شارۋالاردىڭ ايتۋىنشا ءبىر عانا بايكەنجە اۋىلدىق وكرۋگىندە 200-دەي جىلقى اۋىرىپ ولگەن, ال اۋدان بويىنشا دەرتتەن قىرىلعان ت ۇلىك سانى 400-دەن اسادى. جەرگىلىكتى تۇرعىندار ۆەتەرينارلار كەڭەسىمەن مالعا ءدارى ەگىپ تە, بەرىپ تە كورىپتى. بىراق ودان دا قايران بولماي تۇر. امالى تاۋسىلعان اۋىلداعىلار ەندى شىعىندارىنىڭ وتەلۋىن سۇراپ وتىر.
وسى ماسەلەگە بايلانىستى وڭىرلىك كوممۋنيكاتسيالار قىزمەتىندە وبلىستىق ۆەتەريناريا باسقارماسىنىڭ باسشىسى ەرسۇلتان اپەتوۆ پەن ۆەتەرينارلىق باقىلاۋ جانە قاداعالاۋ كوميتەتىنىڭ اۋماقتىق ينسپەكتسيا باسشىسى جاندوۆ سارسەنباەۆ باق وكىلدەرىنە ارناپ بريفينگ وتكىزدى.
وبلىستىق ۆەتەريناريا باسقارماسىنىڭ باسشىسى جەرگىلىكتى ۆەتەريناريالىق دارىگەرلەر اۋرۋ وشاعىندا بولعانىن, بەلگىسىز دەرتتىڭ بەلگىلەرىنە قاراپ, "جىلقى گاستروفيلەزى" بولجامدى دياگنوزى قويىلعانىن اتاپ ءوتتى. اۋداندىق ۆەتەريناريالىق زەرتحانادا بۇل دياگنوز ناقتىلانعان. وسىلايشا ءتورت اۋىلدىڭ جىلقىسىنا تونگەن قاتەر كادىمگى بوگەلەكتەن شىققانى بەلگىلى بولدى.
"ۆەتەرينارلاردىڭ انىقتاۋى بويىنشا ناقتى ولگەن جىلقىنىڭ سانى 29 باس. اۋىرعان 94 جىلقىنىڭ الپىس ءۇشىن مال دارىگەرلەرى ەمدەپ جازىپ الدى. سوندىقتان, دا جۇزدەگەن مال شىعىن بولدى دەگەن دەرەك ورىنسىز. بۇل اۋرۋ پارازيتارلىق اۋرۋلارعا جاتاتىندىقتان, اۋرۋعا قارسى ۆەتەريناريالىق ءىس-شارالار مال يەسىنىڭ ءوز قاراجاتى ەسەبىنەن جۇرگىزىلەدى. جىلقى گاستروفيلەزى اۋرۋى قازاقستان رەسپۋبليكاسى اۋىل شارۋاشىلىعى ءمينيسترىنىڭ 2014 جىلعى 30 قازانداعى №7-1/559 بۇيرىعىمەن بەكىتىلگەن "جانۋارلاردىڭ جانە ادامنىڭ دەنساۋلىعىنا قاۋىپ توندىرەتىن جانۋارلاردى, جانۋارلاردان الىناتىن ونىمدەر مەن شيكىزاتتى مىندەتتى تۇردە الىپ قويۋ جانە جويۋ جۇرگىزىلەتىن كەزدەگى جانۋارلاردىڭ اسا قاۋىپتى اۋرۋلارىنىڭ" تىزبەسىنە ەنگىزىلمەگەندىكتەن مال يەلەرىنە وتەماقى قاراستىرىلمايدى", - دەدى وبلىستىق ۆەتەريناريا باسقارماسىنىڭ باسشىسى ەرسۇلتان اپەتوۆ.
