ەندى مىنە, جاھاندى دۇرلىكتىرگەن ىندەت الەمدى جايلادى. كوزگە كورىنبەيتىن قازىرگى كەسەلدىڭ كەسىرى قانشاما ادامعا زاۋال بولىپ ءتيىپ, تالايدى جۇرىسىنەن جاڭىلدىردى. ميلليونعا جۋىق كىسىنى الىپ ۇرىپ, انا دۇنيەگە الىپ كەتتى.
...استاناداعى بىلدەي ءبىر بەدەلدى لاۋازىم يەسىنىڭ ايەلى سايراش كۇيەۋىمەن چەحياداعى ايگىلى كارلوۆى ۆارى دەپ اتالاتىن دەمالىس ورنىنا بارادى. چەحيانىڭ «بوگەميا» دەپ اتالاتىن ليۋستراسىن, بريلليانتىن ىزدەپ دۇكەن قويماي, باعالى بۇيىمداردى الا بەرەدى. جالت-جۇلت ەتكەن دۇنيەگە كوزى تويار ەمەس. ءوزى سەكىلدى ءبىرتالاي ادامدى پراگا قالاسىنان دا, ءدال وسى كارلوۆى ۆارى دەمالىس كەشەنىنەن دە كەزدەستىردى. ولار دا ءارتۇرلى دەڭگەيدەگى دوكەيلەردىڭ ايەلى نەمەسە مادەنيەتتىلەپ, جۇمسارتىپ, قازىرگىشە ايتقاندا بىرەۋلەردىڭ وسىندا ەرتە كەلگەن ناقسۇيەرى. ەلدەن جىراق, وڭاشا قىدىرىپ, دەمالىستاپ كەلگەندەرى كورىنىپ تۇر. سولاردىڭ ءبىر-ەكەۋىمەن قىسقاشا شۇيىركەلەسىپ قالعانى بار. ءبارىنىڭ وي-ارماندارى, ماقساتتارى نەگىزىنەن ۇقساستاۋ.
ال مىنا ءبىر كەلىنشەكتىڭ ءجۇرىس-تۇرىسى, مىنەزى, سابىرلى قالپى وزگەلەردەن بولەكتەۋ مە, قالاي. ءتىپتى مۇلدە ەشكىمگە ۇقسامايدى دەسە بولعانداي. بۇل كەلىنشەك ءوزىنىڭ زاگستە تىركەلگەن زاڭدى كۇيەۋىمەن سوناۋ استانادان كەلگەن. ايتۋىنا قاراعاندا, ونىڭ وتاعاسى مۇناي-گاز مەكەمەسىندەگى باسشىلىق قىزمەتتە ىستەيتىن كورىنەدى. وسىندا كەلىپ ەم الىپ, تاۋلى, ءيىسى مۇرىن جارعان قاراعايلى ورماننىڭ تازا اۋاسىمەن تىنىستاپ, دارىگەرلەردىڭ كۇندەلىكتى تاعايىنداعان ەم-دومىن ۇزبەي قابىلداپ, باسقا ەشتەڭەگە الاڭداماي جاتقان سىڭايلى. قولى بوساي قالسا تازا اۋادا قىدىرىستاپ كوپ جۇرەدى. شيپاجايدىڭ ەمدىك قاسيەتى مول سۋىن ءىشىپ, قىلقان جاپىراقتى قاراعايدان بولىنگەن ساف تازا اۋامەن كەۋدەسىن كەرە دەمالىپ, ءسال دامىلداپ تۇرىپ قالاتىنى بار. شاماسى, دەرتى اسقىنعان ادامعا ۇقسايتىنداي...
