تۋردىڭ شىمىلدىعىن قوستانايدىڭ «توبىلى» مەن كوكشەتاۋدىڭ «وقجەتپەس» كلۋبتارى اشىپ بەردى. جىل باسىندا چەمپيوندىقتان بىردەن-ءبىر ۇمىتكەر كوماندا سانالعان «توبىل» ازىرگە سەنىمدى اقتاي الماۋدا. گريگوري بابايان شاكىرتتەرى جەڭەدى-اۋ دەگەن ماتچتا جەڭىلىپ, ۇپاي جوعالتادى دەگەن ويىندا جەڭىسكە جەتىپ ءجۇر. ياعني ازىرشە كوماندانىڭ ويىنى تۇراقتى دەپ ايتا المايمىز. ماسەلەن, الدىڭعى تۋرلاردا ەل بىرىنشىلىگىنىڭ التى دۇركىن چەمپيونى «استانانى» 2:0 ەسەبىمەن جەڭسە, كەيىن شىمكەنتتىڭ «ورداباسى» كلۋبىنان 4:0 ەسەبىمەن تاس-تالقانى شىعىپ جەڭىلدى. چەمپيوناتتىڭ قازىرشە اۋتسايدەر كومانداسى «وقجەتپەسپەن» وتكىزگەن وينىندا جەرەمي مانزوررونىڭ 65-مينۋتتا سوققان گولىنىڭ ارقاسىندا ارەڭ دەگەندە ءۇش ۇپايعا قول جەتكىزدى. كەيىنگى ءۇش ماتچتا تەڭ ويناعان كوكشەتاۋلىقتار بۇل تۋردا ۇپاي الا المادى. دەسە دە ماتچ تەڭ ويىنعا لايىق دارەجەدە وتكەنىن ايتا كەتكەن ءجون.
وتكەن تۋردا «وقجەتپەسپەن» 2:2 ناتيجەسىمەن تەڭ تۇسكەن اقتاۋدىڭ «كاسپيى» بۇل تۋردا «تاراز» كلۋبىنا ەش قارسىلىق كورسەتە المادى. «تاراز» سوڭعى رەت 15 ناۋرىزدا ءوز الاڭىندا «ورداباسى» كلۋبىنان 3:2 ەسەبىمەن باسىم تۇسكەن سوڭ كەشەگى كۇنگە دەيىن جەڭىستىڭ نە ەكەنىن بىلمەي كەلە جاتقان ەدى. ەكى تايمدا ءبىر-بىردەن گول سوققان «تاراز» ءۇش ۇپاي يەلەنىپ, تۋرنير كەستەسىندەگى جاعدايىن ءبىرشاما جاقسارتىپ الدى. بۇل تارازدىقتاردىڭ ەكىنشى جەڭىسى ەكەنىن دە ايتا كەتەيىك. ال جەڭىلىستەن كوز اشپاي كەلە جاتقان اقتاۋلىقتار تۋرنير كەستەسىندە سوڭعى ورىندا قالىپ قويدى.
ال وسى تۋردىڭ ەڭ تارتىستى جانە ەڭ كوپ گول سوعىلعان ويىنى «شاحتەر» مەن «جەتىسۋ» اراسىندا ءوتتى. ەكى كوماندانىڭ دا ستاتيستيكاسى قىزىق. ماسەلەن, قاراعاندى كلۋبى بۇل ماتچقا دەيىن ءۇش رەت تەڭ تۇسسە, جەتىسۋلىقتار قاتارىنان ءۇش ويىندا جەڭىسكە جەتكەن-ءدى. سوندىقتان فۋتبول ماماندارى بۇل ماتچتا «جەتىسۋ» ەش قيىندىقسىز جەڭىسكە جەتەدى دەپ بولجاعان. الايدا كەزدەسۋدىڭ 70-مينۋتىنا دەيىن «شاحتەر» 2:0 ەسەبىمەن الدا كەلدى. انە-مىنە دەگەنشە ۇزاق كۇتتىرگەن جەڭىسىن تويلاۋعا جاقىن تۇرعان كەنشىلەر كومانداسى اينالدىرعان 20 مينۋت ىشىندە ءۇش گول وتكىزىپ الىپ, قولدا تۇرعان ءۇش ۇپايىنان ايىرىلىپ قالدى. «جەتىسۋ» ساپىنان ەكىنشى تايم باسىندا الاڭعا شىققان شابۋىلشى ايبار جاقسىلىقوۆ 70 جانە 83-مينۋتتا دۋبل جاساپ, ەسەپتى تەڭەستىردى. ارادا ءبىر مينۋت وتكەندە پەدرۋ ەۋجەنيۋ تابلوداعى كورسەتكىشتى 3:2-گە جەتكىزدى. وسىلايشا «جەتىسۋ» ويىندا كامبەك جاساپ, تورەشىنىڭ سوڭعى ىسقىرىعى شالىنعانشا ويىنداعى جەڭىمپازدى انىقتاۋ مۇمكىن ەمەس ەكەنىن تاعى ءبىر مارتە دالەلدەدى.
