قازاقستاندا ازاماتتىق اليانس قۇرىلىمى ەلىمىزدىڭ بارلىق ايماقتارىندا ءىس-ارەكەت ەتەدى. ازاماتتىق قوعامدى دامىتۋ ءماسەلەلەرىن ىلگەرىلەتۋ جانە ايماقتارداعى ۇكىمەتتىك ەمەس سەكتوردىڭ باسىن بىرىكتىرەتىن ءىرى قاۋىمداستىق.
بىرىنشىدەن, قۇرامىمىزدا 38 قوعامدىق ۇيىم مۇشە. ازاماتتىق باستامانى قولداۋ, ءبىلىم جانە تاربيە, رۋحاني قۇندىلىقتاردى ناسيحاتتاۋ, جاستار شىعارماشىلىعى, قورشاعان ورتانى قورعاۋ, مۇمكىندىگى شەكتەۋلى جانداردىڭ مۇددەسىن قورعاۋ, دەنساۋلىق, كاسىپكەرلىكتى قولداۋ, قۇقىقتىق, ورالماندار ماسەلەسى باعىتتارى بويىنشا جۇمىس جاسايتىن ۇيىمدار مۇشەلىككە ەنگەن.
قازاقستاندا ازاماتتىق اليانس قۇرىلىمى ەلىمىزدىڭ بارلىق ايماقتارىندا ءىس-ارەكەت ەتەدى. ازاماتتىق قوعامدى دامىتۋ ءماسەلەلەرىن ىلگەرىلەتۋ جانە ايماقتارداعى ۇكىمەتتىك ەمەس سەكتوردىڭ باسىن بىرىكتىرەتىن ءىرى قاۋىمداستىق.
بىرىنشىدەن, قۇرامىمىزدا 38 قوعامدىق ۇيىم مۇشە. ازاماتتىق باستامانى قولداۋ, ءبىلىم جانە تاربيە, رۋحاني قۇندىلىقتاردى ناسيحاتتاۋ, جاستار شىعارماشىلىعى, قورشاعان ورتانى قورعاۋ, مۇمكىندىگى شەكتەۋلى جانداردىڭ مۇددەسىن قورعاۋ, دەنساۋلىق, كاسىپكەرلىكتى قولداۋ, قۇقىقتىق, ورالماندار ماسەلەسى باعىتتارى بويىنشا جۇمىس جاسايتىن ۇيىمدار مۇشەلىككە ەنگەن. وبلىس اكىمدىگى جانىنداعى كەڭەس كوميسسيا جۇمىستارىنا بەلسەنە ارالاسادى. وبلىس كولەمىندە عانا ەمەس, رەسپۋبليكا كولەمىندە بەدەلى بار ۇيىم.
قازاقستاندا ۇكىمەتتىك ەمەس ۇيىم سەكتورى – ەلىمىزدىڭ تاۋەلسىزدىك العان جىلداردان بەرى بىرگە دامىپ كەلە جاتقان ازاماتتىق قوعام ينستيتۋتىنىڭ باستى قۇرىلىمدارىنىڭ ءبىرى. 2000 جىلدارى قازاقستان ۇكىمەتى قوعامدىق ۇيىمداردىڭ جۇمىسىنا كوڭىل بولە باستادى. 2003 جىلى ەلىمىزدە ەلباسى ن.ءا.نازارباەۆتىڭ قاتىسۋىمەن تۇڭعىش ازاماتتىق فورۋم ءوتتى. ەلباسىنىڭ تاپسىرماسىمەن 2005 جىلى ازاماتتىق قوعامدى 2006-2011 جىلدارى ارالىعىندا دامىتۋ تۇجىرىمداماسى, مەملەكەتتىك الەۋمەتتىك تاپسىرىس زاڭى قابىلداندى. اتا زاڭىمىزعا قوعامدىق ۇيىمداردى قارجىلاندىرۋعا مۇمكىندىك بەرەتىن وزگەرىستەر ەنگىزىلدى. قازاقستاننىڭ ازاماتتىق اليانسى زاڭدى تۇلعالار قاۋىمداستىعى قۇرىلدى, بارلىق ايماقتاردا وبلىستىق دەڭگەيدە ازاماتتىق اليانس بىرلەستىكتەرى ءوز قىزمەتتەرىن باستادى. مىنە, سولاردىڭ ءبىرى بولىپ ءبىزدىڭ وبلىستا دا ازاماتتىق اليانس ءوز جۇمىسىن باستاپ كەتتى.
