كەزدەسۋدىڭ مودەراتورى رەتىندە ۇقسك حاتشىسى ەرلان قارين ءسوز سويلەدى.
مينيسترمەن ونلاين كەزدەسۋگە ۇلتتىق كەڭەستىڭ قاتىسۋشىلارى - زاڭگەر ايگۇل ورىنبەك, «ستراتەگيا» الەۋمەتتىك جانە ساياسي زەرتتەۋلەر ورتالىعىنىڭ پرەزيدەنتى گۇلميرا يلەۋوۆا, جۋرناليست ماكسيم روجين, ەكونوميكالىق ساياسات ينستيتۋتىنىڭ ديرەكتورى قايىربەك ارىستانبەكوۆ, ساياساتتانۋشى ايدوس سارىم, «Media Holding «Atameken Business» جشس باس ديرەكتورى قانات ساحاريانوۆ جانە باسقالار قاتىستى.
اۋىل شارۋاشىلىعى ءمينيسترى ساپارحان وماروۆتىڭ بايانداماسىندا ايتىلعانداي, جالپى اۋىل شارۋاشىلىعى سالاسىندا وڭ قارقىن بايقالىپ وتىر.
سپيكەر كوكتەمگى دالا جۇمىستارىن قارجىلاندىرۋ, ۆەتەريناريا مەن فيتوسانيتاريانى دامىتۋ بويىنشا قابىلدانعان شارالار, اوك ساقتاندىرۋدى دامىتۋ, اگرارلىق عىلىم, اۋىل شارۋاشىلىعى جەرلەرىنە مونيتورينگ جۇرگىزۋ تۋرالى ەگجەي-تەگجەيلى ايتىپ بەردى. بۇل جۇمىستاردىڭ بارلىعى پرەزيدەنت قاسىم-جومارت توقاەۆتىڭ «جاڭا جاعدايداعى قازاقستان: ءىس-قيمىل كەزەڭى» اتتى جولداۋىندا قويىلعان مىندەتتەردى ەسكەرە وتىرىپ جۇرگىزىلەدى.
ۇلتتىق قوعامدىق سەنىم كەڭەسىنىڭ قاتىسۋشىلارى اۋىل شارۋاشىلىعى سالاسىنداعى كەيبىر پروبلەمالىق ماسەلەلەردى قوزعاعان جوق. ءبىرىنشى بولىپ ءوز سۇراعىن زاڭگەر ايگۇل ورىنبەك قويدى. ونى تۇركىستان وبلىسى ماقتاارال اۋدانىنىڭ ماقتا وسىرۋشىلەر ماسەلەسى الاڭداتادى. ولار باعا ماسەلەسىنە قاناعاتتانبايدى.
ساپارحان وماروۆ بۇل ماسەلە نازاردان تىس قالمايتىنىنا سەندىردى. ونىڭ ايتۋىنشا, باعالار ماقتا وڭدەۋمەن اينالىساتىن زاۋىتتارعا بايلانىستى. ولارعا «قاراپايىم زاتتار ەكونوميكاسى» باعدارلاماسى اياسىندا قارجىلاي قولداۋ كورسەتىلدى. ماسەلە جاقىن ارادا شەشىمىن تابۋى ءتيىس.
«ستراتەگيا» الەۋمەتتىك جانە ساياسي زەرتتەۋلەر ورتالىعىنىڭ پرەزيدەنتى گۇلميرا يلەۋوۆا قۇس تۇماۋى تاقىرىبىن كوتەردى.
مينيستر ءوز جاۋابىندا بۇگىنگى تاڭدا جاعدايدىڭ تۇراقتانعانىن ايتتى. سەبەبى, قۇس فابريكالارى قۇس اۋرۋلارىنا قارسى ۆاكتسيناتسيانى 100 پايىزعا جۇرگىزبەگەن جانە قۇستىڭ جاپپاي قىرىلۋ جاعدايلارى تۋرالى كەش حابارلاعان. جاعداي قوستاناي مەن سولتۇستىك قازاقستان وبلىستارىنا قاتىستى. جەرگىلىكتى جەرلەردە اۋىل شارۋاشىلىعى مينيسترلىگى جانىنان قۇرىلعان ارنايى كوميسسيا جۇمىس ىستەيدى. مينيسترلىكتىڭ قورلارىنان قۇس فابريكالارىنا ميلليوننان استام ەكپە دوزاسى جىبەرىلدى, - دەدى مينيستر.
ەكونوميكالىق ساياسات ينستيتۋتىنىڭ ديرەكتورى قايىربەك ارىستانبەكوۆ ەلىمىزدىڭ ەگىس القاپتارىنىڭ نەگىزگى بولىگى بىرنەشە شارۋا قوجالىقتارىنىڭ يەلىگىندە ەكەندىگى تۋرالى دەرەكتەردى كەلتىردى. بۇل ولاردىڭ اراسىندا ادال باسەكەلەستىك جوق دەگەندى بىلدىرەدى.
