سول ساتتە شاعىن قالا ءارى اۋدان ورتالىعى – قۇلسارىداعى اۋداندىق اۋرۋحانا جانىنان 40 ورىندىق ينفەكتسيالىق ستاتسيونار, 60 توسەككە ارنالعان پروۆيزورلىق ورتالىق اشىلدى. بۇل – ناۋقاستاردى قاۋىپتى ىندەتتەن قۇتقارۋ ءۇشىن جاسالعان قادام. اۋداندىق ورتالىق اۋرۋحانانىڭ باس دارىگەرى نۇربەك ۇكىباەۆتىڭ ايتۋىنا قاراعاندا, مۇندا دارىگەرلەر مىگىر تاپپاي, شىبىن جانىن شۇبەرەككە تۇيگەن جانداردى ارتى ولىمگە سوقتىرۋى مۇمكىن قاۋىپتى ىندەتتەن اراشالاۋعا بەل شەشە كىرىستى.
بۇل اۋداندا دا اق حالاتتىلارعا ءۇمىت ارتىپ, جانىنا شيپا ىزدەگەندەر قينالعانى داۋسىز. ويتكەنى اۋا جەتپەي, سەمىپ بارا جاتقان قوس وكپەگە دەم بەرەر وتتەگى كونتسەنتراتورلارى جەتىسپەدى. بىراق ناۋقاستارعا قاناتىمەن سۋ سەپكەن قارلىعاشتاي قول ۇشىن سوزۋعا ۇمتىلعان قايىرىمدى جاندار كومەككە كەلدى. سولاردىڭ قاتارىنان نوتاريۋستار دا تابىلدى. ولار ارنايى قارجى جيناپ, دەمەۋشىلىك كومەك كورسەتۋدى باستى پارىزىنىڭ بىرىنە بالادى. ءسويتىپ, ولار وزدەرى جيناعان قارجىعا «ارمەد 7F-5L» ماركالى وتتەگى كونتسەنتراتورىن ساتىپ الىپ, جىلىوي اۋداندىق اۋرۋحاناسىنىڭ ۇجىمىنا تاپسىردى. جۇرت قينالىپ جاتقاندا جۇدىرىقتاي جۇمىلعان نوتاريۋستاردىڭ بۇل قادامى جىلىويلىقتاردى قۋانتقانى داۋسىز. اسىرەسە ءومىر مەن ءولىم ورتاسىندا جاتقان ناۋقاستاردىڭ جارقىن كۇندەرگە دەگەن سەنىمىن وياتتى.
– جومارتتىق – قازاقتىڭ قانىندا بار قاسيەت. قينالعان جانعا قايىرىمدىلىق تانىتاتىن جومارت جانداردىڭ بار ەكەنى كەيىنگى ۇرپاققا ۇلگى بولارى داۋسىز. تۇتقيىلدان قاۋىپ توندىرگەن كوروناۆيرۋسقا شالدىققان ناۋقاستاردى امان الىپ قالۋ ءۇشىن قول ۇشىن سوزىپ, دەمەۋشىلىك بىلدىرگەن اتىراۋ وبلىستىق نوتارياتتىق پالاتاسىنىڭ ءتورايىمى گۇلنار ماساتوۆاعا, سونداي-اق بارلىق جەكە نوتاريۋسقا ءدان ريزامىز. ويتكەنى ولار سىيلاعان وتتەگى كونتسەنتراتورىنىڭ ناۋقاستاردىڭ تەزىرەك ساۋىعىپ, وتباسىنا امان-ەسەن ورالۋىنا سەپتىگىن تيگىزدى, – دەيدى جىلىوي اۋداندىق ورتالىق اۋرۋحانانىڭ ديرەكتورى ن.ۇكىباەۆ.
