ەسكى فيلمدەر ەشكىمدى قىزىقتىرمايدى
قازاقستان كينوتەاتر يەلەرى قاۋىمداستىعىنىڭ پرەزيدەنتى مۋنيرا ياگۋدينانىڭ حابارلاۋىنشا, جاعداي ءدال وسىلاي جالعاسا بەرسە, ەلىمىزدەگى ءاربىر بەسىنشى كينوتەاتر جابىلۋى مۇمكىن. ال نارىقتاعى شىعىن كولەمىنىڭ ناقتى اۋقىمىن ەسەپتەۋ قيىنعا سوعۋدا. سەبەبى سالاداعى بەلگىسىزدىك بولجام جاساۋعا مۇمكىندىك بەرمەي وتىر.
– كينوتەاتر – كينو ءوندىرىسى نارىعىنداعى سوڭعى ايالداما. سوندىقتان ءبىزدىڭ جۇمىسقا كىرىسۋىمىز ءۇشىن ەڭ الدىمەن كونتەنت, سانيتارلىق دارىگەرلەردىڭ نورماسى, كينوتەاترلاردىڭ دايىندىعى سەكىلدى بىرنەشە فاكتور ساقتالۋى كەرەك. ۇشەۋى ءۇش بولەك ماسەلە, – دەيدى ول.
الدىمەن كونتەنت جايلى. كونتەنت دەپ وتىرعانىمىز – كورەرمەنگە ۇسىنىلاتىن فيلم. CINEMAX كينوتەاترلار جەلىسىنىڭ باس ديرەكتورى باۋىرجان بيسيمباەۆتىڭ پىكىرىنشە, حالىق ەسكى فيلمدەرگە قىزىقپايدى.
ال جارىققا شىققان جاڭا فيلمدەر جوق دەسە دە بولادى. سەبەبى پاندەميا جالپى كينووندىرىستىڭ قارقىنىن باياۋلاتتى. بۇل وزەكتى ماسەلەگە اينالۋدا.
– قازىر تمد كورەرمەندەرىنىڭ كوڭىلىنەن شىققان بىرنەشە جاڭا ءفيلمنىڭ بار ەكەنىن بىلدىك. كونتەنت جاعىنان ازىرشە سول دۇنيەلەر كوڭىلگە ءۇمىت ۇيالاتۋدا, – دەيدى مۋنيرا ياگۋدينا.
بەلگىسىزدىك بولجام جاساتپاي وتىر
قاۋىمداستىق باسشىسىنىڭ ايتۋىنشا, كورشىلەس مەملەكەتتەر كينوتەاترلاردىڭ ماسەلەسىن رەتتەۋگە تىرىسۋدا. وكىنىشكە قاراي, بىزدەگى جاعداي كوڭىلگە قۋانىش ۇيالاتپاي وتىر.
– ەپيدەميانىڭ تارالۋى تومەندەدى. كارانتين تالاپتارى دا بىرتىندەپ جەڭىلدەدى. بىراق مۇنىڭ كينوتەاترلارعا قاتىسى جوق سەكىلدى. ناۋرىزدا جابىلعاننان ءالى اشىلمادىق. بۇل جاعدايدىڭ قاشانعا دەيىن جالعاساتىنىن ءدوپ باسىپ بولجاۋ دا مۇمكىن بولماي تۇر. سوندىقتان سانيتارلىق دارىگەرلەردىڭ ءار بايانداماسىن تاعاتسىزدانا كۇتىپ جۇرگەن جايىمىز بار, – دەيدى م.ياگۋدينا.
تاۋارلار مەن قىزمەتتەردىڭ ساپاسىن جانە قاۋىپسىزدىگىن باقىلاۋ كوميتەتىنىڭ رەسمي وكىلى ەرجان بايتاناەۆتىڭ ايتۋىنشا, سانيتارلىق تالاپتاردى قاتاڭ ساقتاعان جاعدايدا عانا كينوتەاترلاردىڭ جۇمىسىنا رۇقسات بەرىلۋى مۇمكىن. قازىر كوميتەت وسىعان بايلانىستى بىرنەشە نۇسقانى قاراستىرىپ جاتقان كورىنەدى.
– كوروناۆيرۋس ينفەكتسياسىن تاراتپاۋ جونىندەگى ۆەدومستۆوارالىق كوميسسيانىڭ تاياۋداعى وتىرىسىندا كينوتەاترلاردىڭ قىزمەتىن قايتا ىسكە قوسۋ ۇسىنىلادى. بىراق زالداردى ءجۇز پايىز تولتىرۋعا تىيىم سالىنادى. سونداي-اق كينوتەاتر يەلەرى سانيتارلىق-ەپيدەميالىق شارالاردى قاتاڭ ساقتاۋعا مىندەتتى. كوميتەت ءتيىستى نۇسقالاردى ۇسىنعانىمەن, شەشىمدى كوميسسيا قابىلدايدى, – دەدى ول باق-قا بەرگەن سۇحباتىندا.