اليانس 2006-2011 جىلعا ارنالعان ازاماتتىق قوعامدى دامىتۋ تۇجىرىمداماسىن نەگىزگە الا وتىرىپ, ءوز قىزمەتىنىڭ ستراتەگيالىق جوسپارىن قۇردى, مەملەكەت تاراپىنان ازاماتتىق قوعامنىڭ دامۋىنا قولايلى جاعدايلار تۋعىزىلدى, ارنايى ايماقتىق باعدارلامالار جاساقتالدى. ءبىزدىڭ ۇيىم مەملەكەتتىك جانە جەرگىلىكتى ورگاندارمەن, بيزنەسپەن ىقپالداستىقتى نىعايتۋ باعىتىندا تۇراقتى جۇمىس جاسادى. تەك وبلىس ورتالىعىندا عانا ەمەس, اۋدان جانە اۋىلدىق جەرلەردە دە وسى ازاماتتىق قوعامنىڭ ءرولى تۋرالى ۇلكەن تۇسىنىك جۇمىستارى جۇرگىزىلدى. بۇگىنگى تاڭدا وبلىستىڭ بارلىق دەڭگەيدەگى جەرگىلىكتى بيلىكپەن, مەملەكەتتىك ورگاندارمەن جانە بيزنەس قۇرىلىمدارىمەن, قوعامدىق ساياسي پارتيالارمەن, بۇقارالىق اقپارات قۇرالدارىمەن تىعىز قارىم-قاتىناستا جۇمىس جاساۋدامىز. ازاماتتىق قوعام ينستيتۋتتارىنىڭ شەشىم قابىلداۋ كەزەڭىندەگى اتسالىسۋىنا جانە بەلسەنە ارالاسۋىنا مۇمكىندىك بەرەتىن شارالاردى تۇراقتى ءارى جۇيەلى جۇرگىزۋ ارقىلى بۇگىنگى تاڭدا بەدەلدى ۇكىمەتتىك ەمەس ۇيىمداردىڭ ىرگەتاسى قۇرىلدى دەسەم ارتىق بولمايدى.
العا قويعان بارلىق مىندەتتەر مەن مەجەلەر جۇزەگە اسىرىلدى جانە اسىرىلىپ تا جاتىر دەپ ايتا الامىن. اينالامىزدا بولىپ جاتقان جاعدايلارعا كوز جۇمىپ وتىرماۋ كەرەكتىگىن قوعام ءتۇسىنىپ كەلەدى. زاڭنىڭ ورىندالۋىنا تالاپ قويا الاتىن ازاماتتاردىڭ كوبەيۋى, سىبايلاس جەمقورلىققا قارسى توزبەۋشىلىك پەن تىتىركەنۋشىلىك سانانىڭ ويانۋىمەن, رۋحاني قۇندىلىقتار جاڭعىرۋدا. اسىرەسە, جاستار جاعى بەلسەندىلىك تانىتۋدا.
