ع.نادۋەۆتىڭ ايتۋىنشا, تۇندە "ىستامبۇل – اقتاۋ" باعىتىنداعى رەيس اقتاۋ حالىقارالىق اۋەجايىنا قوندى. بورتتا 94 جولاۋشى بولعان. انىقتاماسى بار 83 جولاۋشى ۇيلەرىنە قايتارىلدى. ال, 11 ادام 1 شاعىن اۋداندا ورنالاسقان ستاتسيونارعا جاتقىزىلدى. جولاۋشىلاردان الىنعان كوۆيدكە قارسى پتر تەست تەرىس ناتيجە بەرگەن جاعدايدا ۇيلەرىنە جىبەرىلەدى.
"بۇگىنگى تاڭدا شەتەلدەن ۇشىپ كەلگەن قازاقستان ازاماتى بولسىن, باسقا ەلدىڭ ازاماتتارى بولسىن بارىنە تەرمومەتريا وتكىزىلەدى. جانە دە انكەتيروۆانيا وتەدى. سوندىقتان دا ول تەمىر جول بولسىن, تەڭىز جولىمەن بولسىن, ماشينامەن كەلىپ جاتقان كىسىلەر وسىنداي قاتاڭ تەكسەرىسپەن ەسەپكە الىنادى", دەدى ماڭعىستاۋ وبلىسىنىڭ باس سانيتار دارىگەرى عازيز نادۋەۆ.
اقتاۋ اۋەجايى ازىرگە تەك حالىقارالىق رەيستەردەن ىستامبۇل-اقتاۋ باعىتىندا عانا ۇشاقتار قابىلداۋدا. اۋە رەيسى اپتاسىنا 3 رەت قاتىنايدى.
ەسكە سالا كەتەيىك, باس سانيتارلىق دارىگەرى ەرلان قياسوۆتىڭ مەملەكەتتىك شەكاراداعى وتكىزۋ پۋنكتەرىندە كوروناۆيرۋس ينفەكتسياسىنىڭ الدىن الۋ شارالارىن ودان ءارى كۇشەيتۋ تۋرالى جاڭا قاۋلىسى 6 قازاندا ساعات 00:00-دە كۇشىنە ەندى. جاڭا ەرەجەلەرگە سايكەس بىرقاتار شەكتەۋلەر قولدانىلادى. قازاقستانعا شەتەلدەن كەلگەن ۇشاق جولاۋشىلارىنىڭ بارلىعى تەرمومەتريادان ءوتىپ, ساۋالداماعا جاۋاپ بەرەدى جانە COVID-19-عا قارسى پتر-تەستىنىڭ وڭ ناتيجەسى تۋرالى انىقتامانى ۇسىنۋى ءتيىس. قازاقستان رەسپۋبليكاسىنىڭ مەملەكەتتىك شەكاراسىنان ءوتۋ كەزىندە 72 ساعاتتان اسپاعان انىقتاما عانا جارامدى. سونداي-اق قازاقستان ازاماتتىعى جوق ادامداردا انىقتاما بولماعان جاعدايدا ولاردىڭ ەلگە كىرۋىنە تىيىم سالىنادى. قولىندا انىقتاماسى بار جانە دەنە قىزۋى قالىپتى جولاۋشىلارعا COVID بەلگىلەرى ءتۇسىندىرىلىپ, ساپاردى جالعاستىرۋىنا رۇقسات ەتىلەدى. دەنە قىزۋى جوعارىلاعان جولاۋشىلار قولىندا انىقتاماسىنىڭ بولۋىنا قاراماستان, كارانتيندىك ستاتسيونارعا ەكى كۇنگە جاتقىزىلىپ, زەرتحانالىق تەكسەرۋ جۇرگىزۋ ءۇشىن وقشاۋلانادى. COVID-19 زەرتحانالىق زەرتتەۋ ناتيجەسىن العاننان كەيىن تەستتىڭ وڭ ناتيجەسى بار ادامدار جۇقپالى اۋرۋلار اۋرۋحاناسىنا اۋىستىرىلادى. ەلگە كەلگەن قازاقستان ازاماتتارىنىڭ قولىندا انىقتاما بولماسا, 2 كۇن بويى كارانتيندىك ستاتسيوناردا وقشاۋلانادى.
