قۇس تۇماۋىنا بايلانىستى بىرقاتار وڭىردە كارانتين جاريالاندى
سقو, اقمولا, قوستاناي, پاۆلودار, قاراعاندى وبلىستارىندا ءارتۇرلى ءۇي قۇستارىنىڭ 14 315 باسىنىڭ ءولىمى تىركەلدى. اتالعان ايماقتاردا ولگەن قۇستاردان پاتولوگيالىق ماتەريالدار الىنىپ, نۇر-سۇلتان قالاسىنداعى "ۆەتەريناريا بويىنشا ۇلتتىق رەفەرەنتتىك ورتالىققا" جولداندى. ەلىمىزدىڭ 4 وبلىسىندا قۇس تۇماۋى بويىنشا فاكت تىركەلدى. قۇس تۇماۋى انىقتالعان اۋماقتاردا كارانتين ەنگىزىلدى.
شونجىدا 1,171 ميلليارد تەڭگەگە سالىنىپ جاتقان سپورت كەشەنى قۇلادى
شونجىداعى عيماراتتىڭ قۇرىلىسى بىلتىر باستالعان. وڭىردەگى ماڭدايالدى سپورت نىسانى بولۋى ءتيىس عيمارات جىلدىڭ سوڭىنا دەيىن ىسكە قوسىلىپ, پايلانۋعا بەرىلۋى ءتيىس ەدى. وبلىستىق قۇرىلىس باسقارماسىنىڭ تاپسىرىسىمەن ىرگەسى قالانعان دەنە شىنىقتىرۋ كەشەنىن سالۋعا 1 ملرد 171 ملن تەڭگە قارجى بولىنگەن.
دانەليا تولەشوۆا America's Got Talent فينالىندا ونەر كورسەتتى
وكىنىشكە قاراي, قازاقستاندىق جاس ءانشى دانەليا تولەشوۆا امەريكالىق America's Got Talent بايقاۋىندا جەڭىسكە جەتە المادى. شوۋدىڭ بيىلعى جەڭىمپازى برەندان ليك اتتى ونەرپاز بولدى. لوس-اندجەلەستە وتكەن شوۋدىڭ اقتىق سىنىنا 10 ءارتىس قاتىستى, ولاردىڭ التاۋى ءار ءتۇرلى جاستاعى ۆوكاليستەر. بايقاۋ جەڭىمپازىنا 1 ملن دوللار جۇلدە تابىستالدى.
لۋكاشەنكو بەلارۋس پرەزيدەنتى قىزمەتىنە كىرىستى
مينسك قالاسىنىڭ تاۋەلسىزدىك سارايىندا الەكساندر لۋكاشەنكونىڭ بەلارۋس رەسپۋبليكاسىنىڭ پرەزيدەنتى قىزمەتىنە رەسمي كىرىسۋ ءراسىمى ءوتتى. سالتاناتتى راسىمگە اتالعان ەلدىڭ جوعارى لاۋازىمدى تۇلعالارى, پارلامەنتاريلەر, مەملەكەتتىك ورگاندار مەن جەرگىلىكتى بيلىك ورگاندارىنىڭ جانە رەسپۋبليكالىق باق-تىڭ باسشىلارى, سونداي-اق عىلىم, مادەنيەت جانە سپورت قايراتكەرلەرى قاتىستى.
قازاقستان ءولىم جازاسىن الىپ تاستادى
بىرىككەن ۇلتتار ۇيىمىنىڭ شتاب-پاتەرىندە قازاقستاننىڭ بۇۇ جانىنداعى تۇراقتى وكىلى قايرات وماروۆ ءولىم جازاسىن جويۋعا باعىتتالعان ازاماتتىق جانە ساياسي قۇقىقتار تۋرالى حالىقارالىق پاكتىگە ەكىنشى فاكۋلتاتيۆتىك حاتتاماعا قول قويدى. بۇل حالىقارالىق قۇجاتقا قول قويۋ ءولىم جازاسىن قولدانۋ اياسىن بىرتىندەپ تارىلتۋ جانە قىلمىستىق زاڭنامانى ىزگىلەندىرۋ باعىتىنىڭ جالعاسى بولىپ وتىر. قازاقستان رەسپۋبليكاسىندا ءولىم جازاسىن قولدانۋ قر پرەزيدەنتىنىڭ 2003 جىلى ءتيىستى موراتوري ەنگىزۋ تۋرالى جارلىعى تولىعىمەن توقتاتىلدى.