بىراق ءبارى جاقسى دەپ تە ايتۋعا كەلمەس. ءومىر بولعان سوڭ جاقسى دا جامان جاعى دا بولادى. ايماعىمىزدا 2005 جىلدان بەرى قوعامدىق ۇيىمدار قۇرىلىپ, ولار بەلسەندى ارەكەت ەتەدى. وعان سەبەپكەر ۇيىمىمىزدىڭ جانىنان ۇكىمەتتىك ەمەس ۇيىمداردىڭ رەسۋرس ورتالىعىن قۇرعاندىعىمىز. ازاماتتىق باستامالارى بار قوعام بەلسەندىلەرىنىڭ زاڭ اياسىندا جۇمىستاندىرۋ ءۇشىن «زاڭدى تۇلعا بولىپ قالاي تىركەلۋگە بولادى, ماقسات پەن مىندەتتەرىن دۇرىس قالاي قۇرۋ قاجەت, ەگەر دە يدەيالارى بولسا جوبانى قالاي جازۋعا بولادى, جوبانى جۇزەگە اسىرۋ ءۇشىن سەرىكتەستەردى قالاي ىزدەستىرۋ كەرەك, قارجى كوزدەرىن قالاي تابۋعا بولادى؟» – دەگەن باعىتتا ادىستەمەلىك كومەكتى تۇراقتى جۇرگىزۋدەمىز. مىنە, وسى جۇمىستاردىڭ قازىر جەمىسى بار. قانشاما ۇيىمدار جاستارمەن, جاسوسپىرىمدەرمەن, مۇمكىندىگى شەكتەۋلى جاندارمەن جۇمىستار جۇرگىزىپ جاتىر. تۇراقتى دا جۇيەلى جۇمىستىڭ جانە بىلىكتى ۇيىمداستىرۋدىڭ ارقاسىندا وبلىس كولەمىندە قوعامنىڭ دا, بيلىكتىڭ دە, بيزنەستىڭ دە ۇكىمەتتىك ەمەس ۇيىمدارعا دەگەن سەنىمدى قالىپتاستىرۋعا ىقپال ەتتىك دەپ ايتا الامىن. ازاماتتىق اليانس الەۋمەتتىك ماسەلەلەردى تالقىلاي جانە ۇسىنىس جاساقتاي الاتىن سۇحبات قۇرۋ جانە سۇحباتتاسۋ مۇمكىندىگىنە قول جەتكىزدى. اۋىلدىق جەرلەردە شاعىن بيزنەستىڭ دامۋىنا قوسقان ۇلەسىمىزدى ماقتانىشپەن ايتا الامىن. اۋىل تۇرعىندارىنا قاجەت قىزمەتتەر, جاڭا جۇمىس ورىندارى, ەڭ باستىسى, جۇمىسسىز ۇيدە وتىرعان ايەلدەر مەن الەۋمەتتىك قورعالماعان وتباسىلار ءۇشىن جانۇيالىق كاسىپكە يە بولۋ مۇمكىندىگىنە قول جەتكىزۋگە ىقپال ەتتىك. مەكتەپ وقۋشىلارىنا كاسىپتىك باعدار بەرۋ باعدارلامالارىنىڭ ورتا مەكتەپتەردە ەنگىزىلۋىنە جانە الەۋمەتتىك از قامتىلعان وتباسىلارداعى انالار مەن بالالاردىڭ الەۋەتىن كوتەرۋگە باعىتتالعان باعدارلامالارعا قاتىسۋىنا مۇمكىندىك جاساۋدامىز.