العاشقىدا بۇعان اسا ءمان بەرمەگەن. ءوزى كۇندە جانتالاسىپ, الىستى-جاقىندى بازار, دۇكەن اتاۋلىنى قويماي ارالاپ, دوربا-دومالاعىن ارقالاپ, ساۋداسىن قىزدىرىپ جۇرگەندە كوڭىل اۋدارماسا كەرەك. ەندى ءبىراز ۋاقىت وتكەننەن كەيىن اپتىعى باسىلىپ, ارىنى قايتقان سوڭ جان-جاعىنا نازار اۋدارىپ قاراعاندا بايقادى. سويتسە الگى مۇناي-گاز ماگناتىنىڭ ايەلى ەشتەڭەگە قىزىقپايدى, كوزدىڭ جاۋىن العان دۇنيە اتاۋلىعا نازار دا سالمايدى. ءوزى ءتىپتى قاراپايىم. كەشكى دەمالىس ورىندارىنا, مەيرامحاناعا بارعاندا وزگەلەر سەكىلدى ساۋساعىندا التىن ساقيناسى, تاعىپ العان بريلليانت سىرعاسى, موينىندا سالا-قۇلاش القاسى دا جوق. كادىمگى قاراپايىم قالپىنان ءبىر تانبايدى. ال شىنتۋايتىنا كەلگەندە, مۇنداي دوكەي كۇيەۋى بار كەلىنشەكتە قاراجات جوق بولۋى مۇمكىن ەمەس. سوناۋ الىستان قيان تۇكپىردەگى اتاعى جەر جاراتىن كارلوۆى ۆارى شيپاجايىنا ەكىنىڭ ءبىرى كەلە بەرمەيدى. ونىڭ ۇستىنە, بىرنەشە كۇن ىشىندە بايقاعانى, بۇلارعا تالاي ادام كەلىپ سالەم بەرىپ, قۇراق ۇشىپ جاتقانىن كوردى. ال ايەل بولسا سول ءباز-باياعى قالپى. كوركى دە ەشكىمنەن كەم ەمەس, اسا قارتايىپ تۇرعان جوق, قىرىقتىڭ ار جاق, بەر جاعىنداعى كەلبەتتى كەلىنشەك. سوندا تۇككە قىزىقپايتىن بۇل نە قىلعان ادام؟ جوعارىدا ايتقانىمىزداي, بايلىعى جوق دەۋگە مۇلدە كەلمەيدى. كۇن سايىن تەلەفون شالىپ, بالالارى حابارلاسىپ تۇرادى. سولارمەن بولعان اماندىق-ساۋلىق اۋانىنان دا تالاي نارسە اڭعارىلادى. كوپتى كورگەن, نەبىر اۋزىمەن قۇس تىستەيتىن دوكەيلەرمەن داستارقانداس, ارالاس-قۇرالاس بولعان ادامدار ەكەنى اڭگىمەلەرىنەن بايقالادى.
سوندا دۇنيەدەن باز كەشكەندەي بۇل نە قىلعان ادام دەپ وعان سىرتتاي تاڭدانا قاراۋمەن ءجۇردى. ايتەۋىر اشىلماعان ءبىر سىر بار سەكىلدى. الايدا ونى دا انىقتاۋدىڭ ىڭعايى كەلدى. ءبىر كۇنى تىنىعىپ جاتقان ايەلدەردىڭ كۇيەۋلەرى قالا ارالاپ بولەك كەتەدى. سودان قۇپيا سىردىڭ بەتىن اشۋعا ىنتىققان جاعدايدىڭ ءساتى ءتۇسىپ, بۇل الگى ايەلدى مەيرامحاناعا شاقىرعانشا اسىعادى. كەش ءتۇسىپ مەيرامحاناعا كەلگەندە وڭاشا وتىرىستا سىرلاسادى.
– ءسىز وسى نەگە ەشتەڭە المايسىز, دۇنيە اتاۋلىعا قىزىقپايسىز؟ ءتىپتى نازار دا سالمايسىز, – دەپ سۇرايدى.
