زەرتتەۋ ادىستەمەسىندە مەملەكەتتىك باسقارۋ ساپاسىنىڭ نەگىزگى كورسەتكىشتەرىن كەشەندى تۇردە ايقىندايتىن 6 نەگىزگى ينديكاتور قولدانىلادى. جاڭارتىلعان ەسەپتە قازاقستان 5 كورسەتكىش بويىنشا وڭ ناتيجە بايقاتقان. اتاپ ايتقاندا, ۇكىمەت جۇمىسىنىڭ تيىمدىلىگى, رەتتەۋشىلىك كليمات ساپاسى, ساياسي تۇراقتىلىق, زاڭنىڭ ۇستەمدىگى, سونداي-اق جەمقورلىقپەن كۇرەستە جاقسى كورسەتكىش تىركەلگەن. دۇنيەجۇزىلىك بانك ۇكىمەتتىڭ بيلىك ينستيتۋتتارىن كۇشەيتۋ, ولاردىڭ تيىمدىلىگىن, اشىقتىعىن جانە بولجامدىلىعىن ارتتىرۋ باعىتىنداعى جۇيەلى جۇمىسىن جوعارى باعالادى.
زەرتتەۋگە سايكەس, ۇكىمەت جۇمىسىنىڭ تيىمدىلىگى مەملەكەتتىك اپپارات جۇمىسىنىڭ ساپاسى مەن ساياسي-ەكونوميكالىق باعىتتاعى تۇراقتىلىق, سونداي-اق حالىقتىڭ نەگىزگى مەملەكەتتىك قىزمەتتەردى (كولىك, ينفراقۇرىلىم) تۇتىنۋ دەڭگەيىن ارتتىرۋ ەسەبىنەن جاقسارسا كەرەك.
رەتتەۋشىلىك كليماتقا توقتالساق, ەلىمىز بىرنەشە جىلدان بەرى قالعان ولشەمدەرمەن سالىستىرعاندا, ەڭ ۇزدىك ناتيجەنى كورسەتىپ كەلەدى. بىلتىر قازاقستان شەتەلدىك ينۆەستورلار ءۇشىن بيزنەس جۇرگىزۋدەگى تاۋەكەلدەردى تومەندەتۋ باعىتىندا ءتيىمدى جۇمىس جۇرگىزۋ ارقىلى ءوز ورنىن كوتەردى.
دۇنيەجۇزىلىك بانك ەسەبىندە بيلىكتىڭ ساباقتاستىقتى قامتاماسىز ەتۋدە, سونداي-اق ىشكى جانە سىرتقى جانجالداردى بولدىرماۋ ەسەبىنەن ەلىمىزدەگى ساياسي تۇراقتىلىق كورسەتكىشتەرىنىڭ جاقسارعانى تۋرالى ايتىلعان.
زاڭ ۇستەمدىگىنە كەلسەك, داۋلاردى بالامالى رەتتەۋ جۇيەسىن دامىتۋ, قۇقىقتىق ءتارتىپتى قامتاماسىز ەتۋ, سول سەكىلدى ازاماتتىق جانە قىلمىستىق زاڭنامالاردى جاقسارتۋ ەسەبىنەن ىلگەرىلەۋ بايقالدى.
سىبايلاس جەمقورلىققا قارسى كۇرەس بويىنشا حالىقتىڭ پاراقورلىقتى قابىلداۋ سۋبينديكاتورلارىنىڭ جاقسارۋى نەگىزىندە جانە بيزنەس جۇرگىزۋدە جەمقورلىق تاۋەكەلدەرىنىڭ تومەندەۋى ەسەبىنەن ارتتى.
WGI ەسەبىن وزىق حالىقارالىق قارجى ۇيىمدارى, دامۋ ينستيتۋتتارى جانە رەيتينگ اگەنتتىكتەرى ۇلتتىق ەكونوميكالاردىڭ بولجامدارى مەن نەسيەلىك باعالاۋلارىن قالىپتاستىرۋ ءۇشىن كەڭىنەن قولدانادى.
زەرتتەۋ ناتيجەلەرى بويىنشا Fitch رەيتينگ اگەنتتىگى دە ۇلتتىق ەكونوميكانىڭ كرەديتتىك باعاسىن «BBB» دەڭگەيىندە نىعايتا وتىرىپ, ۇكىمەت جۇمىسىنىڭ وڭ ديناميكاسىن اتاپ ءوتتى. بيىل تامىزدا پاندەميادان تۋىنداعان الەمدىك ەكونوميكالاردىڭ كرەديتتىك باعالاۋلارىن قايتا قاراستىرۋ ارقىلى Fitch قازاقستان ەكونوميكاسىنىڭ «BBB» دەڭگەيىندەگى پاندەمياعا دەيىنگى باعالاۋىن راستادى. دەمەك بولجام تۇراقتىلىقتى كورسەتكەن.