ايماعىمىزدا ۇكىمەتتىك ەمەس ۇيىمدار دا الەۋمەتتىك ماسەلەلەردىڭ شەشىلۋىنە بەلسەندى قاتىسىپ, ءوز ۇلەسىن قوسۋدا. قوعامدىق ۇيىمداردىڭ بەلسەندى ارەكەتى سوڭعى 5-6 جىلدا انىق بايقالىپ وتىر. ازاماتتاردىڭ قارجىلىق, قۇقىقتىق جانە ەكولوگيالىق مادەنيەتىن كوتەرۋ, سالاماتتى ءومىر ءسۇرۋ, الەۋمەتتىك قورعالماعان ءالجۋاز توپتارعا قاجەت قىزمەت تۇرلەرىن ۇسىنۋ, شەشىم قابىلداۋ بارىسىنا قاتىسۋعا قۇلشىنىس تانىتۋ, الەۋمەتتىك ماسەلەلەردى ۇنقاتىسۋ الاڭدارىندا تالقىلاپ, كونسترۋكتيۆتى سۇحبات قۇرۋعا ۇمتىلۋ, وزەكتى ماسەلەلەردى شەشۋدە جەرگىلىكتى بيلىك پەن بيزنەسكە ۇتىمدى ۇسىنىستار بەرۋ – بۇل ءبىزدىڭ جەتىستىگىمىز دەپ اتاپ كەتۋگە بولادى. وبلىسىمىزدىڭ ۇكىمەتتىك ەمەس ۇيىمدار:
جەرگىلىكتى بيلىك جانە بيزنەس پەن تەڭ دارەجەدە سۇحبات الاڭىندا پىكىر تالاستىرا الاتىن سەرىكتەس دەڭگەيىنە قول جەتكىزدى, ءالجۋاز الەۋمەتتىك قورعالماعان توپتارعا قاجەت قىزمەت تۇرلەرىن حالىققا ۇسىنىپ, بەلگىلى ءبىر توپتىڭ ماسەلەسىن شەشۋگە ۇلەس قوسۋدا, قوعامدىق ۇيىمنىڭ كوشباسشىلارىنىڭ پىكىرلەرى دە بيلىك پەن بيزنەس تاراپىنان ەسكەرىلەتىن دارەجەگە دەيىن جەتىپ جاتىر. ۇەۇ-نىڭ پىكىرلەرىنە حالىق تا قۇلاق تۇرە باستادى, قوعامدىق پىكىر قالىپتاستىرۋدا ورنى ەرەكشە ءرول اتقارۋدا.
ازاماتتىق قوعام ينستيتۋتتارىنىڭ دامۋىنا ەلىمىزدە قولايلى جاعداي جاسالىپ, بارلىق مۇمكىندىكتەر قاراستىرىلۋدا. ءاربىر مەملەكەتتىڭ نەگىزگى تىرەگى – ازاماتتىق قوعام. وركەنيەتتى قوعامى بار ەلدە ادىلەتتىلىك پەن تەڭدىك ماڭىزدى كورسەتكىش بولىپ تابىلادى. ءبىزدىڭ ەلىمىزدە وسىنداي قوعامعا جەتۋ ءۇشىن بارلىق مۇمكىندىكتى جىبەرىپ الماۋىمىز كەرەك. مىنە, سول سەبەپتى دە مەملەكەتتىك بيۋدجەتتەن ۇەۇ مەملەكەتتىك الەۋمەتتىك تاپسىرىسقا قارجى ءبولىنىپ جاتىر. رەسپۋبليكالىق جانە حالىقارالىق ۇيىمداردىڭ دا گرانتتارىن جەڭىپ الىپ, ونى وبلىس تۇرعىندارىنىڭ الەۋمەتتىك جاعدايىن جاقسارتۋعا, الەۋەتىن كوتەرۋگە باعىشتاپ جاتىرمىز. قوعامدىق ۇيىمداردىڭ مۇنداي باستامالارىنا جەرگىلىكتى بيلىك پەن مەملەكەتتىك ورگانداردىڭ تاراپىنان دا قولداۋ كورسەتىلۋدە. بيلىكتىڭ ۇەۇ قىزمەتىنە تۇسىنىستىك تانىتىپ, تىعىز قارىم-قاتىناس قۇرىپ, قوعام ماسەلەسىن ورتاق تالقىلاپ, ىنتىماقتاسىپ جاساپ جاتقان قىزمەتتەرىمىز دە از ەمەس. «ءبارى تاماشا, بارىنە قول جەتكىزدىك» دەسەك, ول وتىرىك بولار. كەمشىلىكتەر مەن قاتەلىكتەر قانداي ىستە دە كەزدەسەدى. «ە, سولاي ەكەن-اۋ», دەپ قول قۋسىرىپ وتىرۋعا تاعى بولمايدى. سوندىقتان بارلىق مۇمكىندىكتى جىبەرىپ الماي, كەمشىن تۇستارىمىزدى دا اتاپ كەتكىم كەلەدى.