مۋنيرا ياگۋدينا تۇرعىندار اراسىندا كينوتەاترعا بارۋ مادەنيەتى جاقسى قالىپتاسىپ كەلە جاتقانىن, پاندەميا ادامداردى وسى داعدىدان جاڭىلدىرعانىن قىنجىلا ايتتى. ونىڭ قالپىنا كەلۋى ءۇشىن ءبىرشاما ۋاقىت كەرەك ەكەن.
– سوڭعى ەكى جىلدا قالىپتاسقان ادەت بويىنشا ايىنا ەكى مارتە وتباسىمىزبەن كينوتەاترعا بارامىز. ءوزىم باس بولىپ وسى داعدىنى قالىپتاستىرىپ ەدىم. قىزدارىم بىردەن ۇيرەندى. كەلىنشەگىم ارتىق شىعىن عوي دەپ قارسىلىق بىلدىرگەنىمەن, ول دا كوندى. كەيىن «جاقسى فيلمدەر شىعىپتى» دەپ ءوزى ۇسىنىس جاسايتىندى شىعاردى. كادىمگىدەي دەمالىپ قايتامىز. كەشكى ۋاقىتتا اياداي عانا ەكىباستۇزدىڭ كينوتەاترىندا 20-30 ادام وتىرادى. مىنە, كينوتەاتردىڭ ەسىگىن اشپاعالى دا جەتى ايدان اسىپتى. ۇمىتىلا باستاعان داعدىنى قايتا جاڭعىرتار ءسات تۋارىنا سەنەمىن, – دەيدى ەكىباستۇز قالاسىنىڭ تۇرعىنى ەرىك ورالباەۆ.
نارىققا كورەيا كەلە مە؟
قاۋىمداستىق پرەزيدەنتىنىڭ ايتۋىنشا, جەتى ايلىق ءۇزىلىس نارىقتى بەس جىل بۇرىنعى دەڭگەيگە دەيىن تومەندەتىپ جىبەرگەن.
– قازىرگى احۋالعا قاراپ-اق جاقىن بولاشاقتا بۇل نارىققا جاڭا ينۆەستورلار مەن ويىنشىلاردىڭ كەلمەيتىنىن بولجاۋعا بولادى. جاڭا تەحنولوگيالار ەنگىزىلۋى دە كادىك. ويتكەنى كينوتەاتر تاۋەكەلگە تولى بيزنەس ەكەنىن انىق بايقاتتى. البەتتە, ءاۋ باستا جوسپارلانعان جوبالار قالايدا جۇزەگە اسىرىلادى. ال جاڭا جوبالار تۋرالى اڭگىمە قوزعاۋدىڭ ءوزى ارتىق سەكىلدى. ونىڭ ۇستىنە كەيبىر كينوتەاترلاردىڭ قارجى تاپشىلىعىنا بايلانىستى جابىلاتىنى قازىردەن بەلگىلى, – دەدى ول.
CINEMAX-تىڭ باس ديرەكتورى ب.بيسيمباەۆتىڭ ايتۋىنشا, قازاقستاندا قالىپتاسقان احۋالدى شەتەلدىك ويىنشىلار ءتيىمدى پايدالانۋى مۇمكىن.
– بىلتىردىڭ وزىندە وڭتۇستىك كورەيا ينۆەستورلارى قازاقستانعا قىزىعۋشىلىق تانىتا باستادى. ال قازىر ولاردىڭ بىزدەگى كينوتەاترلاردى تيىن-تەبەنگە ساتىپ الۋعا مۇمكىندىگى بار. ارينە, بۇل يندۋستريا ءۇشىن جاقسى قادام ەمەس. ويتكەنى وتاندىق ءوندىرىس اۋىر سوققى الادى. سوندىقتان مەملەكەت پايىزسىز نەسيە بەرسە دەيمىز, – دەدى ول.
جەتى كينوتەاتر جابىلدى
دەرەكتەرگە سۇيەنسەك, قازاقستاندا 92 كينوتەاتر بار. بۇل نارىقتا 5-6 مىڭ ادام ەڭبەك ەتەدى. بەلگىلى بولعانداي, قازىردىڭ وزىندە 7 كينوتەاتر جۇمىسىن توقتاتقان. اتاپ ايتقاندا, الماتى, جاڭاوزەن قالالارىنداعى جانە شىعىس قازاقستان وبلىسىنداعى كينوتەاترلار جابىلىپ قالعان. نەگىزىنەن جەلىلەرى جوق كىشىگىرىم كينوتەاترلار قاۋىپتى ايماقتا تۇر.
