– باستاپقىدا بۇل ۇجىم مۋزىكالىق توپ رەتىندە قۇرىلماعان ەكەن. ءبىر توپ جىگىت جاي عانا جينالىپ, اسپاپتاردا ويناپ, مۋزىكامەن اۋەستەنەتىن دوستار بولعان. ولار كاسىبي مۋزىكانت بولامىز دەپ ويلاماسا كەرەك, ءبارىن تاعدىر ايداپ, ءبىر ارناعا توعىستىرىپتى. سونىمەن بىرگە بۇل فيلمدە دوستىقتىڭ قالاي تۋىنداعانى, كەيىننەن, وكىنىشكە قاراي, قيماس دوستاردىڭ جىگى قالاي اجىراپ قالعانى تۋرالى اڭگىمەلەنەدى. ۇلكەن شىعارماشىلىق ۇجىمداردا كەلىسپەۋشىلىكتەر بولىپ تۇراتىنى ەشكىمگە قۇپيا ەمەس. ءبىز كەيىپكەرلەرىمىزدىڭ دوستىعىنا نە ارقاۋ بولعانىن, توپ ىشىندەگى كەلىسپەۋشىلىكتەر نەدەن تۋىنداعانىن جانە ولاردىڭ بۇگىن نە ويلايتىنىن كورسەتكىمىز كەلەدى. جالپى العاندا, ءبىز جاس ستۋدەنتتەردىڭ جاي عانا شىعارماشىلىق اۋەستىگىنىڭ كەلە-كەلە اتى اڭىزعا اينالعان ۇلكەن شىعارماشىلىق توپقا اينالۋى تاريحىن بايانداعىمىز كەلىپ وتىر, – دەيدى بولاشاق كوركەم ءفيلمنىڭ قويۋشىلارى.
ادەتتە كوزى ءتىرى مۇنداي تۇلعالار ءومىرى دەرەكتى فيلم جانرىندا ءتۇسىرىلىپ جاتاتىنى بەلگىلى. سوندىقتان بۇل شىنايى ومىرباياندىق فيلم بولا ما, الدە رەجيسسەر از-كەم قيالداپ, ومىردە بولعان وقيعالاردى قۇبىلتا ما دەيتىنگە كەلسەك, ءدال قازىرگە شىعارماشىلىق توپتىڭ تۇپكىلىكتى ۇستانىمى جوق. بىراق كارتينانىڭ بوياماسىز بولاتىندىعىنا سەنەدى.
– پروديۋسەرىمىزبەن بىرگە وسى توپ جايلى بۇرىن جازىلعان كىتاپتاردى نەگىزگە الدىق. ولاردىڭ ءبىرىنىڭ اۆتورى – ءانسامبلدىڭ العاشقى كوركەمدىك جەتەكشىسى دوسىم سۇلەەۆتىڭ جان جارى. ايتا كەتەر جايت, «دوس-مۇقاسان» توبىنىڭ العاشقى شلياگەرلەرىنىڭ اۆتورى دوسىمنىڭ ءوزى ءبىزدىڭ كەڭەسشىمىز بولىپ, وتە قاتتى اسىرەلەپ, بولماعاندى بولعان دەپ قويماۋىمىزدى قاداعالاپ وتىردى. ءبىزدىڭ ەكىنشى كەڭەسشىمىز, ماڭىزدىلىعى ودان كەم تۇسپەيتىن ادام – مۇرات قۇسايىنوۆ – توپتىڭ قازىرگى كوركەمدىك جەتەكشىسى, ونىمەن دە كەزدەسىپ, اڭگىمەلەستىك. سۇلەەۆ تە, قۇسايىنوۆ تا بىزگە ۇجىمنىڭ تاريحىن ايتىپ بەردى جانە ولاردىڭ بايانداعان اڭگىمەلەرى ءبىر-بىرىنەن اسا الشاق بولمادى. سونداي-اق «دوس-مۇقاسان» كومپوزيتسيالارىنىڭ اۆتورلارىن دا سوزگە تارتتىق, ولار اندەردىڭ شىعۋ تاريحىن اڭگىمەلەپ بەردى. ويتكەنى حالىق اراسىندا بۇل تاقىرىپتا ويدان شىعارىلعان ءتۇرلى اڭگىمەلەر از ەمەس, – دەيدى كارتينا رەجيسسەرى.
