«كازپوشتا» اكتسيونەرلىك قوعامى استانا فيليالىنىڭ كوكشەتاۋ قالالىق بولىمشەسى قالا تۇرعىندارىنا قالتقىسىز قىزمەت ەتۋدە. وبلىس ورتالىعىنداعى 15 بولىمشە ءوز قىزمەتتەرىن ءتيىمدى ۇيىمداستىرۋدىڭ ارقاسىندا بارلىق جۇمىستى ءساتتى جۇرگىزىپ كەلەدى. قالا تۇرعىندارى وزدەرىنىڭ قاجەتىنە وراي زاتتارىن جەتكىزۋ, اقپارات الماسۋ قىزمەتتەرىن پايدالانادى. مەكەمە باسشىلارىنىڭ ايتۋىنا قاراعاندا, قازىرگى كۇنى باندەرول, ۇلكەن ولشەمدى اۋىر جۇكتەردى جىبەرۋ جانە جەتكىزۋ, مەرزىمدىك باسىلىمدارعا جازىلۋ, ولاردى ساتۋ, ارنايى بايلانىس قىزمەتىن پايدالانۋ سۇرانىسقا يە. پوشتا جەلىسى – بيزنەس جانە حالىق ءۇشىن ەلەكتروندى ساۋدانى, كولىك-لوگيستيكالىق سەرۆيستى, قارجىلىق قىزمەتتەردى العا جىلجىتۋ ءۇشىن ءتيىمدى قۇرال.
نەگىزىنەن قالا تۇرعىندارىنا كورسەتىلەتىن قىزمەت تۇرلەرىنىڭ ءبىرى – زەينەتاقى مەن جاردەماقى تاراتۋ. بۇل ورايدا, ىركىلىس جوق. جامان تۇماۋ جان القىمنان العان كەزدە دە پوشتا قىزمەتكەرلەرى كوپشىلىكتىڭ كوڭىلىنەن شىعاتىنداي قىزمەت ىستەدى. سونداي-اق ءارتۇرلى حات-حابارلاردى ۋاقتىلى جەتكىزىپ بەرۋ. بۇل ارادا اراگىدىك ارىز-شاعىم دا ايتىلىپ قالاتىن تۇستارى بولادى ەكەن. ونىڭ وزىندىك سەبەبى بار. ماسەلەن, كوپقاباتتى ۇيلەرىندەگى پوشتا جاشىكتەرىنىڭ كوپشىلىگى كىلتكە جابىلمايدى. ءتۇسىپ قالۋى دا, ويىن بالالارىنىڭ الىپ كەتۋى دە عاجاپ ەمەس. دەگەنمەن پوشتا قىزمەتكەرلەرى جاۋاپكەرشىلىك جۇگىن جەتە تۇسىنەدى. سوندىقتان دا ۇجىمداعى 120-عا جۋىق ادام وسى ماقساتتا ءوز مىندەتتەرىنە مۇقيات قاراپ, حالىق تالابىنا ساي جۇمىس ىستەۋدە. ورتاشا جالاقى 80 مىڭ تەڭگە توڭىرەگىندە.
– پوشتا قىزمەتىن پايدالانۋ جىل وتكەن سايىن ازايىپ كەلەدى. ول زاڭدى دا. قازىرگى كۇنى ەلەكتروندى حابار تاراتۋ ابدەن جەتىلدىرىلدى. سونداي-اق ونلاين بايلانىس تا بار. قىزمەت اۋقىمىن كەڭەيتۋ ءۇشىن جاڭالىق بولىپ ەسەپتەلەتىن تىڭ دۇنيەلەردى ويلاستىرۋدامىز. ماسەلەن, ەكىنشى دارەجەلى بانكتەرمەن كەلىسىمشارت جاساسىپ, نەسيە بەرۋدى ۇيىمداستىرۋدامىز. جۇزدەن استام ادام نەسيە الىپ ۇلگەردى. سونداي-اق سالەمدەمەلەر جولدانعان مەكەنجايعا دەيىن جەتكىزىلەدى. وسى ورايدا, ءىرى كولەمدى زاتتاردى قابىلداپ, ەلىمىز بويىنشا جونەلتۋ قولعا الىنعان. مۇنىڭ بارلىعى سوڭعى ۋاقىتتا زامان تالابىنا ساي ۇيىمداستىرىلىپ, تىڭعا تۇرەن سالىپ وتىرعان دۇنيەلەر, – دەيدى بولىمشەنىڭ باس مامانى باۋىرجان ءجۇسىپوۆ.
مەكەمە باسشىلارىنىڭ ايتۋىنا قاراعاندا, قولبايلاۋ بولىپ وتىرعان جايلار دا از ەمەس كورىنەدى. ماسەلەن, پوشتا تاسۋشىلاردىڭ قىزمەتىندە جۇيكەگە جۇك تۇسىرەتىن, كوپتەن بەرى ايتىلا-ايتىلا ابدەن جاۋىر بولعان ماسەلە از ەمەس. ايتالىق كوپقاباتتى ۇيلەردىڭ سىرتقى ەسىگى كىلتپەن جابىلادى. قاۋىپسىزدىك ءۇشىن ول دا كەرەك شىعار. بىراق سونىڭ ءوزى پوشتا سالاتىن جاشىكتەر ىشتە بولعاندىقتان, كوپ-كورىم قيىندىق تۋدىرۋدا. ال قالانىڭ شەتكەرى ورنالاسقان ايماقتارىنداعى جەكەمەنشىك ۇيلەردىڭ جولى سىن كوتەرمەيدى. بوس جۇرگەن بۇرالقى يت كوپ. بۇرناعى جىلدارى وقىس وقيعالار دا ورىن العان. بىراق سونىڭ بارىنە قاراماي, پوشتا تاسىمالداۋشىلار ءوز جۇمىستارىن ءمىنسىز اتقارۋعا تىرىسادى.
– ەندىگى ءبىر ماسەلە – ءباسپاسوز تاراتۋ جايى. وتكەن جىلعى جوسپار ءجۇز پايىز ورىندالعان. بيىل ىندەتكە بايلانىستى جاعدايدىڭ كۇردەلى بولاتىن ءتۇرى بار, – دەيدى قالالىق بولىمشە باسشىسىنىڭ ورىنباسارى ءاليما بالتاباەۆا.
قالا تۇرعىندارى تاراپىنان گازەت-جۋرنالداردىڭ ساتىلۋى تۋرالى وتىنىشتەر ءجيى ايتىلاتىندىعىن دا ايتا كەتكەنىمىز ورىندى بولار. ماسەلەن, وبلىس ورتالىعىنداعى بۇقارالىق اقپارات قۇرالدارىن ساتاتىن دۇڭگىرشەكتەردە نەگىزىنەن شەتەلدىك باسىلىمدار كوبىرەك ساتىلادى. اسىرەسە تەمىر جول مەن اۆتوبەكەت ماڭىندا جەرگىلىكتى ۇلت تىلىندەگى باسىلىم ىزدەگەندەر كوپ-اق.
تۇتاستاي العاندا پوشتا قىزمەتىندە زامان تالابىنا ساي جاڭالىق از ەمەس. سونىڭ بارلىعى بايلانىس جۇيەسىنىڭ ماڭىزىن ارتتىرا تۇسۋگە باعىتتالعان.
كوكشەتاۋ