جەرگىلىكتى بيلىك پەن قارىم-قاتىناسىمىزدى نىعايتۋعا بىردەن-ءبىر ۇلەس قوسقان بۇل – مەملەكەتتىك الەۋمەتتىك تاپسىرىس. ونى جوققا شىعارمايدى. ۇيىم بولىپ اياقتانۋعا, تۇراقتىلىققا قول جەتكىزۋگە ءمۇمكىندىك جاسادى. بىراق سوڭعى جىلدارى وسى ۇەۇ ارنالعان الەۋمەتتىك ماڭىزى بار تاپسىرىس بايقاۋى كەش جاريالانىپ, جىلدىڭ ورتاسى اۋعاندا عانا قارجىعا قول جەتكىزەمىز.
سونىڭ ناتيجەسىندە كوپتەگەن شارالار اسىعىستىقپەن جاسالادى. بۇعان كەيبىر مەملەكەتتىك ورگاندار سىن ايتىپ جاتادى. ونىڭ دا ءجونى بار. وزدەرىنىڭ اتقارىپ جاتقان شارالارىنا ۇەۇ دا كوڭىلى تولماي, «اتتەگەن-اي, ۋاقىتىم مولداۋ بولعاندا مۇنى باسقاشا اتقارار ەدىم», دەپ قىنجىلىپ جاتادى. سول سەبەپتى 2014 جىلعى مەملەكەتتىك الەۋمەتتىك تاپسىرىس جىلدىڭ باسىندا جاريالانسا دەگەن ۇسىنىسىم بار جانە الەۋمەتتىك ماڭىزى بار لوتتار تاقىرىپتارىن قۇرۋ كەزىندە مىندەتتى تۇردە ۇەۇ-نىڭ دا ۇسىنىس-پىكىرلەرىن ەسكەرسە دەيمىز.
سونىمەن قاتار, ۇەۇ-عا ارنالعان مەملەكەتتىك الەۋمەتتىك تاپسىرىستى تەك ءبىر عانا باسقارمانىڭ قۇزىرىنا بەرگەن وتە قيىندىق تۋعىزادى. سەبەبى, ءارتۇرلى سالا بويىنشا ءبىر باسقارمادا ماماندار تابۋ وتە قيىن. سوندىقتان ءار سالا ءبىلىم بەرۋ, مادەنيەت, سپورت, دەنساۋلىق ساقتاۋ, كاسىپكەرلىك, ىشكى ىستەر ورگاندارى, ادىلەت, الەۋمەتتىك قورعاۋ ءوز باعىتتارى بويىنشا ءپروفيلدى ۇەۇ-مەن جۇمىس جاساسا, وندا ءبىراز ماسەلەنى شەشۋگە قول جەتكىزۋگە بولار ەدى. 2009 جىلدان بەرى وبلىستىق فورۋمدا اۋدانداعى, اۋىلداعى قوعامدىق ۇيىمداردى دامىتۋ ءۇشىن بيۋدجەتتەن دە قارجى قاراستىرۋ قاجەت دەپ, ۇسىنىس بەرىپ كەلەمىز. بىراق, وكىنىشكە قاراي, جاڭاوزەن قالاسىنان باسقا اۋدانداردا بۇل ماسەلە ءالى شەشىمىن تاپپاي وتىر.
