«سامۇرىق-قازىنا» اق كومپانيالار توبىنىڭ COVID-19 ىندەتىنىڭ ىقتيمال ەكىنشى تولقىنىنا دايىندىعى تۋرالى ارنايى بريفينگى ءوتىپ, قوردىڭ اكتيۆتەردى باسقارۋ جانە جەكەشەلەندىرۋ جونىندەگى باسقارۋشى ديرەكتورى الماسادام ساتقاليەۆ جان-جاقتى مالىمەت بەردى.
– پاندەميانىڭ العاشقى كەزەڭىندە جينالعان تاجىريبە كورسەتكەندەي, قور تاۋەكەلدەر مەن قيىندىقتاردى ەڭسەرە ءبىلدى. ءبىز نەگىزگى كورسەتكىشتەردىڭ ايتارلىقتاي تومەندەۋىنە, ءوندىرىستىڭ توقتاپ قالماۋىنا جانە وندىرىستىك پەرسونالدىڭ قىسقارۋىنا جول بەرمەدىك, جالاقى ۋاقىتىندا تولەندى, – دەدى ا.ساتقاليەۆ.
ونىڭ ايتۋىنشا, قازىرگى ۋاقىتتا پاندەميا قايتالانعان جاعدايدا ءىس-شارالار جوسپارىن تۇزەتۋ بويىنشا جۇمىس جۇرگىزىلىپ, قارجىنى رەزەرۆتەۋ قامتاماسىز ەتىلگەن. سونداي-اق ءتيىستى تاۋارلاردى, جۇمىستار مەن قىزمەتتەردى ۇزدىكسىز جەتكىزۋ بارىسى پىسىقتالعان. پورتفەلدىك كومپانيالارعا قاراستى كاسىپورىندار مەن مەردىگەرلىك مەديتسينالىق ۇيىمداردىڭ مەديتسينالىق كومەك كورسەتۋ جونىندەگى ءىس-قيمىلدارعا دايىندىعى ناقتىلاندى.
قوردىڭ قازىرگى قابىلدانىپ جاتقان شارالارى وندىرىستىك قىزمەتتى قولداۋ, قارجىلىق تۇراقتىلىقتى قامتاماسىز ەتۋ جانە باسقارۋدىڭ ەڭ ءتيىمدى قۇرىلىمىن ساقتاۋ ءۇشىن قولايسىز سالدارعا اكەلۋى مۇمكىن ماڭىزدى بيزنەس-پروتسەستەردىڭ ءتىزىمىن ايقىنداۋعا باعىتتالعان. ماسەلەن, پاندەميانىڭ ءبىرىنشى تولقىنى كەزىندە وندىرىسكە مينيمالدى كەرى اسەر ەتىپ, تيىمدىلىكتى كورسەتكەن ا, ۆ, س جوسپارلارىنىڭ الگوريتمدەرى جاسالعان. ا جوسپارى الدىن الۋ شارالارىن جۇزەگە اسىرۋدى كوزدەيدى. ال ۆ جوسپارى ەپيدەميالىق جاعدايدىڭ ناشارلاۋى كەزىندە جانە س جوسپارى كومپانيادا نەمەسە ءوندىرىس ورنىندا ينفەكتسيا جاعدايلارى انىقتالعان كەزدەگى ءىس-شارالاردى بەكىتۋگە باعىتتالعان. سونداي-اق پورتفەلدىك كومپانيالاردىڭ ىندەتتىڭ الدىن الۋ ءىس-شارالارى بويىنشا جۇرگىزگەن بەلسەندى جۇمىستارى جالعاسۋدا.
– ارينە, قور قازىرگى جاعدايدى مۇقيات تالدايدى. قىزمەتكەرلەرىمىزدىڭ دەنساۋلىعىن ويلاۋ – باستى مىندەتىمىز. ءبىز بۇل باعىتتا كوپتەگەن جۇمىس جۇرگىزىپ جاتىرمىز. پاندەميا تاجىريبەسى بولاشاق بيزنەستى تسيفرلاندىرۋ ءىسىنىڭ, وندىرىستىك ەكونوميكانى مودەرنيزاتسيالاۋدىڭ ماڭىزدى ەكەنىن كورسەتتى, – دەيدى ا.ساتقاليەۆ.
باسقارۋشى ديرەكتور ىقتيمال ەكىنشى تولقىنعا دايىندىق اياسىندا قور قىزمەتكەرلەرىنىڭ اراسىندا دەنساۋلىق ساقتاۋ مينيسترلىگىنىڭ نۇسقامالارىنا سايكەس COVID-19-دان قورعانۋدىڭ شارالارىن ساقتاۋ ماسەلەلەرى بويىنشا اقپاراتتىق جۇمىستارى جالعاساتىنىن حابارلادى. سونداي-اق جۋرناليستەر سۇراعىنا جاۋاپ بەرگەن ول كوروناۆيرۋس ينفەكتسياسىنان زارداپ شەككەن سالالارعا قولداۋ كورسەتۋ جانە قالپىنا كەلتىرۋ جۇمىستارىنا توقتالدى.
– جولاۋشىلار تاسىمالداۋ سالاسىنا كەلەتىن بولساق, بۇل كوروناۆيرۋس ينفەكتسياسىنىڭ تارالۋىنان ەڭ كوپ زارداپ شەككەن سالا ەكەنى ءسوزسىز. پاندەميانىڭ ءبىرىنشى تولقىنى كەزىندە جولاۋشىلار ترافيگى توقتاتىلعانى بەلگىلى. جولاۋشىلار تاسىمالى 2019 جىلمەن سالىستىرعاندا 50 پايىزعا قىسقاردى. بۇل كومپانيانىڭ قارجىلىق ناتيجەلەرىنە اسەر ەتتى. مەملەكەت تاراپىنان تەمىر جول سالاسىنا بولىنەتىن جوسپارلى سۋبسيديانىڭ كولەمى ساقتالىپ, جاعداي قالپىنا كەلدى.قتج جولاۋشىلاردى تاسىمالداۋ جوسپارىن جىل سوڭىنا دەيىن 60 پايىزدان اسىرا الماۋى مۇمكىن. بۇل سايكەسىنشە كومپانيانىڭ قارجىلىق كورسەتكىشتەرىنە اسەر ەتەدى. جۇمىس تيىمدىلىگىن ارتتىرۋ ءۇشىن ءبىز جاڭا دامۋ جوسپارىن قابىلدادىق. وندا كومپانيالار وندىرىستىك جانە كۇردەلى سالىمداردى ەداۋىر قىسقارتتى. بۇل تۇتاستاي العاندا كومپانياعا وندىرىستىك تاپسىرمالاردى ورىنداۋعا مۇمكىندىك بەرەدى, – دەدى ا.ساتقاليەۆ.
«سامۇرىق-قازىنا» اق ەنشىلەس كومپانيالارىنىڭ تۇراقتى وندىرىستىك كورسەتكىشى اسا ماڭىزدى. كەز كەلگەن جاعدايعا بايلانىستى قور جاڭا شەشىمدەردى ىزدەۋ مەحانيزمىن ىسكە قوسىپ, باسقارۋشىلىق جانە وندىرىستىك پروتسەستەردى قايتا قۇرۋ مەن جەتىلدىرۋگە باعىتتالعان جوبالارعا باسا نازار اۋدارىپ كەلەدى.
