سوڭعى جىلدارى ادامداردىڭ ءبىر-بىرىنە دەگەن قامقورلىعى كوبەيىپ كەلەدى. قىسىلتاياڭ كۇن تۋعاندا قول- ۇشىن سوزۋ, جانىنداعى ادامدارعا شىن ىقىلاسىمەن جاناشىرلىق جاساۋ كوبەيدى. وسىنىڭ ءوزى-اق قوعامدى ىزگىلەندىرىپ, جاس تولقىندى ءبىر-بىرىنە بارىنشا باۋىرمال بولۋعا تاربيەلەيدى. وبلىس ورتالىعىنداعى جانايدار مۋسين اتىنداعى جوعارى قازاق كوللەدجىنىڭ ءبىلىم الۋشىلارى وزدەرىنىڭ بويىنداعى تاماشا تالىمىمەن ءتانتى ەتۋدە.
«راحات» ۆولونتەرلەر كلۋبىنىڭ بار مۇشەسى وسى كوللەدجدىڭ ءبىلىم الۋشىلارى. اتالعان كلۋبقا 15-كە جۋىق ەرىكتىلەر تىركەلگەن ەكەن. ولار جامان تۇماۋ جان القىمنان الىپ, ىندەت ۇدەپ تۇرعان كەزدە ءارتۇرلى اۋكتسيوندار ۇيىمداستىرىپ, ازىن-اۋلاق قاراجات جيناپ, الەۋمەتتىك جاعىنان از قامتىلعان ادامدارعا كومەك قولىن سوزىپتى. كوللەدج ءبىلىم الۋشىلارىنىڭ قارجىسى قانشالىقتى كوپ دەيسىز. بىراق, ەڭ باستىسى ولار رۋحاني جاعىنان باي. ەڭ باستىسى دا سول ەمەس پە؟
– حالقىمىزدىڭ بويىندا وسىنداي قاسيەتتىڭ مولدىعى جان سارايىڭدى نۇرلاندىرا تۇسەدى, – دەيدى كوللەدج ديرەكتورى نۇرتاس احات, – بۇل ەڭ الدىمەن جاراتىلىستىڭ, سودان سوڭ وتباسىنداعى ءتالىمدى, ادامگەرشىلىككە نەگىزدەلگەن تاربيەنىڭ جەمىسى. ءبىز سول بار دۇنيەنى جەتىلدىرىپ, كەمەلدەندىرە تۇسۋدەمىز. كوللەدجدە ارلى ادامگەرشىلىككە, بيىك پاراساتقا تاربيەلەيتىن الدەنەشە ۇيىرمەلەر جۇمىس ىستەيدى. بولاشاق مۇعالىمدەردىڭ بويىندا بىلىممەن بىرگە كىسىلىكتىڭ, كىشىلىكتىڭ ءدانى ءبۇر جارعانى قانداي جاقسى!
ۆولونتەر جاستار قارعا ادىم جەر مۇڭ بولعان قاريالاردىڭ باسپانالارىن جۋىپ-تازالاپ, سىرلاپ-سىلاپ بەرىپتى. قولدارىنان كەلگەندەرى وسى. جاناشىر جاستاردىڭ ءبىرى – ون سەگىزدەگى ايزا مىڭجاساروۆا. ول تاياۋدا «جىلۋ سىيلايمىز» اتتى اكتسياعا قاتىسىپ, قايتارىمسىز گرانت ۇتىپ العان. سول اقشاعا جالعىزباستى قاريانىڭ ءۇيىن جوندەۋدە.
– الدىمەن سەمينارعا قاتىستىق. 68 گرانت ۇسىنىلدى. مەن ويلانىپ-تولعانا كەلە, «جىلۋ سىيلايمىز» جوباسىن دايىنداپ, بايقاۋعا قاتىستىم. وبلىستىق جاستار رەسۋرستىق ورتالىعىنا حابارلاسىپ, جالعىزباستى قاريانى تاۋىپ الىپ, جاعدايىن مۇقيات زەردەلەدىك. باسپاناسى دا قاريانىڭ ءوزى ءتارىزدى قاۋساپ تۇر ەكەن. اياپ كەتتىك. ءتىپتى, ۇيىندە تەرەزە دە جوق, – دەيدى ايزا.
گرانت قارجىسى ەكى ترانشپەن بولىنگەن. العاشقى 150 مىڭ تەڭگەسىنە قۇربىسىمەن بىرگە جالعىزباستى قاريانىڭ ءۇيىن جوندەۋگە قولعابىسىن تيگىزگەن. سۋ جىلىتقىش ورناتىپ بەرىپتى. ەكىنشى ترانش بويىنشا تۇسكەن اقشاعا تەرەزە سالدىرىپ بەرەمىز دەپ قۇلشىنىپ وتىر.
قاپتاعان قارا ورتكە قاناتىمەن سۋ سەپكەن قارلىعاشتاي ەل ىشىندەگى قامقورلىققا ءزارۋ قاريالارعا قول- ۇشىن بەرىپ, قولتىعىنان دەمەگەن قايىرىمدى جاستاردىڭ قارەكەتىن كورگەندە ەل ىرگەسىنىڭ بەكي تۇسەتىندىگىنە دەگەن سەنىم نىعايا بەرەدى ەكەن.
كوكشەتاۋ
