پرەمەر-ءمينيستردىڭ ورىنباسارى رومان سكلياردىڭ باسشىلىعىمەن جانە مينيستر يۋري ءيليننىڭ توراعالىعىمەن وتكەن بەينەسەلەكتورلىق رەجيمدەگى وتىرىسقا مەملەكەتتىك ورگانداردىڭ باسشىلارى, وبلىستار, نۇر-سۇلتان, الماتى جانە شىمكەنت قالالارى اكىمدەرىنىڭ ورىنباسارلارى, توتەنشە جاعدايلار دەپارتامەنتتەرىنىڭ باستىقتارى قاتىستى.
جەتەكشىلىك ەتەتىن باعىتتار بويىنشا جۇمىس تۋرالى اۋىل شارۋاشىلىعى, دەنساۋلىق ساقتاۋ مينيسترلىكتەرى باسشىلارىنىڭ ورىنباسارلارى ءسوز سويلەپ, حالىق اراسىندا قۇس تۇماۋىن تاراتپاۋ جونىندە قابىلدانىپ جاتقان شارالار تۋرالى باياندادى.
سونداي-اق بىرقاتار وبلىس اكىمدەرىنىڭ ورىنباسارلارىنىڭ بايانداماسى تىڭدالدى.
اشم ۆەتەرينارلىق باقىلاۋ جانە قاداعالاۋ كوميتەتىنىڭ دەرەكتەرى بويىنشا 9-29 قىركۇيەك ارالىعىندا 9 وبلىستىڭ 47 اۋدانىنىڭ جانە رەسپۋبليكالىق ماڭىزى بار 1 قالانىڭ (اقمولا, اقتوبە, جامبىل, قاراعاندى, قوستاناي, پاۆلودار, سقو, قىزىلوردا, تۇركىستان, شىمكەنت قالالارى) 102 ەلدى مەكەنىندە 576 841 قۇستىڭ قىرىلۋ فاكتىسى تىركەلدى, ونىڭ ىشىندە 24 289-ى جەكە ۇيدە جانە 552 273-ءى قۇس فابريكاسىندا بولعان. ۆەتەريناريا جونىندەگى ۇلتتىق رەفەرەنتتىك ورتالىقتىڭ دەرەكتەرى بويىنشا جوعارى پاتوگەندى قۇس تۇماۋىنىڭ كوزى جانە تاسىمالداۋشىسى سولتۇستىكتەن وڭتۇستىككە ۇشىپ بارا جاتقان جابايى قۇستار. بۇعان قىرىلعان جابايى قۇستاردى زەرتتەۋ ناتيجەلەرى دالەل.
وتىرىس قورىتىندىسى بويىنشا پرەمەر-ءمينيستردىڭ ورىنباسارى رومان سكليار مۇددەلى مەملەكەتتىك ورگاندارعا قۇس تۇماۋىنىڭ تارالۋ سالدارىن بارىنشا ازايتۋ بويىنشا بارلىق الدىن الا شارالاردى قابىلداۋدى تاپسىردى. كوميسسيا وتىرىسىنىڭ سوڭىندا حاتتامالىق شەشىم قابىلداندى.