وبلىستىق دەڭگەيدەگى بايقاۋعا اۋىلدىق ۇەۇ قاتىسۋى جانە تاپسىرىسقا قول جەتكىزۋى – ەكىتالاي. بيىل ءبىرىنشى رەت اۋداندىق ۇەۇ-نىڭ رەسۋرس ورتالىعىنا تاپسىرىس بولدى. ەندى وسى باستاما توقتاپ قالماي, ءارى قاراي جالعاسىن تاپسا دەيمىز.
ءبىزدىڭ ايماعىمىزدا بيزنەس پەن ۇەۇ اراسىندا قارىم-قاتىناس قانداي دارەجەدە؟ الەمدى تولعاندىرىپ وتىرعان بيزنەستىڭ الەۋمەتتىك جاۋاپكەرشىلىگى ماسەلەسى شاعىن جانە ورتا بيزنەس سالاسىن ويلاندىرا ما؟ دەگەن ساۋالدارعا ايماقتىڭ ۇەۇ دا جاۋاپ ىزدەپ جاتىر. بيزنەس پەن بيلىككە قوعام تالابى جىلدان-جىلعا ارتۋدا. سوندىقتان كەز كەلگەن بيزنەس ەگەر جەرگىلىكتى قاۋىمداستىق – حالىق پەن قوعامدىق ۇيىمدارمەن ءتىل تابىسىپ, ولاردىڭ پىكىرىنە قۇلاق اسسا, شەشىم قابىلداعاندا ەسكەرسە, ونداي بيزنەسكە ينۆەستيتسيا دا قۇيىلادى, تابىسى دا تۇراقتى بولادى. بۇل باعىتتا شاعىن جانە ورتا بيزنەس سالاسىنىڭ كورپوراتيۆتى الەۋمەتتىك جاۋاپكەرشىلىك مادەنيەتىن كوتەرۋگە بىرلەسە جۇمىستانۋعا, كاج قاعيداتتارىن ۇستاناتىن بيزنەستىڭ ارەكەتىن وڭ باعالاۋعا بيلىك پەن قوعامنىڭ رەسۋرستارىن بىرىكتىرە جۇمىستانۋعا شاقىرامىن.
جالپى, كەز كەلگەن داۋ-داماي نەدەن باستالادى؟ بۇل ءبىر-ءبىرىمىزدى تىڭداي الماۋدان, ەستىمەۋدەن. بيلىك, بيزنەس جانە قوعام اراسىنداعى كەرى بايلانىس مادەنيەتى قالىپتاسسا, وندا كەز كەلگەن ماسەلەنىڭ دۇرىس وڭتايلى شەشىمىن تابۋعا بولادى. قوعاممەن كەرى بايلانىس قۇرۋدىڭ بىردەن-ءبىر وڭتايلى تۇعىرناماسى – قوعامدىق كەڭەستەر. وسى پلاتفورمانى ءبىز ءتيىمدى پايدالانا الىپ وتىرمىز با؟ قوعامدىق كەڭەستىڭ شەشىمدەرىنىڭ تولىق ورىندالۋى مۇمكىندىگى بار ما, شەشىمنىڭ قانداي كۇشى بار؟ تۇتاستاي العاندا, وبلىس تۇرعىندارى بۇل كەڭەستەردىڭ جۇمىسىمەن تانىس پا؟ ونداي اقپاراتتى قايدان الۋعا بولادى, اقپارات قولجەتىمدى مە؟ كەڭەس قوعاممەن بايلانىستىڭ قانداي فورمالارىن پايدالانادى؟ كەڭەس جۇمىسىنا ۇكىمەتتىك ەمەس ۇيىمدارىنىڭ وكىلدەرى قالاي اتسالىسا الادى؟ 2013 جىلى وبلىسىمىزداعى بىرنەشە قوعامدىق كەڭەس پەن كوميسسيالاردىڭ قاجەتتىلىگىن باعالاۋ جۇمىستارىن, سول كەڭەس مۇشەلەرىنىڭ قاتىسۋىمەن جۇرگىزدىك. وبلىس كولەمىندە كەڭەس مۇشەلەرى مەن تۇرعىنداردى كەزدەستىردىك, كەڭەس جۇمىسى تۋرالى اقپارات الۋعا مۇمكىندىك بەردىك. شىندىعىندا تۇرعىندار كەڭەس جۇمىستارىنىڭ قاجەت قىزمەت ەكەندىگىن بىزگە دالەلدەپ بەردى. سوندىقتان بۇگىنگى جەرگىلىكتى بيلىك جانىنداعى قوعامدىق كەڭەس جۇمىستارىنىڭ تيىمدىلىگىن ارتتىرۋ تەتىكتەرىن جاساقتاۋدى ۇسىنامىن, جاساقتاسۋعا دا دايىن ەكەنىمىزدى ايتقىم كەلەدى.
