«جەل تۇرماسا ءشوپتىڭ باسى ءبىزدىڭ جاقتا قيمىلدامايدى». 2017 جىلى شىعىس قازاقستان وبلىستىق ءماسليحاتىنىڭ حاتشىسى ۆلاديمير گولوۆاتيۋك رەسەيدىڭ ازاماتى ەكەن دەگەن اقپارات الەۋمەتتىك جەلىدە جەلدەي ەسكەن.
سايتتاردىڭ بىرىندە جاريالانعان ماقالادا «1998 جىلدىڭ 12 تامىزىندا گولوۆاتيۋك ۆلاديمير ميحايلوۆيچ ەسىمدى ازامات رەسەي فەدەراتسياسىنىڭ «ازاماتتىق تۋرالى» زاڭىنىڭ 3-بابىنىڭ نەگىزىندە استاناداعى رەسەي ەلشىلىگىنىڭ كونسۋلدىعىندا رەسەي ازاماتتىعىن الادى. تيىسىنشە, تولقۇجات راسىمدەمەگەن, تەك وزگە ەلدىڭ ازاماتتىعىن العان. سويتە تۇرا قازاقستان ازاماتتىعىنان باس تارتپاعان» دەپ جازىلعان.
ماقالا شىقتى. ۇلارداي شۋلادى ەل. سونىمەن قوش, ەشكىمنىڭ مۇرتىن بالتا شاپپادى. جابۋلى قازان جابۋلى كۇيىندە قالدى. ال ۆ.گولوۆاتيۋك ءالى كۇنگە دەيىن وبلىستىق ءماسليحاتتىڭ حاتشىسى. دەمەك, رەسەي ازاماتى وبلىستىڭ بيلىگىنە ارالاسىپ وتىر. الدە ءماسليحات جۇمىسىنىڭ مەملەكەتكە, مەملەكەتتىك قىزمەتكە قاتىسى جوق پا ەدى؟ كىم بىلەدى, ۆلاديمير ميحايلوۆيچ كەيىن رەسەي ازاماتتىعىنان باس تارتقان دا شىعار. باس تارتىپ, قازاق ەلى ءۇشىن جانىن بەرىپ ەڭبەك ەتىپ جۇرسە يگى عوي...
بيىل دا «جەرگىلىكتى جەردەگى ءباسپاسوز بيلىگى كىمدەردىڭ قولىندا؟», «شەتەلدىك ازامات شىعىس قازاقستان وبلىسىن قولىندا ۇستاپ كەلەدى» دەگەن ماقالالار جەلىنى شۋلاتتى. ماقالا شىققانىمەن, رەسمي وكىلدەر حالىققا ءلام-ميم دەپ اۋىز اشپادى. كىمنىڭ كىم ەكەنىن اشىپ ايتۋ كەرەك ەدى.
«جەرگىلىكتى جەردەگى ءباسپاسوز بيلىگى كىمدەردىڭ قولىندا؟» اتتى ماقالادا «قازاقتان باسقا ۇلت وكىلدەرى, اسىرەسە ورىستار ءجيى قونىستانعان, رەسەيمەن شەكارالاس شىعىس قازاقستان وبلىسىنىڭ يدەولوگيالىق جانە ىشكى ساياسات ماسەلەسىنە يگور زاۆگورودني دەگەن شەتەلدىك ازامات ء(بىر دەرەكتەر بويىنشا ۋكراينادان كەلگەن) «كوزگە كورىنبەي» جەتەكشىلىك ەتۋدە» دەپ جازعان.
ماقالا اۆتورى ۋكراينادان كەلگەن دەپ جاقشاعا الىپتى. ال زاۆگورودنيدىڭ قولىمىزدا بار تولقۇجاتىنىڭ كوشىرمەسىنە ۇڭىلسەك, «ۋكراىنا, م.دنىپروپەتروۆسك» دەپ كورسەتىلگەن. ال كەرەك بولسا, ۋكراينا ازاماتى شىعىستىڭ, ۇلتتىڭ يدەولوگياسىنا ارالاسىپ وتىر. قىزمەتىن «جاسىرىن» اتقاراتىندىقتان, ءدال قازىرگى ۋاقىتتا ونىڭ اتتان تۇسكەن-تۇسپەگەنىن ءدوپ باسىپ ايتۋ قيىن.
قالاي دەگەنمەن, مەملەكەتتىڭ ىشكى ساياساتىنا, يدەولوگياسىنا جات ەلدىڭ ازاماتىن ارالاستىرۋ اقىلعا قونبايدى. تۇپتەپ كەلگەندە قازاقتىڭ تىلىنە, دىلىنە, دىنىنە قازاقتىڭ عانا جانى اشيدى. شەتەلدىڭ ازاماتى شە, قازاق حالقىنىڭ مۇددەسى ءۇشىن ەڭبەك ەتەدى دەيسىز بە؟
شىعىس قازاقستان وبلىسى