سوندا ول كەلىنشەكتىڭ تۇڭعيىق ويعا بەرىلە وتىرىپ ايتقانى مىنانداي:
– بۇل دۇنيە جالعان, ۋاقىتشا. جانتالاسا جيعان زاتىڭدى انا جاققا كوتەرىپ الىپ كەتە المايسىڭ. ءبارى ادىرە قالادى. مەن جازىلماس اۋرۋمىن, باسىمدا, ميىمنىڭ ىشىندە ىسىك بار. ماعان جارىق دۇنيەدە جۇرۋدەن اسقان بايلىق جوق, بىرەۋدەن ىندەت جۇقتىرىپ الماي, ءبىر جۇتىم تازا اۋامەن تىنىستاپ, ءاربىر العان دەمىم قىمبات. ميىما وتتەگى جەتىسپەيدى. دۇنيە اتاۋلى تۇك تە كەرەك ەمەس, ۇيدە ءبارى بار. بۇل پانيدەگى جالعان دۇنيەدە ماعان بالالارىمنىڭ اماندىعى, وتباسىمنىڭ تىنىشتىعى, دەننىڭ ساۋلىعىنان اسقان بايلىقتىڭ كەرەگى جوق, – دەپ ۇزاق ويلانىپ قالدى دا, ءسال تىنىستاپ العان سوڭ اڭگىمەسىن ءارى قاراي جالعاستىردى. – مەن شىرشا ەمەسپىن عوي, قىزىلدى-جاسىلدى ويىنشىقتاردى ءون بويىنا ءىلىپ قوياتىن.
ءسات سايىن, ساعات سايىن عۇمىرى ازايىپ, تالقانى تاۋسىلىپ, ساناۋلى كۇندەرى قالعانىن وعان بىلىكتى دارىگەرلەردىڭ تالايى ءدوپ باسىپ ايتىپ, اششى دا بولسا اۋىر شىندىقتى بىلدىرگەن كورىنەدى. ءبىر عانا امال – تازا اۋادا كوبىرەك جۇرسە بالكىم عۇمىرى ۇزاقتاۋ بولۋى مۇمكىن. سوندىقتان مىڭداعان شاقىرىمدى ارتقا تاستاپ وسىندا كەلگەن جايى بار. ەگەر بۇل جالعاندا, جەر بەتىندە جانىن الىپ قالار پەندە بولسا بارىن سالىپ, ءبارىن بەرەر ءتۇرى بار. وكىنىشكە قاراي, كۇن ساناپ ءوسىپ, اسقىنا تۇسكەن قاتەرلى ىسىكتىڭ بەتىن قايتارار ەشبىر امال جوق كورىنەدى. تەك قانا اللانىڭ جانىن الار كۇنىنە مويىنسۇنىپ, قورقىنىشتى ءساتتى كۇتۋدەن اسقان ازاپ بار ما.
وسىدان كەيىن سايراش كەلىنشەك ءوزىنىڭ دۇنيەگە قىزىققان ۇساقتىعىنا ۇيالىپ, وزگەشە كۇيگە تۇسەدى. بىرتە-بىرتە باسقا ادامعا اينالدى.
ءاۋ باستا سايراش دا وزگەلەر سەكىلدى اۋىلدا تۋىپ-وسكەن, كەيىن وقۋ ىزدەپ ارمان قۋىپ, ويعا العان ماقساتى وڭاي ورىندالعان ادەمى بويجەتكەننىڭ ءبىرى بولدى. كورىكتىلىگىنىڭ ارقاسىندا تاڭداعان جىگىتىنە قوسىلدى. كەلبەتتى بولعان سوڭ ونىڭ ەركەلىگىن ءبارى دە كوتەرەتىن. سوندىقتان دا ءسال ادۋىندىلاۋ بولىپ ءوستى. وزگەلەرگە دەگەنىن ىستەتەدى. ارينە اقىلسىز دا ەمەس. الداعىسىن ويلاپ, وسىنىڭ بولاشاعى زور بولادى-اۋ دەگەن جىگىتتىڭ قولىنان ۇستاي ءبىلدى. بۇل كۇندە ءوزىنىڭ قاتەلەسپەگەنىن كەيىنگى ءومىرىنىڭ ءوزى كورسەتىپ وتىر ەمەس پە, كەزىندە تۇتىنۋشىلار وداعىنىڭ باستىعى بولعان اكەسى بار جىگىتى دە تالاي بيىككە سامعادى. قازىر بولسا, مينيستر. بۇدان ارتىق نە كەرەك.
