قارجى پيراميداسىنىڭ باسشىلارى ينتەرنەت جەلىلەرىندە ۆەب-سايتتار قۇرىپ, ويدان شىعارىلعان ءتۇرلى ينۆەستيتسيالىق پورتفەلدەر ساتقان. الاياقتار پورتفەلدىڭ مەرزىمى اياقتالعاندا 300%-عا دەيىن پايدا تاباسىز دەپ جالعان ۋادەلەر بەرگەن.
ەل اۋماعىندا الاياقتاردان مىڭداعان قازاقستاندىق زارداپ شەكتى, ولارعا كەلگەن شىعىن 1 ملرد تەڭگەدەن اسىپ تۇسكەن.
تامىز ايىندا قارجى پيراميداسى باسشىلارىنىڭ ءبىرى, رەسەي ازاماتى ولگا كلەينارد بەلارۋس ەلىنەن ەكستراديتسيالاندى جانە سوتقا دەيىنگى تەرگەۋ قايتا باستالدى.
وسىعان بايلانىستى تەرگەۋ ورگانى «Questra Holding ins», «Questra World», «Atlantic Global Asset Management», «five Winds Asset Managent» كومپانيالار توبىنىڭ الاياقتىق قىزمەتىنەن زارداپ شەككەندەردىڭ بارلىعىن ىشكى ىستەر مينيسترلىگىنە (نۇر-سۇلتان قالاسى, تاۋەلسىزدىك داڭعىلى, 1) نەمەسە تۇرعىلىقتى جەرى بويىنشا پوليتسيا دەپارتامەنتتەرىنە حابارلاسۋدى سۇرايدى.
ىشكى ىستەر مينيسترلىگى ازاماتتاردى سەرگەك بولۋعا جانە وڭاي, تەز پايدا تابۋ تۋرالى ۋادەلەرگە سەنبەۋگە جانە وسىنداي جاعدايلاردىڭ بارلىعىن دەرەۋ پوليتسيا ورگاندارىنا حابارلاۋعا شاقىرادى.