مينيستر بۇل ماسەلە العاش رەت كوتەرىلىپ وتىرماعانىن اتاپ ءوتتى. قازىر مينيسترلىك بارلىق شارۋا قوجالىقتارىنا بىردەي شارتتار ۇسىنىلاتىن نورماتيۆتەردى ەنگىزۋ بويىنشا جۇمىس ىستەۋدە. الايدا بەلگىلى ءبىر قيىندىقتار بار. س. وماروۆ ۇقسك مۇشەلەرىنىڭ ۇسىنىستارىن تىڭداپ, تالقىلاۋعا دايىن ەكەنىنە سەندىردى.
ساياساتتانۋشى ايدوس سارىم ءوندىرىس پەن اۋىل شارۋاشىلىعى ونىمدەرى مەن قىزمەتتەرىنىڭ شىعىندارىنىڭ ناقتى ەسەبىن بەرۋدى ۇسىندى. تۇرعىندار بۇل سالا تۋرالى ناقتى تۇسىنىك العان بولار ەدى.
كەلەسى سۇراقتى «Media Holding «Atameken Business» جشس باس ديرەكتورى قانات ساحاريانوۆ قويدى.
قىتايعا ەت ەكسپورتتاۋ قۇقىعىن العان اككرەديتتەلگەن كاسىپورىنداردىڭ ءتىزىمىن كەڭەيتۋ ءۇشىن قانداي شارالار قابىلدانىپ جاتىر؟ قىتاي نارىعىنا كىرۋ بولاشاعى قانداي؟ - دەپ سۇرادى ول.
ءمينيستردىڭ ايتۋىنشا, كوروناۆيرۋستىق پاندەمياعا بايلانىستى قازىر قىتايلىق كومپانيالارمەن كەلىسسوزدەر بەينەكونفەرەنتسيا رەجيمىندە جۇرگىزىلۋدە. قازاقستاندىق تاراپ 566 كومپانيانىڭ ماتەريالدارىن قىتاي كومپانيالارىنا جىبەردى, ولاردىڭ 80-ءى قاراستىرىلۋدا.
ونلاين-كەزدەسۋدىڭ قورىتىندىسى بويىنشا قر پرەزيدەنتىنىڭ كومەكشىسى, ۇلتتىق كەڭەستىڭ حاتشىسى ەرلان قارين Facebook-تەگى پاراقشاسىندا ايتىپ بەردى:
«ۇلتتىق كەڭەستىڭ تاعى ءبىر باستاماسى ىسكە اسىرىلۋ ساتىسىندا. بۇگىن ۇقسك مۇشەلەرىمەن ونلاين كەزدەسۋ بارىسىندا اۋىل شارۋاشىلىعى ءمينيسترى ساپارحان وماروۆ پرەزيدەنتتىڭ ۇلتتىق كەڭەستىڭ ەكىنشى وتىرىسىندا بەرگەن تاپسىرمالارىن ىسكە اسىرۋ ماقساتىندا «جەردى پايدالانۋ مەن قورعاۋعا مەملەكەتتىك باقىلاۋدى جەتىلدىرۋ ماسەلەلەرى بويىنشا قر كەيبىر زاڭنامالىق اكتىلەرىنە وزگەرىستەر مەن تولىقتىرۋلار ەنگىزۋ تۋرالى» قر زاڭىنىڭ جوباسى ازىرلەنگەنىن حابارلادى. اتالعان زاڭ جوباسىندا اۋىل شارۋاشىلىعى جەرلەرىن ماجبۇرلەپ الىپ قويۋ ءۇشىن پايدالانباۋ مەرزىمىن اعىمداعى ەكى جىلدان ءبىر جىلعا دەيىن قىسقارتۋ جونىندە تۇزەتۋلەر كوزدەلگەن. زاڭ جوباسى مۇددەلى مەملەكەتتىك ورگانداردا كەلىسىلۋدە, جاقىن ارادا پمك-گە, ودان ءارى قر پارلامەنتى ماجىلىسىنە ەنگىزىلەتىن بولادى. وتكەن اپتادا ءماجىلىس اۋىل شارۋاشىلىعى ماقساتىنداعى پايدالانىلماعان جەرلەر ءۇشىن بازالىق سالىق مولشەرلەمەلەرىن 10-نان 20 ەسەگە دەيىن ارتتىرۋدى كوزدەيتىن زاڭ جوباسىن ماقۇلدادى. وسى شارالاردىڭ بارلىعىن پرەزيدەنت ۇلتتىق كەڭەستىڭ ەكىنشى وتىرىسىندا جاريا ەتتى. وسىلايشا, ءار اپتا سايىن ۇلتتىق كەڭەس اياسىندا ايتىلعان باستامالاردى ىسكە اسىرۋ بارىسى تۋرالى جاڭا اقپارات كەلىپ تۇسەتىن بولادى. باستامالاردىڭ ەداۋىر بولىگى قازىردىڭ وزىندە جۇزەگە اسىرىلعانى بەلگىلى, قالعاندارى بويىنشا ۇقسك حاتشىلىعى مەملەكەتتىك ورگانداردىڭ ولاردى قالاي پىسىقتاپ جاتقانىن قاداعالاپ وتىرادى. سونداي-اق, مەملەكەتتىك ورگانداردىڭ باسشىلارىمەن ون-لاين فورماتتا كەزدەسۋلەر جالعاسۋدا».
