بيىل بايقاۋعا ەلىمىز بويىنشا 143 مۇعالىم قاتىستى. جەڭىپ شىققان 64 ۇستازدىڭ ارقايسىسىنا "ۇزدىك پەداگوگ" توسبەلگىسى مەن 2 788 000 تەڭگە (1000 اەك) كولەمىندە سىياقى تابىستالدى.
سالتاناتتى ءىس-شارادا مينيستر اسحات ايماعامبەتوۆ قازىرگى جاعدايدا ايانباي ەڭبەك ەتىپ جۇرگەن بارشا مۇعالىمدەرگە العىسىن ءبىلدىردى. سونداي-اق مەملەكەت تاراپىنان ءبىلىم بەرۋ سالاسىنا ۇلكەن كوڭىل ءبولىنىپ جاتقانىن دا تىلگە تيەك ەتتى.
"ەلباسى نۇرسۇلتان نازارباەۆتىڭ باستاماسىمەن ءبىلىم سالاسىن دامىتۋ باعىتىندا ايتارلىقتاي جەتىستىكتەرگە قول جەتكىزدىك. مەملەكەت باسشىسى قاسىم-جومارت توقاەۆ ءبىلىم سالاسىنا ەرەكشە نازار اۋدارىپ, جۋىرداعى جولداۋىندا دا وسى ماسەلەگە ۇلكەن كوڭىل ءبولدى. "ۇستاز مارتەبەسى تۋرالى" زاڭ قابىلدانعانىن بىلەسىزدەر. زاڭ شەڭبەرىندە 70-تەن اسا ءتۇرلى بۇيرىق, قاۋلى بەكىتىلىپ, ىسكە اسىرىلىپ جاتىر. مەملەكەت باسشىسىنىڭ تاپسىرماسىمەن بيىل قاڭتاردان باستاپ مۇعالىمدەردىڭ جالاقىسى 25%-عا ءوستى. الداعى جىلى تاعى 25 پايىزعا كوتەرىلەدى. پرەزيدەنت وسىنداي تاپسىرما بەردى جانە ونى ءبىز ورىنداپ جاتىرمىز. بۇگىنگى تاڭدا ۇستازدارىمىز ءۇشىن ءتيىستى جاعداي جاساۋدى جالعاستىرۋىمىز كەرەك", – دەدى مينيستر.
سونداي-اق اسحات ايماعامبەتوۆ پەداگوگيكالىق ماماندىقتار بويىنشا ءبىلىم الىپ جاتقان بولاشاق ۇستازداردىڭ شاكىرتاقىسى دا ايتارلىقتاي كوتەرىلگەنىنە نازار اۋداردى. 1 قىركۇيەكتەن باستاپ ولاردىڭ ستيپەندياسى 26 مىڭ تەڭگەدەن 42 مىڭ تەڭگەگە دەيىن ءوستى. ايتا كەتەيىك, بيىل مۇعالىم بولۋ ءۇشىن وقۋعا تۇسكەن ازاماتتارعا قويىلاتىن تالاپتار دا كۇشەيتىلدى: شەكتىك بالل 50-دەن 70-كە دەيىن كوتەرىلدى.
"ۇزدىك پەداگوگ" اتانعان جەڭىمپاز مۇعالىمدەردىڭ ءبىرى, اتىراۋ وبلىستىق ء«بىلىم-يننوۆاتسيا» مەكتەپ-ينتەرناتىنىڭ فيزيكا ءپانىنىڭ مۇعالىمى, ارنۇر قازىبەكوۆ تە شارا بارىسىندا ارىپتەستەرىنە جىلى لەبىزىن ارناپ, مۇعالىم ماماندىعىن جۇرەك قالاۋىمەن تاڭداۋ قاجەت ەكەنىن اتاپ ءوتتى.