قازىر جىلىوي اۋدانىندا قاۋىپتى ىندەتتىڭ تارالۋى توقتادى. اۋرۋحانا جانىنان اشىلعان ينفەكتسيالىق ستاتسيوناردا دا, پروۆيزورلىق ورتالىقتا دا ەم الىپ جاتقان ناۋقاستار جوق. ويتكەنى دارىگەرلەردىڭ شيپالى ەمىنەن بويىنا قۋات جيناعان ناۋقاستار كوروناۆيرۋس ينفەكتسياسىنان ساۋىعىپ, وتباسىنا امان-ەسەن ورالدى.
– جاقىندا عانا كوروناۆيرۋسقا شالدىققان سوڭعى ەكى پاتسيەنت حاتتاماعا سايكەس تولىقتاي ەمدەلىپ شىقتى. بۇل – ءبىز ءۇشىن قۋانىشتى جايت. قازىر اۋداندا قاۋىپتى ىندەتتى جۇقتىرعان ناۋقاستار جوق. سوعان قاراماستان ءبىز ءالى دايىندىق شارالارىن توقتاتپاي, كۇن سايىن پىسىقتاپ وتىرمىز. اۋرۋحانامىز قورعانىش كيىمدەرىمەن قامتىلىپ, ءدارى-دارمەكتەردىڭ ەكى ايلىق قورى جاساقتالىپ وتىر, – دەيدى ن.ۇكىباەۆ.
ال وبلىستىق كارديولوگيالىق ورتالىق ديرەكتورىنىڭ ورىنباسارى ساندۋعاش جۇماعاليەۆانىڭ مالىمەتىنشە, قاۋىپتى ىندەت ورشىگەن كەزدە مۇندا 12 ورىندىق پروۆيزورلىق ستاتسيونار جۇمىس ىستەدى. دارىگەرلەرلىك مىندەتىن ورىنداۋعا بىلەك تۇرە كىرىسكەن اق حالاتتى ابزال جاندار وتباسىنا بارۋدى ويلاعان جوق. كۇنى-ءتۇنى كوروناۆيرۋس بەلگىسى انىقتالعان ناۋقاستاردىڭ ءومىرىن ساقتاپ قالۋ ءۇشىن ارپالىستى.
– كوروناۆيرۋس ينفەكتسياسىن جۇقتىرۋشىلاردىڭ قاتارى كوبەيگەن ماۋسىم ايىندا جۇمىسىمىزدى ەپيدەميالىق جاعدايعا بەيىمدەۋگە ءماجبۇر بولدىق. بۇدان باسقا امالىمىز قالمادى. ويتكەنى ءبىزدىڭ باستى مىندەتىمىز – ادامداردىڭ ءومىرىن ساقتاۋ. سول سەبەپتەن دارىگەرلەر قۇرامى قاۋىپتى ىندەتپەن كۇرەسكە تۇگەلدەي جۇمىلدىرىلدى. ءبىزدىڭ ارىپتەستەرىمىز ەل-جۇرت قينالىپ جاتقاندا گيپپوكرات انتىنا ادالدىق تانىتتى. ولار ارىنا, اق حالاتىنا دا قىلاۋداي داق تۇسىرگەن جوق. سونىڭ ناتيجەسىندە بۇگىنگە دەيىن كارديولوگيالىق ورتالىقتا كوروناۆيرۋس ينفەكتسياسىن جۇقتىرعان 600-دەن استام ناۋقاستى ەمدەپ شىعاردىق, – دەيدى وبلىستىق كارديولوگيالىق ورتالىق ديرەكتورىنىڭ ورىنباسارى ساندۋعاش جۇماعاليەۆا.
ەندى اجالمەن بەتپە-بەت كەلتىرگەن, ۇرەيگە تولى قيىن كۇندەر ارتتا قالدى. الايدا جىلىوي اۋداندىق ورتالىق اۋرۋحاناسىندا دا, وبلىستىق كارديولوگيالىق ورتالىقتا دا دارىگەرلەر ارقانى كەڭگە سالىپ وتىرعان جوق. ويتكەنى ولار جوسپارلى ەمدەۋ ىسىنە كىرىسىپ, وزگە سىرقاتتاردى قابىلداي بەرەدى.
اتىراۋ وبلىسى
