جىل سايىن پوشتا قىزمەتكەرلەرى باسپاسوزگە جازىلۋ ناۋقانىن جوعارى دەڭگەيدە ۇيىمداستىرادى – الدىن الا گازەت وكىلدەرى مەن وقىرماندار اراسىندا كەزدەسۋلەر ۇيىمداستىرىپ, گازەت-جۋرنالدارعا جازىلۋدىڭ ماڭىزدىلىعى, قاجەتتىلىگى تۋرالى تۇسىنىك بەرەدى, جىل سايىن قۇبىلىپ تۇراتىن باسىلىمداردىڭ باعاسى جايىندا ايتىپ, جەتكىزەدى. جازىلىم ناۋقانى باستالىسىمەن پوشتا قىزمەتكەرلەرىنىڭ دە جۇمىسى كوبەيەدى – ءاربىر كۇنى جازىلعان ادام سانىن, قاراجاتىن ەسەپتەۋ قيىننىڭ-قيىنى.
بىراق, قازىر گازەت-جۋرنالدارعا جازىلۋشىلار سانى ءنوپىر, ۇلگەرۋ مۇمكىن ەمەس دەپ ايتۋعا دا كەلمەيدى. وعان ءبىرىنشى سەبەپ – عالامتور كوكجيەگىنىڭ كەڭەيە ءتۇسۋى بولسا, ەكىنشىدەن باسىلىمدار باعاسىنىڭ قىمباتتىعى. ءبىر جىلعا تولىقتاي جازىلۋ باعاسى ون مىڭنىڭ و جاق-بۇ جاعى بولىپ كەلەتىن باسىلىمدارعا جازىلۋعا كەز كەلگەن قاراپايىم ادامنىڭ قالتاسى كوتەرە بەرمەيدى. سوندىقتان ولار وزدەرى قالاعان باسىلىمداردى كومپيۋتەر, سمارتفوندار ارقىلى اقتارىپ, ەلەكتروندى نۇسقاسىن تاۋىپ وقۋدى ءتيىمدى سانايدى.
ال گازەت-جۋرنال تاراتۋداعى پوشتا قىزمەتى دە سىن كوتەرمەيدى. سومكەنى يىعىنا اسىپ الىپ, ارتىق گازەت-جۋرنالدى قولىنا بۋدالاي ۇستاپ ءۇي-ءۇيدى, الىس شاعىن اۋدانداردى جاياۋ ارالاپ, بىرنەشە قاباتتارعا كوتەرىلەتىن قىز-كەلىنشەكتەردىڭ جۇمىسى اۋىر, ءارى ايانىشتى. تىلدەسىپ كورۋ ارقىلى جالاقىلارىنىڭ دا كوڭىل كونشىتپەيتىندىگىن بىلدىك. الىس اۋىلدار تۇگىلى وبلىس ورتالىعىنداعى وقىرمانداردىڭ گازەت-جۋرنالىنىڭ ۋاقتىندا كەلمەيتىندىگىن, باسىلىمنىڭ ەكى-ءۇش ءنومىرىنىڭ جيناقتالىپ ءبىر-اق كەلەتىنىن, ونىڭ ءوزى تۇگەل ەمەس بولعاندىقتان, ءتيىستى ورىندارعا تەلەفون سوعىپ قاجەتتى ساندارىن سۇراتىپ الۋعا ءماجبۇر ەكەنىمىز جاسىرىن ەمەس. قالاداعى جاعدايى وسى بولعاندا, اۋىلدارعا اپتالاپ, مۇمكىن ايلاپ باراتىنى بەلگىلى, ەگەر گازەت-جۋرنالعا جازىلعان ادام بولسا...
پوشتا قىزمەتىنىڭ ساپاسى تۋرالى تالاي ايتىلىپ تا, جازىلىپ تا ءجۇر. پوشتا قىزمەتىنە جۇگىنىپ, قارجىسىن تولەپ جازىلعان باسىلىمىڭ مەزگىلىندە ەسىك الدىنا كەلىپ تۇرماعاسىن رەنجيتىنىڭ دە راس, بىراق جازىلىمدى ۇيىمداستىرۋعا اتسالىسىپ, ماردىمسىز ەڭبەكاقىعا بولا جاياۋ-جالپى گازەت-جۋرنال تاراتىپ جۇرگەن جاندارعا قاراپ ولاردىڭ جۇمىسىنا ءمىن تاققىڭ دا كەلمەيدى, رەنجي دە المايسىڭ...
سونىمەن, پوشتا قىزمەتىنە كوزقاراس قۇبىلىپ تۇر – رەنجيىك پە, جوق پا؟
ماڭعىستاۋ وبلىسى
