن كەڭىستىك ۇيىم­داس­تىرۋعا, جاستاردىڭ قابىلەتىن, شىعار­ماشىلىق الەۋەتىن ءتيىمدى دامىتۋعا, ءار­­بىرى ءۇشىن قولايلى جاعداي جاساۋعا ما­مانداندىرىلعان. جوبا بويىنشا قىز­دار­عا ارنالعان تىگىن ساباقتارى وتكىزىلدى.

يدەيا اۆتورى جانەل اسىل «Birgemiz: Sabaqtastyq» جالپىۇلتتىق جوباسى اياسىندا ەلوردالىق ازاماتتىق باستامالار ورتا­لىعىنىڭ قولداۋىمەن «Kazbrands» قوعام­دىق قورىنىڭ شاعىن گرانتىن جەڭىپ الدى.

ازاماتتىق باستامالار ورتالىعى دي­رەكتورىنىڭ ايتۋىنشا, جىل باسىنان بەرى ورتالىقتا 500-دەي كەڭەس وتكىزىلىپ, سول ارقىلى 5 ۇەۇ قارجىلىق قولداۋ ال­دى. 56 بالا تاعىلىمدامادان ءوتىپ, ونىڭ 29-ى جۇمىس تاپتى. ورتالىقتا وقى­تۋ ءىس-شارالارى, كونفەرەنتسيالار ۇيىمداس­تىرىلدى.

پاندەميا كەزىندە بەلسەندىلىك تانىت­قان ازاماتتار از بولعان جوق. ونىڭ ءبىر مى­سالىن ۆولونتەرلىك قوزعالىستاردىڭ كوبەي­گەنىنەن بايقاۋعا بولادى. قالانىڭ قايى­رىمدى تۇرعىندارى قىسىلتاياڭ كەزەڭدە حالىققا قامقور بولىپ, ءدارى-دارمەك, ازىق-ت ۇلىك سياقتى قاجەتتى زاتتاردى تاراتۋعا قولعابىس ەتتى. الەۋمەتتىك ماسەلەلەردى شەشۋگە دە بەيجاي قارا­مايتىن ەلوردالىقتار ازاماتتىق باس­تا­مالار ورتالىعىنا كەلىپ, ۇدايى ءوز يدەيا­­لارىن ۇسىنىپ وتىرادى.

قۇلاعىڭىز تۇرىك ءجۇرسىن

نۇر-سۇلتان قالاسى اكىمدىگىنىڭ حالىقتى جۇمىسپەن قامتۋ ورتالىعى جۇمىس بەرۋشىلەردىڭ نازارىنا 2021 جىلدىڭ قوعامدىق جۇمىستارىن ۇيىمداستىرۋ ءۇشىن وتىنىمدەردى قابىلداۋ باستالعانىن حابارلايدى.

قوعامدىق جۇمىستار – قىزمەتكەردىڭ الدىن الا كاسىپتىك دايارلاۋدان ءوتۋىن تالاپ ەتپەيتىن حالىقتى جۇمىسپەن قامتۋ ورتالىعى ۇيىمداستىراتىن ەڭبەك قىزمەتىنىڭ تۇرلەرى. قوعامدىق جۇمىستار رەسپۋبليكالىق نەمەسە جەرگىلىكتى بيۋدجەت قاراجاتى شەگىندە قارجىلاندىرىلادى جانە ءوڭىر ءۇشىن ەكونوميكالىق, الەۋمەتتىك جانە ەكولوگيالىق تيىمدىلىك ماقساتىندا قۇرىلادى.

تولىق اقپارات جانە قاجەتتى قۇجاتتار ءتىزىمى بار ءوتىنىم بلانكىسى ورتالىقتىڭ www.cz.astana.kz رەسمي سايتىندا ور­نالاستىرىلعان. وتىنىشتەر «Documentolog» ەلەكتروندى قۇجات اينالىمى جۇيەسىنىڭ كومەگىمەن قابىلدانادى (egov.kz – ەلەكتروندى ۇكىمەت پورتالى ارقىلى).

سۇراقتار بولسا, نۇر-سۇلتان قالاسى بەيبىتشىلىك كوشەسى, 25 مەكەنجايىنا («وركەن» بو 2-قابات, 202/2-كابينەت) جۇگىنۋگە بولادى نەمەسە 51-89-35; 72-93-56 تەلەفوندارىنا حابارلاسا الاسىز.

* * *

نۇر-سۇلتان قالاسى اكىمدىگىنىڭ حالىقتى جۇمىسپەن قامتۋ ورتالىعى 2021 جىلعا الەۋمەتتىك جۇمىس ورنىن ۇيىمداستىرۋ ءۇشىن وتىنىمدەردى قابىلدايتىنىن حابارلايدى.

الەۋمەتتىك جۇمىس ورنى – جۇمىسسىزداردىڭ جالاقىسىن سۋبسيديالاي وتىرىپ, جۇمىسقا ورنالاستىرۋ ءۇشىن حالىقتى جۇمىسپەن قامتۋ ورتالىعىمەن شارتتىق نەگىزدە جۇمىس بەرۋشى قۇراتىن جۇمىس ورنى.

الەۋمەتتىك جۇمىس ورىندارىنا جۇمىسقا ورنالاستىرىلعان جۇمىسسىزداردىڭ جالاقىسىنا بەرىلەتىن اي سايىنعى سۋبسيديا مولشەرى سالىقتاردى, مىندەتتى الەۋمەتتىك اۋدارىمداردى جانە پايدالانىلماعان ەڭبەك دەمالىسىنا وتەماقىنى ەسكەرە وتىرىپ, ەكولوگيالىق ۇستەمەاقىلار بويىنشا تولەمدەردى ەسەپكە الماعاندا بەلگىلەنگەن جالاقى مولشەرىنىڭ 35%-ىن قۇرايدى. بىراق ءتيىستى قارجى رەسپۋبليكالىق بيۋدجەت تۋرالى زاڭدا ايقىندالعان ەڭ تومەنگى جالاقى مولشەرىنەن اسپايدى.

تولىق اقپارات جانە قاجەتتى قۇجاتتار ءتىزىمى بار ءوتىنىم بلانكىسى ورتالىقتىڭ www.cz.astana.kz رەسمي سايتىندا ورنالاستىرىلعان.