قر سىبايلاس جەمقورلىققا قارسى ءىس-قيمىل اگەنتتىگى قىزىلوردا وبلىسى بويىنشا دەپارتامەنتىنىڭ باتىس ايماعى بويىنشا اۋدانارالىق باسقارماسى ۇسىنعان ماتەريال نەگىزىندە اۋداندىق ءماسليحات اپپاراتىنىڭ باسشىسىنا تارتىپتىك ءىس قوزعالىپ, ونىڭ ارەكەتىنە قاتىستى قىزمەتتىك تەرگەپ-تەكسەرۋ جۇرگىزىلگەن.
ونىڭ بارىسىندا, اپپاراتقا جەتەكشىلىك ەتەتىن ازاماتتىڭ «قىزىلوردا گاز» جشس ديرەكتورىنا ءوز تۋىستارى ساتقان جەر ۋچاسكەسىنىڭ قۇجاتتارىن رەسىمدەپ بەرۋگە ۋادە بەرگەندىگى جانە قولحات جازعاندىعى انىقتالعان.
وسىلايشا اپپارات باسشىسىنىڭ لاۋازىمدىق وكىلەتتىلىكتەرىن جاقىن تۋىستارىنىڭ ماتەريالدىق مۇددەلەرىن قاناعاتتاندىرۋعا پايدالانىپ, ءوز ءىس-ارەكەتىمەن «قر مەملەكەتتىك قىزمەتى» تۋرالى زاڭىنىڭ 50-بابىنىڭ 1-تارماعى 2-تارماقشاسىندا كوزدەلگەن تالاپتارىن بۇزعاندىعى انىقتالدى.
ادەپ جونىندەگى كەڭەس مۇشەلەرى تارتىپتىك ءىستىڭ ماتەريالدارىن جان-جاقتى قاراپ, مەملەكەتتىك قىزمەتكە كىر كەلتىرەتىن تەرىس قىلىقتارعا جول بەرگەنى ءۇشىن كوپشىلىك داۋىسپەن قازالى اۋداندىق ءماسليحاتى اپپاراتىنىڭ باسشىسىنا «قىزمەتىنە تولىق سايكەس ەمەستىگى تۋرالى ەسكەرتۋ» تارتىپتىك جازاسىن قولدانۋ تۋرالى شەشىم قابىلدادى.