داڭعاراداي الىپ, ەڭسەلى ۇيدە ەكى جۇرگىزۋشى, ەكى ءۇي كۇتۋشى, اس ءمازىرىن ازىرلەۋشى, سىرتقى اۋلانى تازالاۋشى, ولاردان باسقا ءۇيدىڭ كۇزەتشىلەرى بار. مىنە, سولاردىڭ ءىس-ارەكەتى كوبىنە-كوپ ادۋىندى كەلىنشەكتىڭ كوڭىلىنەن شىعا بەرمەيتىن, ىستەپ جۇرگەن جۇمىستارىن ۇناتپاي, وزدەرىن ءجيى اۋىستىرا بەرەتىن. ۇيدەگى شەتەلدىك قىمبات جيھاز, نەبىر اسىل بۇيىمدار, باعا جەتپەس لاعىل تاستار دا ءبىراز ۋاقىت وتكەن سوڭ ەسكىرگەندەي اسەر ەتىپ, ودان دا قىمباتىراعىن ىزدەپ, وزگەلەردە جوق ەكسكليۋزيۆتى بۇيىمدار بولسا دەپ سونى قولعا تۇسىرگەنشە تىنىم تاپپايتىن. ءوزى سەكىلدى ساناۋلى دوكەيلەردىڭ بايبىشەلەرىمەن اڭگىمەلەرى نەگىزىنەن ەلدە جوق باعالى بۇيىمدار توڭىرەگىندە ءوربيتىن. كىمدەردىڭ قاي ەلدە دەمالىپ كەلگەنى, قاي كەلىنشەكتىڭ وتاعاسى بولاشاقتا قانداي بيلىكتىڭ تۇتقاسىن ۇستايتىنى, كىمنىڭ قانداي مينيستر بولاتىنى بولجانىپ, الدىن الا قىزۋ اڭگىمە وزەگىنە اينالىپ جاتاتىن.
Cايراشتىڭ بويىنداعى وڭ وزگەرىستى كۇيەۋى دە بايقايدى. دەمالىسقا بارماي تۇرىپ, انا كۇتۋشىنىڭ كوزىن قۇرتام, ماعان ۇنامايدى, جەدەل قيمىلدامايدى, ءوزى سىلبىر بىرەۋ دەگەنى ەستە. تاعى بىردە – انا كۇتۋشى دە تويىنىپ الدى, ءۇي تازالاعانى كوڭىلىمنەن شىقپاي ءجۇر, باسقاسىن تاپپاسام دەگەنى بار. وتاعاسى ۇيگە كەلگەن سوڭ كەلىنشەگىنە:
– انا شوفەر ۇنامايدى دەپ ەدىڭ, باسقاسىن اكەلدىم, ءۇي كۇتۋشىسىن دە الماستىرايىق, – دەيدى.
بىراق سايراش بۇرىنعى جۇرگىزۋشىنى الماستىرماي سول كۇيىندە قالدىردى. ال اۋلانى جيىستىراتىن ءۇي كۇتۋشىسىنىڭ بىرەۋىن قالدىرىپ, اس ازىرلەيتىن ەكىنشىسىن بوساتادى. ءبىر شاڭىراق استىنداعى بالالارىنا, كۇيەۋىنە ءوزىنىڭ دە اس ازىرلەپ بەرە الاتىن جاعدايى بار جانە كەزىندە تاماقتىڭ نەشە ءتۇرىن جاساپ, ءبىر كىسىدەي اسپازدىقتىڭ قىرلارىن مەڭگەرىپ العان بولاتىن. اس ءمازىرىن دايىنداۋدىڭ ءوزى كەرەك دەسەڭىز, اناسىنان دارىعان ونەر دەپ تانۋعا بولادى. كوڭىل توعايىپ, تويىنعاندىقتان بىرتە-بىرتە سونى دا ۇمىتا باستاپتى. ەندى مۇنىم ۇيات بولدى-اۋ دەپ تاۋبەگە كەلدى. شۇكىر, دەنساۋلىعى مىقتى. ويلاپ وتىرسا, وزىنەن قولى بوس ادام جوق. ءۇي ىشىندە بالالارمەن بىرگە شۇيىركەلەسىپ اس ۇيدە جۇرگەننىڭ ءوزى كوڭىلدى ەكەن. سونى ەندى جەتە تۇسىنگەندەي بولدى.
استاناعا كەلگەن سوڭ بۇرىننان ارالاسىپ جۇرەتىن ءوزى قاتارلاس بيىك لاۋازىمدى مىقتىلاردىڭ كەلىنشەكتەرىمەن تاعى دا ارالاسا باستادى. وزدەرى عانا باس قوساتىن ۇلكەن وتىرىستاردا تالاي بايقاعانى بار, كەيبىر دوكەيلەردىڭ سۇلۋ جۇبايلارى تىم جاس, ەكىنشى ايەلدەرى.
