قازاقستان • 01 قازان، 2020

"Balapan" الەمى" سەرياسىمەن "مەنىڭ سۇيىكتى كەيىپكەرلەرىم" ەرتەگىلەر جيناعى جارىق كوردى

27 رەت كورسەتىلدى

"Balapan" تەلەارناسىنىڭ 10 جىلدىعىنا وراي "Balapan" الەمى" سەرياسىمەن "مەنىڭ سۇيىكتى كەيىپكەرلەرىم" اتتى ەرتەگىلەر جيناعى جارىققا شىقتى. جيناققا تەلەارنانىڭ ۇزدىك 10 انيماتسيالىق جوباسىنىڭ نەگىزىندە جازىلعان ەرتەگىلەر ەنگىزىلگەن، دەپ حابارلايدى Egemen.kz

"ەلىمىزدەگى تۇڭعىش ءارى جالعىز بالالار ارناسى "Balapan" بيىل 10 جاسقا تولىپ وتىر. تەلەارنا مەرەيتويىنا تارتۋ رەتىندە كىشكەنتاي كورەرمەندەرىمىز ءسۇيىپ كورەتىن 10 ۇزدىك مۋلتحيكايانى ەرتەگىگە اينالدىرىپ، ۇسىنىپ وتىرمىز. بۇل - "Balapan" الەمى" سەرياسىمەن جارىققا شىققان العاشقى كىتاپ. كوگىلدىر ەكراننان جاقسى تانىس كەيىپكەرلەردى بۇلدىرشىندەرىمىز ەرتەگىلەر ەلىندەگى قىزىقتى وقيعالار ارقىلى باسقا قىرىنان تانيتىنى انىق. ەرتەڭگى ەل ازاماتىن تاربيەلەۋدە ءوز قاھارماندىرىمىزدى ۇلگى ەتۋىمىز ءتيىس ەكەنىن ۇنەمى ايتىپ كەلەمىز. وسىنى ەسكەرە كەلە كەيىنگى جىلدارى ارنا ەفيرىنەن وتاندىق انيماتسيالاردى شىعارۋدى قولعا الساق، ەندى ونداعى قاھارمانداردى ەرتەگى كەيىپكەرىنە اينالدىرىپ وتىرمىز.

"Balapan" ارناسىن ءسۇيىپ كورەتىن كورەرمەندەر بۇل كىتاپتى دا قىزىعا وقيتىنىنا سەنىمدىمىز"، دەيدى "قازاقستان" تەلەراديوكورپوراتسياسىنىڭ باسقارما ءتورايىمى ءلاززات تانىسباي.

كىتاپقا "پىراقتار"، "كۇلكى ىزدەگەن كۇنەكەي"، "ەرتەمىر"، "الان مەن قوزىقا"، "دالا ويىندارى"، ء"الي مەن ايا"، "ەرتەگىلەر ەلىنە ساياحات"، "ايدار"، "ەردەن اتانىڭ اڭگىمەلەرى"، "قىزىل مەن كۇلتەگىن" مۋلتحيكايالارىنىڭ ەرتەگى نۇسقاسى توپتاستىرىلدى.

"Balapan" تەلەارناسىنىڭ ديرەكتورى ماقپال جۇمابايدىڭ ايتۋىنشا، ەرتەگىلەر جيناعىن شىعارۋداعى باستى ماقسات - كورەرمەن كوزايىمىنا اينالعان كەيىپكەرلەر مەن قاھارماندار ارقىلى بالالاردى كىتاپ وقۋعا قىزىقتىرا وتىرىپ، كىشكەنتاي وقىرمانداردىڭ كوبەيۋىنە ىقپال ەتۋ جانە بۇل باستاما الداعى ۋاقىتتا دا جالعاسىن تابادى.

"بالاقايلار ەكرانداعى سۇيىكتى كەيىپكەرلەرىمەن كىتاپ بەتتەرىندە قاۋىشىپ، وي-قيالدارىن ۇشتاي تۇسپەك. ىزگىلىككە، وتانسۇيگىشتىككە باۋليتىن، تىلگە جەڭىل بولسا دا تەرەڭ مازمۇندى ەرتەگىلەر بۇلدىرشىندەردى كوركەم دە تارتىمدى يلليۋستراتسياسىمەن دە باۋراپ الادى دەگەن ۇمىتتەمىز. الداعى ۋاقىتتا دا "Balapan" الەمى" سەرياسىمەن تۇراقتى تۇردە كىتاپتار شىعارۋدى ماقسات ەتىپ وتىرمىز"، دەدى ماقپال جۇماباي ءوز سوزىندە.

جيناق الداعى ۋاقىتتا «Balapan» كورەرمەندەرىنە سىيعا تارتىلىپ، وبلىس ورتالىقتارىنداعى كىتاپحانالارعا تاراتىلادى، سونىمەن بىرگە كىتاپ دۇكەندەرىنە ساتىلىمعا شىعارىلادى.

سوڭعى جاڭالىقتار

تارازدان كەلگەن ۇرى ۇستالدى

ايماقتار • بۇگىن، 20:35

زاڭسىز اڭ اۋلاۋ تيىلماي تۇر

ايماقتار • بۇگىن، 17:22

باستاما باياندىلىعىمەن قۇندى

ايماقتار • بۇگىن، 13:56

ۇقساس جاڭالىقتار