ايدىن ساحاماننىڭ ايتۋىنشا, وكىنىشكە قاراي, مۇراعاتتا «دوس-مۇقاسان» كونتسەرتتەرىنىڭ بەينەجازبالارى وتە از. كوپتەگەن بەينەبايان, دەرەكتى مۋزىكالىق فيلم بار, بىراق كونتسەرتتەرى جوق بولىپ شىققان.
ءتۇسىرۋ توبى ءدال وسى كۇندەرى ءفيلمدى شىعارۋدىڭ قاي كەزەڭىندە تۇرعانىنا كەلسەك, بۇل جاي عانا ويىن ءفيلمى ەمەس, مۋزىكالىق فيلم بولعاندىقتان, ستسەناري ءالى دە پىسىقتالۋدا. مۇندا مۋزىكالىق ەرەكشەلىك بارشىلىق, اتاپ ايتساق, اۋىساتىن جەرلەرى دە كوپ, قاي كومپوزيتسيا قاي جەردە تۇرۋى ءتيىس, ول دراماتۋرگيا تۇرعىسىنان جاقسى قۇرىلدى ما دەگەن سياقتى ماسەلەلەرگە كوڭىل ءبولىنىپ وتىر.
– ءبىز قازىر كوپ نارسەگە تالداۋ جاساپ, دۇرىس شەشىم تابۋعا تىرىسىپ جاتىرمىز. ءوندىرىس جاعىنا كەلەر بولساق, كارانتين شەكتەۋىنەن كەيىن ءبىرىنشى رەت باس قوسقاندا ءبىز پروديۋسەرمەن بىرگە وسكەمەن, قاراعاندى, تەمىرتاۋ قالالارىنا ءتۇسىرىلىم جاساۋ ورىندارىن ىزدەۋگە باردىق. ءبىزدىڭ ءفيلمنىڭ وقيعاسى 60-70-جىلدارى ورىن العان, ال الماتىدا جاڭا عيماراتتار وتە كوپ بولعاندىقتان, ءبىز سول جىلدارداعىداي كورىنىستەردى وزگە وڭىرلەردەن ىزدەپ ءجۇرمىز, – دەيدى رەجيسسەر.
ال ەندى اڭىز بولعان اۋەسقوي مۋزىكانتتاردىڭ رولدەرىن كىمدەر سومدايدى؟ قازىرگى شىعارماشىلىق توپ مۇنى ەگجەي-تەگجەيلى ايتا الماسا دا, بىراق اشىق كاستينگ جاساۋدى جوسپارلاپ وتىر.
– ءبىز كەيىپكەرلەرمەن, ولاردىڭ جاس ەرەكشەلىكتەرىمەن پورترەتتىك ۇقساستىق تابۋعا ءتيىسپىز, بىرنەشە ۋاقىت كەزەڭىن قامتىپ كورسەتۋىمىز كەرەك. ەڭ باستىسى, ءبىزدىڭ اكتەرلەرىمىز مۋزىكانت بولۋى قاجەت, ولار اسپاپتاردا ويناي ءبىلۋى كەرەك. توپتىڭ ءار مۇشەسىنىڭ بويىنداعى دارىنىن تولىق كورسەتۋگە تالپىنىپ وتىرمىز, ول ءۇشىن, ارينە, فيلمدە وينايتىن اكتەرلەر اسپاپتا ويناي ءبىلۋى كەرەك. ەگەر اكتەر پورترەتتىك تۇرعىدان سايكەس كەلەتىن بولسا, ءبىز وعان بەلگىلى ءبىر اسپاپتا ويناۋدى ارنايى ۇيرەتەتىن بولامىز, – دەدى كينوجوبا رەجيسسەرى ايدىن ساحامان.
الماتى