ولاردىڭ نە كيەم, نە ىشەم دەيتىن قاتارداعى وزەكتى جانداردان الدەقاشان بولەكتەنىپ, قاراپايىم پەندەلەردىڭ كۇيكى تىرلىگىنەن ادا بولىپ, الشاڭ باسىپ جۇرگەندەرى ءوز الدىنا, ەندى ءتىپتى ارماندارى اسقاقتاي تۇسكەن ەدى. تىم مىقتىلارىنىڭ كەيبىر ناقسۇيەرلەرى ءتىپتى ماسايراعاندارى سونشالىق, ەكسكليۋزيۆ دەپ اتالاتىن ىلەۋدە ءبىر عانا كەزدەسەتىن, ارنايى تاپسىرىسپەن جاسالعان, اسقان جوعارى زەرگەرلىكتى تالاپ ەتەتىن گاۋھار (بريلليانت) ساقينا, سىرعالاردى تاعۋعا ىنتىعىپ, سوعان قول جەتكىزۋدى ماقسات ەتىپ قويادى جانە ونى ءبىر سالتاناتتى باسقوسۋدا عانا تاعادى, ەكىنشى مارتە قايتا پايدالانۋ ولار ءۇشىن ۇيات شارۋا. وزگەلەر بايقاپ قالسا, ءتىپتى ماسقارا. ءبىر تويعا ارناپ تىكتىرگەن قىمبات كويلەكتى ەكىنشى مارتە كيۋ دەگەن اتىمەن بولمايدى. الايدا ول بيكەشتەر مۇنداي ورەسكەلدىككە جول بەرە قويمايتىن.
قاراپ وتىرسا, مۇنداعى مىقتىلاردىڭ ۇيىندەگى سىلقىمداردىڭ اراسىندا نەبىر قىلىقتارىمەن كوزگە ءتۇسىپ, ەسىرگەندەرى دە, كەسىرلەنىپ تويىنعاندارى دا بارشىلىق ەكەن.
بىردە سايراش ورتالىق كوشەلەردىڭ بىرىندەگى دۇكەن ماڭىندا جۇپىنى كيىمدى ءبىر ايەل بار داۋسىمەن باقىرىپ, «ەندى قايتتىم, بالالارىم اش قالاتىن بولدى-اۋ, بار اقشامنان ايىرىلىپ ماسقارا بولدىم عوي» دەپ جانى شىعىپ شىرىلداپ تۇرعانىن كورەدى دە قاسىنا كەلىپ ءمان-جايدى سۇرايدى. سويتسە الگى مىسكىن ەكى مىڭ تەڭگەسىن ءتۇسىرىپ الىپ, جانى شىعىپ, قاتتى قينالىپ تۇر ەكەن. سودان ونى كولىگىنە وتىرعىزىپ, ۇيىنە اپارادى دا, جيىرما مىڭ تەڭگەنى قولىنا ۇستاتىپ, بالالارعا ارنالعان قىستىق كيىمدەر مەن اياق-كيىمدەردى ءداۋ سومكەگە سالىپ, وعان قوسا ءبىراز ازىق تۇرلەرىن, تاعامداردى ەكىنشى سومكەگە تولتىرىپ, جۇرگىزۋشىسى ارقىلى ۇيىنە اپارىپ سالۋدى ايتادى. ول ايەل قايتا-قايتا العىسىن جاۋدىرىپ, ۇيىنە قايتادى. سويتسە ونىڭ تۇراتىن جەرى وي-شۇقىرى مول, قالانىڭ شەتىندەگى 15 شاقىرىم جەردەگى ساياجاي ىشىندەگى قۇرقىلتايدىڭ ۇياسىنداي ۇيشىك كۇركەدە ەكەن. جۇرگىزۋشى جولدا باتپاققا تىعىلىپ, ەكى ساعات ءجۇرىپ, الگى ايەلدى مەكەن-تۇراعىنا ازەر جەتكىزىپتى.
