گۇلشارا ابدىقالىقوۆا قىزىلوردا قالاسىنداعى بىرقاتار نىساندى ارالادى

ايماقتار • 08 قازان، 2020

گۇلشارا ابدىقالىقوۆا قىزىلوردا قالاسىنداعى بىرقاتار نىساندى ارالادى

28 رەت كورسەتىلدى

وبلىس اكىمى گۇلشارا ابدىقالىقوۆا جىلۋ ماۋسىمىنىڭ باستالۋى قارساڭىندا قىزىلوردا قالاسىنداعى بىرقاتار نىساندى ارالادى. ءوڭىر باسشىسى الدىمەن وڭتۇستىك بۋ قازاندىعىندا بولدى. قالاداعى 197-ءى كوپ قاباتتى ءۇي، 5 بالاباقشا، 10 مەديتسينالىق مەكەمە، بارلىعى 763 نىسان جىلۋدى وسى قازاندىقتان الىپ وتىر. جىلۋ قازاندىعى گازبەن جىلىتىلادى، رەزەرۆتىك وتىن رەتىندە 644 توننا مازۋت الىنعان. ايماق باسشىسى دايىندىق جۇمىستارىن دەر كەزىندە اياقتاپ، قالا تۇرعىندارىن ۋاقىتىلى جىلۋمەن قامتۋدى قاتاڭ تاپسىردى، دەپ حابارلايدى Egemen.kz.

مۇرات جەتپىسباەۆ

مۇنان كەيىن گ.ابدىقالىقوۆا ءا.بوكەيحان كوشەسىندە "نۇرلى جەر" باعدارلاماسى اياسىندا جۇزەگە اسىرىلىپ جاتقان ۋت-15ا ماگيسترالدى جىلۋ جەلىلەرىن قايتا قۇرۋ جوباسىن نازارعا الدى. ۇزىندىعى 1 567 مەتر جىلۋ جەلىسىن "اۆانگارد" جشس قايتا جۇرگىزۋدە.

"پاندەميا ۋاقىتىندا ءبىز تۇرعىنداردىڭ دەنساۋلىعىنا اسا ءمان بەرۋىمىز قاجەت. قازىرگى ۋاقىتتا كۇن سۋىپ كەلەدى. سوندىقتان قالا حالقىنا دەر كەزىندە جىلۋ بەرىلۋ كەرەك. ول ءۇشىن مەردىگەر مەكەمە وسى جۇمىستى 10 قازانعا دەيىن اياقتاۋى قاجەت"، - دەدى ءوڭىر باسشىسى.

سونداي-اق وبلىس اكىمى №15 اۆتونومدى بلوكتى-ءمودۋلدى قازاندىعىنىڭ جۇمىسىن دا كوردى. "اراي-2" شاعىن اۋدانىندا ورنالاسقان "قىزىلورداجىلۋەلەكترورتالىعىنا" قاراستى قازاندىق 2015 جىلى پايدالانۋعا بەرىلگەن. وسى اۋدانداعى 19 كوپقاباتتى ءۇيدى جىلۋمەن قامتاماسىز ەتەدى.

سىرداريانىڭ سول جاعالاۋىنداعى ۇيلەردى جىلۋمەن قامتاماسىز ەتەتىن اۆتونومدى بلوكتى-ءمودۋلدى قازاندىعىنىڭ قۇرىلىسى دا 15 قازانعا دەيىن تولىق اياقتالادى دەپ جوسپارلانۋدا. بۇگىندە 2 سۋ قويماسىنىڭ قۇرىلىس-مونتاج جۇمىستارى، قازاندىققا قاجەتتى جوعارعى قىسىمدى گاز قۇبىرلارىن، اۋىز سۋ قۇبىرلارىن تارتىپ، قازاندىقتى مونتاجداۋ، عيماراتتىڭ ىشكى بولمەلەرىن سالۋ، مورجالارىنىڭ مونتاجداۋ جۇمىستارى جۇرگىزىلگەن. كەلىسىمشارت بويىنشا قۇرىلىستى اياقتاۋ جەلتوقسان ايى دەپ بەلگىلەنگەنمەن، مەردىگەر مەكەمە جىلۋ ماۋسىمىنىڭ باستالۋىنا دەيىن جۇمىستى تولىق ورىندايتىندىعىن جەتكىزدى. ايماق باسشىسى قازاندىق قۇرىلىسىن ساپالى اياقتاپ، سول جاعالاۋداعى 32 كوپقاباتتى ءۇي مەن 2 الەۋمەتتىك نىساندى دەر كەزىندە جىلۋ جۇيەسىنە قوسۋدى تاپسىردى.

وبلىس اكىمى "قىزىلورداجىلۋەلەكترورتالىعىنا" دا باردى. ورتالىقتىڭ بيىلعى ماۋسىمعا نەگىزگى جابدىقتارىن دايىنداۋ ماقساتىندا "جۇمىسپەن قامتۋ 2020 جول كارتاسى" باعدارلاماسى شەڭبەرىندە 1022 ملن تەڭگە بولىنگەن. وسىنىڭ ارقاسىندا 156 ادام جۇمىسقا ورنالاستى. اتالمىش جىلۋمەن جابدىقتاۋ ايماعىنىڭ جىلۋ ەنەرگياسىن 995 نىسان تۇتىنادى. ونىڭ ىشىندە 365 كوپقاباتتى ءۇي، 29 مەكتەپ، 13 بالاباقشا، 9 مەديتسينالىق مەكەمەنى جىلۋمەن قامتاماسىز ەتەدى. سونىمەن قاتار، قۋاتتىلىعى 113،2 مۆت ەلەكتر ەنەرگياسىن وندىرەدى.

ايماق باسشىسى 200 ورىنعا ارنالعان مودۋلدىك ۇلگىدەگى جۇقپالى اۋرۋلار اۋرۋحاناسىنىڭ دا قۇرىلىسىمەن تانىستى.

كۇننىڭ ماڭىزدى جانە وزەكتى جاڭالىقتارىن «ەگەمەن قازاقستان» تەلەگرام كانالىنان وقىڭىز