سولتۇستىك قازاقستان جانە شىعىس قازاقستان وبلىستارىندا كەزەكشى سىنىپتاردا وقيتىن وقۋشىلاردان كوروناۆيرۋس انىقتالدى
سولتۇستىك قازاقستاندا 8 ءبىلىم وشاعىندا ىندەت تىركەلدى. سميرنوۆ اۋىلىنداعى ورتا مەكتەپتە, "بۋلاەۆ بالاباقشا كەشەنىندە", №44-ءشى ورتا مەكتەپتە, № 10-شى ورتا مەكتەپتە, "بەست" گيمنازياسىندا جانە بۋلاەۆ ورتا مەكتەبىندە ءبىر-ءبىر جاعدايدان انىقتالدى. لەنين اتىنداعى ورتا مەكتەپتە 2, "دارىن" مەكتەپ-ليتسەيىندە 4 جاعداي تىركەلدى. اتالعان ءبىلىم ورىندارىندا ەپيدەمياعا قارسى شارالار جۇرگىزىلدى. اۋرۋ بەلگىسى بار ادامداردىڭ بارلىعى 14 كۇنگە وقشاۋلاندى.
سونداي-اق شقو-دا كەزەكشى سىنىپتا وقيتىن ءتورت وقۋشى كوروناۆيرۋس جۇقتىردى. اتاپ ايتساق, شەمونايحا اۋدانىنىڭ 4-سىنىپ وقۋشىلارى, كوكپەكتى اۋدانىنىڭ 11-سىنىپ وقۋشىسى جانە التاي اۋدانىنىڭ 2-سىنىپ وقۋشىسىنان ىندەت بەلگىلەرى انىقتالعان. بۇدان سوڭ, وبلىس اۋماعىنداعى ەكى سىنىپ پەن ءبىر مەكتەپ 14 كۇندىك كارانتينگە جابىلدى. COVID-19 ۆيرۋسى انىقتالعان بارلىق مەكتەپتەردە ەپيدەمياعا قارسى دەزينفەكتسيالىق شارالار جۇرگىزىلدى.
ءماجىلىس سپيكەرى نۇرلان نىعماتۋليننىڭ توراعالىعىمەن وتكەن جالپى وتىرىستا دەپۋتاتتاردىڭ باستاماسىمەن ازىرلەنگەن "وتباسىلىق-تۇرمىستىق زورلىق-زومبىلىققا قارسى ءىس-قيمىل تۋرالى" جانە وعان ىلەسپە زاڭ جوبالارى ماقۇلداندى
قۇجات وتباسىلىق-تۇرمىستىق زورلىق-زومبىلىققا قارسى ءىس-قيمىل جونىندەگى مەملەكەتتىك ساياساتتىڭ قۇقىقتىق, الەۋمەتتىك, ينستيتۋتسيونالدىق جانە ۇيىمداستىرۋشىلىق نەگىزدەرىن جەتىلدىرۋ ماقساتىندا دايىندالعان. زاڭ جوباسىمەن جۇمىس ىستەۋ بارىسىندا دەپۋتاتتار تۇرمىستىق زورلىق-زومبىلىق سالاسىنداعى ءىس-قيمىل شارالارىنىڭ تۇتاس جۇيەسىن قۇرۋعا باعىتتالعان نورمالاردى ەنگىزىپ, جاۋاپتى ورگانداردىڭ قۇزىرەتتەرىن ناقتىلادى.
ۋكراينادا اسكەري ۇشاق اپاتىنان 25 ادام قازا تاپتى
25 قىركۇيەكتە ساعات 20.50-دە چۋگۋەۆ قالاسىنىڭ ماڭىندا اسكەري اۋەجايدان شامامەن ەكى شاقىرىم قاشىقتىقتا ۋكراينا قك ان-26 ۇشاعى اپاتقا ۇشىراپ, ورتەندى. بورتتا 7 ەكيپاج مۇشەسى جانە ي.كوجەدۋب اتىنداعى اۋە كۇشتەرى ۋنيۆەرسيتەتىنىڭ 21 كۋرسانتى, بارلىعى 28 ادام بولعان. ۋكراينا پرەزيدەنتى ۆلاديمير زەلەنسكي حاركوۆ وبلىسىندا اپاتقا ۇشىراعان اۋە اپاتىنا بايلانىستى 25 قىركۇيەكتى ۇلتتىق ازا تۇتۋ كۇنى دەپ جاريالادى. مەملەكەت باسشىسى قاسىم-جومارت توقاەۆ قازاقستان حالقىنىڭ جانە جەكە ءوزىنىڭ اتىنان قازا بولعان كۋرسانتتاردىڭ تۋعان-تۋىسقاندارىنا كوڭىل ايتتى.
ارميان-ازەربايجان قاقتىعىسى ۋشىقتى
قازاقستان رەسپۋبليكاسىنىڭ ءسىم ارميان-ازەربايجان قاقتىعىسىنىڭ ۋشىعۋىنا بايلانىستى مالىمدەمە جاسادى. قازاقستان تاۋلى قاراباقتا ورىن العان ارميان-ازەربايجان قاقتىعىسىنىڭ ۋشىعۋىنا الاڭداۋشىلىعىن ءبىلدىرىپ, حالىقارالىق ۇيىمداردىڭ الاڭدارىندا جانجالدى شەشۋدىڭ بەيبىت جولدارىن ىزدەۋگە كومەكتەسۋگە دايىن ەكەنىن مالىمدەدى.