كۇنىنە ازىن-اۋلاق ناپاقاعا قول جەتكىزگىسى كەلىپ, شاراسىزدىقتان اللاعا جالبارىنىپ, جاندارى قينالعاندار مەشىت ماڭىندا ءجيى كەزدەسەتىنى بار. بىردە جاراتقاننىڭ بارلىعىنا شاك كەلتىرمەگەن اپەندەلەۋ جاڭا قازاقتىڭ ءبىرى مەشىتكە بارىپ دۇعا قىلىپ, اسپانعا الاقانىن جايىپ, ء«يا, اللا, بيزنەسىمدى ورگە دومالاتا گور, ءبىر ميلليون دوللار بەرىپ, بايلىعىمدى ارتتىرا ءتۇس», دەپ كۇبىرلەپ, وزىنشە قۇدايعا قۇلشىلىق ەتىپ وتىرسا, ونىڭ قاسىنا كەلىپ قاتارلاسا جايعاسقان ءبىر بەيشارا: ء«يا, اللا, تىم بولماسا كۇنىنە مىڭ تەڭگە ناپاقا بەرە گور, بالالارىم اش قالماسىن» دەپ داۋسى قاتتىراق شىعىپ, ەرەكشە ءوتىنىپ, جاراتقانعا جالبارىنا سۇراپ قايتا-قايتا قاقساپ وتىرسا كەرەك. سودان جانىنداعى جاڭا قازاق: ء«اي, سەن, جوقتان وزگەنى سۇراپ, قۇدايدىڭ باسىن قاتىرما, ءما مىڭ تەڭگەنى ال دا كەتە بەر» دەپ الگى مىسكىندى قاسىنان قۋىپ جىبەرىپتى.
سونىمەن سايراش شەتەلدەگى دەمالىستان ورالعان سوڭ مۇلدە وزگەردى. سابىرلى, سالقىنقاندى, ساليقالى كەيىپكە تۇسكەن. ونى ءوزى قاتارلاس قۇربى كەلىنشەكتەر دە بايقايدى. سويلەسە ءسوزدىڭ مايەگىن اعىتاتىن, وزگەلەردى ۇيىتىپ اكەتەتىن, جۇرتتى قاسىنا ءۇيىرىپ الاتىن قاسيەتى بار سايراش بىردە قۇربىلاردىڭ باسىن قوسىپ, ءبىراز پالساپالىق ويلارىن ايتىپ, ءومىر تۋرالى تولعامدارىن ورتاعا سالدى. شيپاجايدا بولعان جايتتى ەسكە الدى. دەننىڭ ساۋلىعىنان, ءبىر جۇتىم اۋادان قىمبات, بالالاردىڭ اماندىعىنان اسقان باقىت, ۇلكەن بايلىق جوق ەكەنىنە وزگەلەردىڭ كوزىن جەتكىزدى.
قازىر سول ءوزى سەكىلدى جاعدايى جاقسى, كۇي-قۋاتى مىقتى كەلىنشەكتەردىڭ ءبىرازى تالاي ادامعا حال-قادەرىنشە قولۇشىن بەرىپ, قينالعاندارعا كومەكتەسە باستاعان. سولاردىڭ ءبىرى شاھارداعى بالالار ءۇيىنىڭ ءبىرىن قاراماعىنا الىپ, اي سايىن قارجىلاي كومەك كورسەتىپ وتىرادى. ازىقپەن كومەكتەسۋ ءوز الدىنا, الپىس بالاعا كيىم اپەرىپ تۇرۋدى مىندەتىنە العان. ال ەندى ءبىر كەلىنشەك مەكتەپ بىتىرگەن جەتىم بالانىڭ بىرەۋىن قولىنا الىپ, وقىتىپ تاربيەلەپ, مۇنتازداي ەتىپ كيىندىرەدى. وعان اعىلشىن ءتىلىن ۇيرەتىپ, دەمەۋشىلىك كورسەتىپ, وسى كۇزدە ەۋروپاعا وقۋعا جىبەرگەنى بار. سايراشتىڭ تاعى ءبىر اقسۇيەك قۇربىسى گەرمانيادان كەلىپ بالا اسىراپ الماق بولعان شەتەلدىك ازاماتتىڭ جولىن كەسىپ, ءتىلىنىڭ مۇكىسى بار بوزبالانى دەفەكتولوگ دارىگەرگە ەمدەتىپ قاتارعا قوسىپ, ساۋابىن الدى.