ازاماتتىق قوعامنىڭ دامۋى – ازاماتتاردىڭ الەۋمەتتىك جاۋاپكەرشىلىگىنە بايلانىستى. قوعامدىق ءتارتىپتىڭ بۇزىلۋى, جاسوسپىرىمدەر قىلمىسىنىڭ ءورشۋى, سىبايلاس جەمقورلىقتىڭ كەڭىنەن ەتەك الۋى – بۇل ءبىزدىڭ ازاماتتارىمىزدىڭ الەۋمەتتىك جاۋاپكەرشىلىگىنىڭ تومەندىگى, ساياسي ساۋاتسىزدىعى. سوندىقتان بارلىق ازاماتتىق قوعام ينستيتۋتتارى قوعامىمىزدى ساۋىقتىرۋ باعىتىنداعى ءىس-شارالارعا بەلسەندى ارالاسقان جاعدايدا عانا جوعارىدا ايتىلعان جايتتاردى بولدىرماۋعا بولادى.
قوعامدىق پىكىر قالىپتاستىرۋ جانە ازاماتتاردىڭ ساياسي ساۋاتتىلىعىن كوتەرۋ جۇمىسىمىزدىڭ باسىم باعىتتارىنىڭ ءبىرى بولعاندىقتان, اقپاراتتىق قۇرالدار ارقىلى, قوعامدىق دارىستەر, سەمينارلار, دوڭگەلەك ۇستەلدەر جانە كەزدەسۋلەر سياقتى شارالاردى جۇرگىزۋ ارقىلى اعارتۋشىلىق باعىتتاعى جۇمىسىمىزدىڭ ماڭىزى زور. ۇيىم بيلىكپەن دە, بيزنەسپەن دە, حالىقپەن دە تىكەلەي جۇمىس جاسايدى. ۇيىمعا مۇشە قوعامدىق ۇيىمدار دا وسى باعىتتا تۇراقتى جۇمىستانىپ جاتىر.
رۋحاني جاندۇنيەسى باي, ادامگەرشىلىگى, ءبىلىمى مەن بىلىكتىلىگى جوعارى, جۇرەگىندە يمانى بار, ءوز ەلى مەن جەرىن سۇيەتىن, ادال ءارى ءادىل, وزىنە جانە قوعامعا پايدا بەرەتىن ءىس ارەكەتتەرى ارقىلى وزگەلەرگە ۇلگى بولاتىن, سونداي-اق اينالاسىندا بولىپ جاتقان جاعدايلارعا نەمقۇرايلىلىق تانىتپايتىن تۇلعا دەر ەدىم. قورىتا ايتقاندا, ۇكىمەتتىك ەمەس ۇيىمداردىڭ بيلىك پەن حالىق اراسىنداعى دانەكەرلىك قىزمەتى ماڭعىستاۋ ايماعىندا قاناتىن كەڭگە جايىپ كەلەدى.
جاقسىگۇل ماحانبەتوۆا,
«ماڭعىستاۋ وبلىستىق ازاماتتىق اليانسى» زاڭدى تۇلعالار بىرلەستىگىنىڭ پرەزيدەنتى.
اقتاۋ.
