العاش تارتقانى جانتورەنىڭ «شالقىماسى». بويىنداعى تالابىن انىق باعامداعان ۇستازى, مارقۇم ماناربەك بەكسەيىتوۆتەن قالعان مۇرا. ومىرىنە سەرىك بولىپ, ونەرىنە شاپاعات بولىپ وزىمەن بىرگە عۇمىر كەشىپ كەلەدى. كۇي سازىن كوكىرەگىنە قۇيعان ۇلاعاتتى ۇستاز تاريحىن قوسا بايانداعان. اقباس تولقىندارىن اسپانعا اتقان جايىق وزەنى. قوس قاپتالى سىڭسىعان ەل. كوكورايلى كوكتەم كەلىپ, جۇرت جادىراپ, ەل جاڭارىپ جاتقان ۋاقىتتا اۋىل-ايماق مىڭعىرعان ءتورت ت ۇلىك مالىمەن جايىقتىڭ ارعى بەتىنە وتپەك. جازعى جايلاۋعا. سونداي ءبىر ماسايراي مامىرلاعان, تۇمسا تابيعات جاڭارىپ-جاسارعان شاق ەكەن. جايىق وزەنىنىڭ جاعاسى ماڭىراعان قوزىنىڭ, كىسىنەگەن ق ۇلىننىڭ, بوزداعان بوتانىڭ ۇنىنە تولىپتى. كەڭ دالانى كەرنەگەن, قۇلاققا سونشالىقتى سۇيكىمدى جاڭاعى ۇنگە جۇيرىك, جورعا مىنگەن جىگىت-جەلەڭنىڭ, قىز-كەلىنشەكتىڭ سىڭعىرلاعان كۇلكىسىن قوسىڭىز. دالاداعى ءجۇز سان قۇس تا كومەيىنە كۇي تولتىرىپ, قۇيقىلجىتا جىرلايدى. جالپاق جوننىڭ ءسانى مەن سالتاناتىن ايتاتىن ءتارىزدى, ادەمى شاقتىڭ اسەرىن ءبىر-بىرىنەن اسىرا تولعايتىن ىسپەتتى. قانداي عاجاپ مىنا شاق, نەتكەن سۇلۋلىق, اجارلى ادەمىلىك ەدى!..
دالانىڭ ءوزى مىڭ سان دىبىسپەن تەبىرەنە تولعانىپ, تاماشا كۇي شەرتىپ تۇرعانداي. بەيبىت ءومىردىڭ بەرەكەسى, ساۋلەتتى شاقتىڭ سىبىزعىنىڭ داۋىسىنداي بولىپ تولعانعان ساۋمال ءۇنى. كوكتەمدە قالىڭ ەل جايىقتىڭ ارعى بەتىنە وتكەن. ەلدىڭ يگى جاقسىلارى جانتورەنىڭ اۋىلىنا جينالىپتى. بيىك جاردىڭ باسىنا قالى كىلەم مەن ويۋلى تەكەمەتتەر توسەلگەن. جاسىنان وتە زەرەك, سوزگە ۇستا, ون ساۋساعىنان كۇي سورعالاعان جانتورە جاڭا ءبىر سازدى اۋەندى تولعاسا كەرەك. ەستىگەن جاننىڭ جان دۇنيەسىن شاتتىق بيلەگەن. جالاۋلى جاسىل دۇنيەنىڭ جان تەبىرەنتەر قىزىعىنا ەلىتىپ, قورعاسىنداي بالقىسا كەرەك. شىرايلى دا شۇرايلى, كوكىرەكتەگى بۇيىعىپ جاتقان بۇلا سەزىمدەردى شىمىرلاعان نازىك دىبىستارمەن وياتىپ الىپ, ومىردە عاشىق ەتەتىن عاجايىپ اۋەن.
وسى كۇي ءومىر بويى جانىن تەبىرەنتىپ كەلەدى. ءوزىن عانا ەمەس, شاكىرتتەرىن دە. ولار دا ۇلتىمىزدىڭ كيەلى اسپابىن ناسيحاتتاپ ءجۇر. قۇرمەتبەك نۇرعيسا, مارات جايناعان, دوسجان ەركىن قازاق ۇلتتىق ونەر ۋنيۆەرسيتەتىن دومبىرا كلاسى بويىنشا ءبىتىرىپ, ەندى وزدەرى شاكىرت تاربيەلەۋدە.
– 2011 جىلدان باستاپ اقان سەرى اتىنداعى مادەنيەت كوللەدجىندە جۇمىس ىستەپ ءجۇرمىن. ءبىر قۋانىشتىسى, دارىندى, تالانتتى بالالار وتە كوپ. كوللەدجدە دومبىرا ءپان رەتىندە تەرەڭدەتىلىپ وقىتىلادى. ۇلتتىق ونەرگە ايرىقشا ءمان بەرىلگەندىكتەن, – دەيدى باقتىگۇل سەرىكبايقىزى, – دومبىرامەن قوسا, اسپاپتاندىرۋ پانىنەن ساباق بەرەمىن. ءبىلىم الۋشىلارعا شىعارمانى انسامبلگە, وركەسترگە لايىقتاپ پارتيتۋرا جاساۋعا باۋليمىز. فورتەپيانو, قوبىز, گيتارا اسپاپتارىنىڭ سۇيەمەلدەۋىمەن «سىعان سەرەناداسى», «سەنىم شىراعى» اندەرىن دايىنداپ, وبلىستىق دەڭگەيدە وتەتىن مەرەكەلىك كونتسەرتتەرگە ۇزبەي قاتىسىپ كەلەمىز.
شىعارماشىل جاستاردىڭ باسىن قۇراعان «نازىك سەزىم» ءانسامبلى كوكشەلىك ونەرسۇيەر قاۋىمنىڭ قۇرمەتىنە بولەنگەن. وبلىستىق «ەكى جۇلدىز» جوباسىندا قاتارىنان ەكى رەت باس جۇلدەگە يە بولدى. قالالىق ونلاين كونكۋرستارعا دا بەلسەنە قاتىسىپ, جۇلدەلى ورىندارعا يە بولعان.
«شالقىمانىڭ» ادام بويىن قورعاسىنداي بالقىتار شۇعىلالى شۋاعى ەسىپ تۇراتىن شاڭىراقتا شاتتىق از ەمەس. قىزى ماقپال قازاق ۇلتتىق ونەر ۋنيۆەرسيتەتىنىڭ فورتەپيانو كلاسىن اياقتاپ, ماسكەۋدەگى مەملەكەتتىك ونەر جانە مادەنيەت ۋنيۆەرسيتەتىندە «مادەنيەتتانۋشى» ماماندىعىن العان. ەكىنشى قىزى نۇرگۇل وبلىستىق فيلارمونيانىڭ ءانشىسى, بالاسى ولجاس تا مۋزىكالىق كوللەدجدە دومبىرا كلاسىندا وقيدى. كىشكەنتاي قىزى ايشا – «گاككۋ» بي انسامبلىندە.
ۇلاعاتتى ۇستازدىڭ ءوزى بولسا, ۇرپاعىنىڭ مۋزىكا الەمىنە عاشىق بولۋ بەسىكتە جاتقاندا داڭقتى كۇيشى جانتورەنىڭ «شالقىماسىمەن» ۋانعانىنان دەيدى. بالكىم سولاي بولۋى دا...
كوكشەتاۋ