ايتا بەرسە بۇل سايراشتىڭ جانە ونىڭ قۇربىلارىنىڭ ىستەگەن كوپ جاقسىلىقتارىنىڭ ءبىرى عانا. جالعىز ول عانا ما ەكەن, تاۋبەگە كەلىپ, كومەك قولىن سوزىپ, قايىرىمدىلىق كورسەتىپ جۇرگەن. وتكەن جىلى الماتى كوشەلەرىنىڭ بىرىندەگى دۇڭگىرشەكتە شيەتتەي بالالارىمەن گازەت ساتىپ ەكى جىل تۇرعان ايەلگە اقسايدان ەكى بولمەلى پاتەر الىپ بەرگەن, ءوزى بەلگىسىز بولىپ قالعان ازامات تۋرالى اقپارات قۇرالدارى ايتتى دا. ونداي جاقسىلىعىن جاريالامايتىن, ال شىنىمەن كومەك قاجەت ەتەتىندەرگە قولۇشىن بەرەتىندەر سيرەك تە بولسا كەزدەسەدى عوي.
بۇل كۇندە سايراش كەيبىر لاۋازىمدى قىزمەتكەردەردىڭ كەلىنشەكتەرىنىڭ باسىن قوسىپ, يماندىلىق ۇيىمىن قۇرىپ العان. ولار دا سايراشتىڭ ايتقانىن قالت جىبەرمەيدى. بار دۇنيەلەرىن تاراتىپ بەرمەسە دە, سابالارىنا ءتۇسىپ, اسىپ-تاسقان ادەتتەرىنەن ارىلىپ, وسى تىرلىكتەرىنە شۇكىرشىلىك جاساپ, دۇنيەگە قىزىعۋشىلىق, كورسەقىزارلىق سەكىلدى جاعىمسىز ارەكەتتەردەن ەداۋىر تىيىلعان. قانشا دەگەنمەن, وقىعان, توقىعانى بار, زيالى قاۋىم ورتاسىنان عوي, كوبىنىڭ تۇسىنىگى مول.
عارىشتان تۇسىرىلگەن سۋرەتتەرگە كوز سالساق, جەر شارىنىڭ عاجاپ سۇلۋ بەينەسىن كورەمىز. ەكوجۇيەنىڭ, بيوسفەرانىڭ پايدا بولۋى, جاسىل تابيعاتتىڭ تازالىعى ميلليونداعان جىلداردا قالىپتاستى. الايدا سوڭعى ەلۋ-الپىس جىلدا ورمان ورتەنىپ, الاۋلاعان وت-جالىن تالاي اۋماقتى شارپىپ, ماڭگى مۇزداقتار ەرىپ, كەي جەرلەردە سۋ تاسقىنى ەلدى مەكەندى جايپاپ, ەندى ءبىر تۇستا قۇمدى شولەيت كەسىرىنەن جەر تاقىرعا اينالىپ بارادى. سونىڭ كەسىرىنەن اۋا لاستانىپ, ءتۇرلى ىندەت ورشۋدە.
وسىنىڭ ءبارى بۇگىندە ءبىر جۇتىم اۋا قادىرىن بىلگەن, ساقتىق شارالارىن الىپ, ىندەتتەن اۋلاق جۇرەتىن, شيپاسى مول تازا تابيعاتتىڭ باعاسىن قادىرلەي الاتىن ادام ءۇشىن قاسيەتتى ۇعىم ەكەنىن ەندى بولجاي الدىق پا دەگەن وي كەلەدى. وكپەمىزگە تازا اۋا, ميىمىزعا وتتەگى ەركىن جەتىپ, بارشامىز امان جۇرەيىك. ول ءۇشىن قاسيەتتى جەر-انانى ساقتايىق. تارىلماسىن تىنىسىڭىز, تاۋسىلماسىن ىرىسىڭىز!
ساياسات بەيىسباي,
فيلوسوفيا, ساياساتتانۋ جانە ءدىنتانۋ ينستيتۋتىنىڭ ءبولىم مەڭگەرۋشىسى, ءباسپاسوز ارداگەرى
الماتى
