ەل ىشىندە «كوكتەمىر», «كورىنبەس» اتانعان 22 جاستاعى ساپۋرا باسقارعان قازاق جاساعى 1775-1776 جىلدارى ورىنبور شەكارالىق شەبىنىڭ بويىنداعى جوعارعى جايىق, قىزىل, تانالىق, ور بەكىنىستەرى, يلينسك جانە ەلەك اسكەري بەكەتتەرىنە بىرنەشە رەت تۇتقيىلدان شابۋىلدار ۇيىمداستىرىپ, جازالاۋشى وتريادتاردىڭ قازاق جەرىنە ىشكەرىلەي كىرۋ جولدارىن كەستى. ول نۇرالى ابىلقايىر ۇلىنىڭ ورىنبور گۋبەرناتورىمەن وداقتاستىعىنا قارسى تۇرىپ, دوسالى سۇلتاننىڭ قولداۋىمەن جايىقتىڭ بەرگى بەتى مەن قوبدا-ەلەك بويىنداعى قازاقتاردىڭ قارسىلىق قوزعالىسىن باسقاردى. ەل ىشىنەن كوكتەمىرگە قوسىلعان ەرلەردىڭ سانى 5 مىڭنان اسقاندا, اسكەري تۇراعىن قوبدا مەن ەلەكتىڭ اراسىنا كوشىرگەن. ونىڭ قولى جىلدام ورىن اۋىستىرا الاتىن پارتيزاندىق كۇرەس تاسىلىنە جاقسى ماشىقتانعان. 1775-1776 جىلدارى كوتەرىلىس قاتتى قىزعاندا, سوعىس تاسىلدەرىن جاقسى مەڭگەرگەندىگى مەن جەر جاعدايىن جاقسى بىلگەندىگىنىڭ ارقاسىندا, سوڭىنان تۇسكەن نۇرالى حاننىڭ قۋعىنشىلارى مەن جازالاۋشى وتريادتان ۇنەمى قۇتىلىپ كەتىپ وتىرعان. ەشكىم كورمەگەن, «ەرەكشە سيقىرلى كۇشكە يە, كورىپكەل جانە جىندارمەن بايلانىستى» دەپ قاۋەسەت تاراتقان كوكتەمىر قىزدىڭ كوتەرىلىسىنە ەدىل بويىنداعى پۋگاچەۆ كوتەرىلىسىنىڭ ۇشقىندارى دا سەبەپ بولعان.
ساپۋرا ماتەنقىزى پۋگاچەۆ جاساعىندا شايقاسقان قازاق ساربازدارىمەن دە بايلانىستا بولعانى انىق. مۇنىڭ دالەلى, بەلگىلى تاريحشى ءنايلا بەكماحانوۆانىڭ «كوكتەمىر تۋرالى اڭىز» كىتابى مەن ءىزتاي مامبەتوۆتىڭ «پۋگاچەۆتىڭ نوكەرى», «كوكتەمىر» پوەمالارىندا ايتىلعان تاريحي مالىمەتتەر.
1776 جىلدىڭ جازىندا كوكتەمىر كوتەرىلىسى تەز باسىلدى. ساپۋرا ماتەنقىزى جازالاۋشى وتريادپەن شايقاستا قازا تاپتى ما, الدە شەگىنە-شەگىنە باسقا جاققا كوشىپ كەتتى مە, ۇرپاقتارى قالدى ما دەگەن سۇراقتىڭ جاۋابى جوق. وسى كەزگە دەيىن ساپۋرا ساپىندا شايقاسقان ساربازدار تۋرالى بىلەتىن كونەكوز قارتتاردىڭ اڭگىمەسى جازىپ الىنباي, كوكتەمىر كوتەرىلىسىن جۇيەلى تۇردە ەشكىم زەرتتەمەپتى.
«پۋگاچەۆ كوتەرىلىسىن ىندەتە قازسا, بىزگە بەيمالىم كوپتەگەن دەرەكتەردىڭ بەتى اشىلار ەدى. قالاي بولعاندا دا بۇل ىستە كاسىبي تاريحشىلاردىڭ تياناقتى دا ادال جۇمىسى كەرەك. ويتكەنى ساپۋرا ماتەنقىزىن تانۋ ءۇشىن ەڭ الدىمەن ورىنبور, ومبىداعى سول كەزەڭدەگى قازاق تاريحىنا قاتىستى دەرەكتەردى, اسكەري ەسەپتەردى سويلەتۋ كەرەك», دەيدى اقىن مەيىرحان اقداۋلەت ۇلى.