– كينو – ونەر مەن بيزنەستىڭ سينتەزى. ەگەر نارىقتا جەلىلەرى بار ءىرى كومپانيالار ۇستەمدىك ەتسە, كىشى ويىنشىلار قۇردىمعا كەتەدى. ال بۇگىندە وتاندىق نارىقتىڭ جارتىسىن ءدال وسى كىشىگىرىم كينوتەاترلار قۇرايدى. بۇلاردىڭ دا ءوز قىزىعى بار, ارينە. سوندىقتان بۇگىنگىدەي الماعايىپ كەزەڭدە ءىرى ويىنشىلار عانا قيىندىققا شىداس بەرەدى. الماتى مەن نۇر-سۇلتانداعى كىشىگىرىم كينوتەاترلار پاندەمياعا دەيىن دە قالت-قۇلت ەتىپ جۇرگەن ەدى, – دەيدى م.ياگۋدينا.
Chaplin Cinemas كينوتەاترلار جەلىسىنىڭ كوممەرتسيالىق ديرەكتورى دميتري كيريەنكونىڭ ايتۋىنشا, وتاندىق نارىقتى داعدارىس شىرماعاندىقتان, قىزمەتكەرلەر امالى جوقتىقتان باسقا جۇمىس ىزدەۋدە.
– جىلدار بويى ىرىكتەلىپ, جيناقتالعان كوماندادان ايىرىلعالى تۇرمىز, – دەيدى ول.
قاۋىمداستىق ءتيىستى مەملەكەتتىك ورگاندارعا كومەك سۇراپ حات جازعان. بىراق ازىرشە ودان ناتيجە بولماي تۇر.
– كينوتەاترلار جۇمىسقا قايتا كىرىسكەن سوڭ, سالىق ۇستاۋدى جەڭىلدەتسە دەيمىز. ەكونوميكانىڭ ەلەۋسىز عانا بولىگى بولعاندىقتان, ءبىزدىڭ ۇنىمىزگە قۇلاق اسقان ەشكىم جوق. راس, بىزگە نەسيەنى تولەۋ مىندەتتەمەسىن كەيىنگە قالدىرۋ جەڭىلدىگى بەرىلدى. الايدا باسقا دا شىعىندار بار. اشىلعان كۇننىڭ وزىندە زالدى تولتىرۋدىڭ ءوزى قيىنعا سوعادى. تيىسىنشە, سەانستاردىڭ سانى دا از بولادى. بىردەن مول پايداعا كەنەلەمىز دەگەن وي جوق. ازىرشە سالاداعى كادرلار مەن كورەرمەندەردى ساقتاپ قالا الساق, سونىڭ ءوزى ۇلكەن ولجا بولماق, – دەيدى م.ياگۋدينا.
ەسكە سالا كەتەيىك, وسى جازدا قازاقستان كينوتەاتر يەلەرى قاۋىمداستىعى قۇرىلعان بولاتىن. وعان ەلىمىزدىڭ 14 قالاسىنداعى 30-دان استام كينوتەاتر مۇشە. ماقسات – وتاندىق كينوتەاترلاردى قولداۋ, دامىتۋ جانە ورتاق ماسەلەلەردى بىرلەسىپ شەشۋ. ولاردىڭ بيىل قيىندىقپەن بەتپە-بەت كەلىپ, تيتىقتاۋى ءبىر تۋدىڭ استىنا جينالۋعا تۇرتكى بولدى.
ايتپاقشى, وسى جازدا ءتارتىپ ساقشىلارى پاۆلودار قالاسىندا تۇرعىن ءۇيدىڭ ىشىندە زاڭسىز جۇمىس ىستەپ تۇرعان كينوتەاتردى اشكەرەلەگەن ەدى عوي. كارانتيننىڭ كۇيىپ تۇرعان شاعىندا جۇمىسىن جالعاستىرعان كينوتەاترعا قاتىستى كەلەڭسىز جاعداي وزگەلەرگە ساباق بولعان سەكىلدى. وسىدان كەيىن بۇل سالاعا قاتىستى زاڭبۇزۋشىلىقتار تىركەلمەگەن.
كينوتەاتردىڭ اشىلعانىن كورەرمەندەر دە, يەلەرى دە كۇتىپ ءجۇر. سارىلا كۇتكەن تاعى ءبىر توپ بار. ول – ساۋدا, ويىن-ساۋىق ورتالىقتارىنىڭ وكىلدەرى. سەبەبى كينوتەاتر ەل قازىناسىنان بولەك, ءدال وسىنداي ورتالىقتاردى دا شومىشتەن قاعىپ وتىر. ولار ءۇشىن كينوتەاتر «زاكىرلىك» جوبا. ويتكەنى كەلۋشىلەردىڭ دەنى سونىڭ اينالاسىندا توپتاسادى. كوروناۆيرۋس ينفەكتسياسىن تاراتپاۋ جونىندەگى ۆەدومستۆوارالىق كوميسسيانىڭ كينوتەاترلاردىڭ جۇمىسىنا رۇقسات بەرمەۋىنىڭ ءبىر سىرى وسىندا جاتقان سىڭايلى.