"وسىدان 10 جىل بۇرىن مەن مەكتەپ قابىرعاسىندا جۇرگەن وقۋشى ەدىم. فيزيكانى تەرەڭدەتىپ وقىپ, ءتۇرلى وليمپيادالارعا قاتىسىپ, جۇلدەلى ورىندارعا يە بولدىم. كۇردەلى ەسەپتەردى ءبىر-بىرىمىزگە, تومەنگى سىنىپ وقۋشىلارىنا تۇسىندىرەتىن ەدىك. مىنە, سول كەزدەن-اق مەن ساباق بەرۋ, مۇعالىم بولۋ ءوزىمنىڭ ومىرلىك جولىم ەكەنىن ءتۇسىندىم. جاستاردى عىلىمعا, ءبىلىم الۋعا باۋلۋ قازىرگى زاماندا وتە وزەكتى ماسەلە دەپ ويلايمىن. مەملەكەت باسشىسى بىرىڭعاي وقۋ پلاتفورماسىن دايىنداۋدى تاپسىرىپ ەدى. بۇل تاپسىرما ەلىمىزدىڭ يننوۆاتسيالىق پەداگوگتەرىنىڭ ۇيىمداستىرۋىمىن جۇزەگە اسادى دەپ سەنەمىن. مەن ءاردايىم جانىمنان تابىلاتىن وتباسىما, اقىلىن ايامايتىن ارىپتەستەرىمە العىس بىلدىرەمىن. پەداگوگ مارتەبەسى – ۇستازداردىڭ ءوز قولىندا. مەن مەكتەپتى "التىن بەلگىگە" ءبىتىرىپ, مۇعالىم بولامىن دەگەن كەزدە بارلىعى بۇل شەشىمىمەتاڭ بولدى. بىراق اتام "بالام, قانداي ماماندىق يەسى بولعىڭ كەلسەن, سونى تاڭدا. ويتكەنى ءومىر بويى سول ماماندىقتىڭ ارتىنان جۇرەسىڭ" دەپ ايتقان بولاتىن", – دەدى ۇستاز.
ايتا كەتەيىك, "پەداگوگ مارتەبەسى تۋرالى" زاڭنىڭ 8-بابىنىڭ 6-تارماعىنا سايكەس جەرگىلىكتى اتقارۋشى ورگاندار پەداگوگتەرگە رەسپۋبليكالىق بيۋدجەت تۋرالى زاڭدا بەلگىلەنگەن جانە ءتيىستى قارجى جىلىنىڭ 1 قاڭتارىنا قولدانىستا بولاتىن ايلىق ەسەپتىك كورسەتكىشتىڭ كەمىندە 300 اەك مولشەرىندە سىياقى تۇرىندە قوسىمشا ىنتالاندىرۋ تولەمدەرىن بەلگىلەۋگە قۇقىلى. ال سول زاڭنىڭ 9-بابىنىڭ 4-تارماعىنا سايكەس اكىمدىكتەر بىرجولعى سىياقى تولەي وتىرىپ نەمەسە ونسىز, جەرگىلىكتى ەرەكشەلىك بەلگىلەرى مەن قۇرمەتتى اتاقتاردى تاعايىنداۋ جانە ىنتالاندىرۋدىڭ وزگە دە نىساندارى ارقىلى, ونىڭ ىشىندە قازاقستان رەسپۋبليكاسىندا بەلگىلەنگەن مەرەكەلىك كۇندەرگە وراي پەداگوگتەردى كوتەرمەلەۋدىڭ قوسىمشا شارالارىن بەلگىلەي الادى.
ياعني بۇگىن ەلىمىز بويىنشا مۇعالىمدەر جەرگىلىكتى اكىمدىكتەر تاراپىنان قوسىمشا سىياقىلار, سىيلىقتار الىپ جاتىر. اكىمدىكتەر تاراپىنان كورسەتىلگەن قولداۋ جايلى اقپاراتتى جەرگىلىكتى اتقارۋشى ورگانداردىڭ رەسمي ينتەرنەت-رەسۋرستارىن تابا الاسىزدار.
