قوعام • 30 قىركۇيەك, 2020

ەلىمىزدە تۇرمەدەگى ءار ادامعا جىلىنا 1,1 ملن تەڭگە بولىنەدى

795 رەت

كورسەتىلدى

3 مين

وقۋ ءۇشىن

قازاقستاندا كۇنكورىس مينيمۋمى بيىل 32 668 تەڭگە بولىپ بەكىتىلگەن. ياعني, كەز كەلگەن ادام ايىنا وسىنداي اقشامەن ءومىر سۇرە الادى دەگەن ءسوز. ال سوتتالىپ, جازاسىن وتەپ جاتقان ءار ازاماتقا جىلىنا 1 ميلليون 121 مىڭ تەڭگە بولىنەدى. ونى 12 ايعا شاققاندا 93 416,6 تەڭگەدەن كەلەدى. ياعني, مەملەكەت قىلمىس جاساعان ازاماتتى قامتۋ ءۇشىن وسىنشا اقشا شىعىندايدى. سوندىقتان بولار, كولونيادا وتىرعانداردىڭ 64 پايىزى ەكى رەتتەن كوپ سوتتالعان, دەپ حابارلايدى Egemen.kz tengrinews.kz سايتىنا سىلتەمە جاساپ.

دينار كەرىم

ەلىمىزدە تۇرمەدەگى ءار ادامعا جىلىنا 1,1 ملن تەڭگە بولىنەدى

وسىدان ەكى جىل بۇرىن ءار سوتتالعانعا جىلىنا 876,9 مىڭ تەڭگە بولىنەتىن. قازىر شامامەن 245 مىڭعا كوتەرىلگەن. ال ەلدەگى كۇنكورىس مينيمۋمى ەكى جىل بۇرىن 29 146 تەڭگە بولعان.

سوتتالعان ءبىر ادامعا جانە تەرگەۋ-قاماۋعا الىنعان ادامعا جىلىنا 1 ميلليون 121 مىڭ تەڭگە بولىنەدى. ونىڭ ىشىندە, سوتتالعاننىڭ تاماعىنا 241 000 تەڭگە, كيىم مەن توسەك-ورىن ءۇشىن 33 712 تەڭگە جۇمسالادى. سوتتالعاندارعا, كۇدىكتى جانە كىنالىلەرگە بولىنەتىن شىعىنداردىڭ سوماسىنا جەكە قۇرامنىڭ 12 104 قىزمەتشىسىن كۇتۋ شىعىنى دا كىرەدى.

ءبىر قاراعاندا سوتتالعانداردىڭ ءومىرى "كەرەمەت" بولىپ كورىنەدى. سەبەبى كيىمى دايىن, تاماعى ءپىسىپ تۇر. باسقا نە كەرەك؟ دەگەنمەن قىلمىستىق-اتقارۋ جۇيەسى ولاردى جازاسىن وتەگەننەن بولەك, ەڭبەك ەتۋگە, ءبىلىم الۋعا, كاسىپ مەڭگەرىپ, بوستاندىققا شىققان سوڭ قالىپتى ومىرگە بەيىمدەلۋى ءۇشىن اتسالىسىپ جاتىر.

ماسەلەن, قىلمىستىق-اتقارۋ جۇيەسىنىڭ ەنەرگو, جىلۋ, سۋمەن جابدىقتالۋىن, ءوندىرىس-تەحنيكالىق ماقساتتاعى (جۇمىستار, تاۋارلار) جانە حالىق تۇتىناتىن تاۋارلاردى شىعارۋ, سوتتالعانداردىڭ تاماعىن دايىنداۋ, ازىق-ت ۇلىك اكەلۋ سوتتالعانداردىڭ موينىنا جۇكتەلگەن.

"سونداي-اق جەڭىل ونەركاسىپپەن دە اينالىسادى. قاج قىزمەتكەرلەرى ءۇشىن فورما, مۇلكى جانە سوتتالعانداردىڭ توسەك-جابدىعىن تىگەدى. مەتالل جانە اعاش وڭدەۋ, قۇرىلىس ماتەريالدارىن شىعارۋمەن ت.ب. اينالىسادى", - دەيدى قاج كوميتەتىنىڭ ءباسپاسوز قىزمەتىندەگىلەر.

وسىدان كەيىن كوبىنە قاي جاستاعى ازاماتتار سوتتالادى جانە ولاردىڭ الەۋمەتتىك پورترەتى قانداي دەگەن زاڭدى ساۋال تۋىندايدى. ولاردىڭ ىشىندە 20-40 جاس ارالىعىندا (77 پايىز) ۇيلەنبەگەن ەر ادامدار 77 پايىز ەكەن. ال 95 پايىزىنىڭ جوعارى ءبىلىمى جوق جانە 90 پايىزى سوتتالعانعا دەيىن جۇمىس ىستەمەگەن. كولونيا رەجيمىنە باعىنبايتىندار 63 پايىز بولسا, سوتتالعانداردىڭ 64 پايىزى ەكى رەتتەن ارتىق كولونياعا ورالعان.

"اۋىر جانە اسا اۋىر قىلمىس ۇشىن سوتتالعاندار 95 پايىز, زورلىق-زومبىلىق مىنەز-قۇلقى بار 77 پايىز, قىلمىستىق توپ, ەكسترەميستىك جانە تەرروريستىك ۇيىمداردىڭ باسشىلارى جانە قاتىسۋشىلارى - 7 (9) پايىز", - دەلىنگەن قاج كوميتەتىنىڭ رەسمي جاۋابىندا.

35 ادام ادام ولتىرگەنى ءۇشىن, 13-ى زورلىق جاساعانى ءۇشىن (7 ادام - كامەلەت جاسىنا تولماعان بالانى قاساقانا زورلاۋ, 6 ادام - توپپەن زورلاۋ) جازاسىن وتەپ جاتىر.

"ال 62 سوتتالعاننىڭ (77 پايىزى) تولەم تالابى بار, ولاردىڭ تەك 22-ءسى (35 پايىزى) تولەيدى. وتەلۋى ءتيىس تالاپتىڭ جالپى سوماسى - 590 ميلليون تەڭگە. تولەنگەن سوما 56 ميلليون تەڭگە (9 پايىز). 12 سوتتالعانعا (15 پايىز) سوت ءماجبۇرلى تۇردە الكوگوليزمنەن, ناركومانيادان ەمدەۋ تۋرالى قاۋلى شىعارعان", دەيدى ۆەدومستۆوداعىلار.

قانشا كۇتىم بولعانىنا قاراماستان, سوتتالعاندار دا شاعىمدانادى. سەبەبى ولاردىڭ دا ازاماتتىق قۇقى بار.