شىمكەنتتىڭ «ورداباسى» كلۋبى بۇل تۋردا پەتروپاۆلدىڭ «قىزىلجار» كومانداسىن قابىلداپ, 1:0 ەسەبىمەن جەڭىسكە جەتتى. وتكەن تۋردا «قايسار» كلۋبىمەن تەڭ تۇسكەن «ورداباسى» جواو پاۋلونىڭ ارقاسىندا ءبىر ۇپاي ەنشىلەگەن بولاتىن. ال كەشەگى ماتچتا جواونىڭ سوققان جالعىز گولىنىڭ ارقاسىندا ءۇش ۇپايعا قول جەتكىزدى. چەمپيوناتتىڭ ەڭ ۇزدىك سۇرمەرگەنىنە اينالعان برازيليالىق فۋتبولشى وسىمەن قاتارىنان جەتىنشى ويىندا گول سوعىپ, «ورداباسىنى» تۋرنير كەستەسىنە جوعارى ورىندارعا قاراي جەتەلەپ كەلەدى. «قىزىلجار» كەيىنگى ءۇش تۋر بويى قارسىلاستارىنا ۇپاي سىيلاۋدان ارىگە اسا الماي ءجۇر. وتكەن تۋردا «قايراتتان» 1:0 ەسەبىمەن جەڭىلسە, ونىڭ الدىندا «توبىلدان» 2:0 ناتيجەسىمەن ۇتىلدى.
چەمپيوناتتى ءتاۋىر باستاعان «استانانى» رەستارتتان كەيىن نە قىرسىق شالعانى بەلگىسىز, ويىنى تەگى جۇرمەي قويدى. چەمپيوندار ليگاسىنىڭ ءبىرىنشى ىرىكتەۋ كەزەڭىندە بەلارۋستىڭ «ديناموسىنان» 6:3 ەسەبىمەن, ەۋروپا ليگاسىندا دەڭگەيى مەن قارجىلىق جاعدايى بويىنشا بىرنەشە ەسە تومەن «بۋدۋچنوست» كومانداسىنان 1:0 ەسەبىمەن جەڭىلىپ, جانكۇيەرلەرىن جەرگە قاراتتى. ىشكى چەمپيوناتتا دا جاعدايى اسا ءماز ەمەس. 10-تۋردا «قايسارمەن» كەزدەسكەن ەل چەمپيونى سوڭعى مينۋتتاردا جەڭىستى ج ۇلىپ الدى. ويىننىڭ 87-مينۋتىندا قورعاۋشى جاركو توماشەۆيچ گول سوعىپ, كومانداسىنا ماڭىزدى ءۇش ۇپاي سىيلادى.
قارجىلىق جاعدايعا بايلانىستى بيىلعى قازاقستان چەمپيوناتىنان پاۆلوداردىڭ «ەرتىس» كلۋبى شىعىپ قالعان سوڭ بىرىنشىلىككە 11 كوماندا قاتىسىپ جاتقانى بەلگىلى. سوندىقتان ءار تۋر سايىن ءبىر كومانداعا دەمالىس بەرىلەدى. بۇل جولعى كەزەك الماتىنىڭ «قايرات» كلۋبىنا جەتكەن ەكەن. چەمپيوناتتى وتە ءساتتى باستاعان «قايرات» قازىرگى تاڭدا قارسىلاستارىنان قارا ءۇزىپ, تۋرنير كەستەسىندە كوش باستاپ كەلەدى.
10-تۋردان كەيىن سۇرمەرگەندەر كوشىن, جوعارىدا ايتقانىمىزداي, «ورداباسىنىڭ» شابۋىلشىسى جواو پاۋلو باستاپ تۇر. 11 ماتچتا («ورداباسى» وزگە كوماندالارعا قاراعاندا ەكى ويىن ارتىق وتكىزگەن) ول قارسىلاس قاقپاسىن 7 مارتە ءدال كوزدەگەن. كەيىنگى ورىندارعا ابات ايىمبەتوۆ پەن رۋنار مار سيگۋرونسسون جايعاسقان. ولاردىڭ ەنشىسىندە بەس گولدان بار.
