جۇما كۇنى 12 مىڭ تۇرعىننىڭ كوروناۆيرۋس جۇقتىرعانى انىقتالعان. ال ەلدە تىركەلگەن ناۋقاستاردىڭ جالپى سانى 700 مىڭنان استى. بۇل – باتىس ەۋروپاداعى ەڭ جوعارى كورسەتكىش. وسىلايشا مادريد ءبىرىنشى تولقىن كەزىندەگىدەي يسپانياداعى ىندەتتىڭ وشاعىنا قايتا اينالىپ بارادى. ءبىر قىزىعى, ەلدە دەنساۋلىق ساقتاۋ مينيسترلىگىنىڭ قۇزىرەتى ايماقتارعا جۇرمەيدى. سول سەبەپتى ورتالىق ورگان ايماق باسشىلارىنا ەسكەرتۋ جاساۋدان اسا الماي, شارا قولدانۋعا قولى بايلاۋلى.
جالپى, ايماقتا كەيبىر قاۋىپسىزدىك شارالارى جاسالعانىمەن, ءوڭىردى جارتىلاي جابۋ تۋرالى ۇسىنىستان باس تارتقان. دەنساۋلىق ساقتاۋ ءمينيسترى سالۆادور يليا قازىرگى شارالاردىڭ ەش ناتيجە بەرمەيتىنىن العا تارتىپ, باتىل قادامدار جاسايتىن كەز كەلگەنىن ەسكە سالدى. ويتكەنى دەنساۋلىق ساقتاۋ وكىلى تۇرعىنداردىڭ دەنساۋلىعى مەن ىندەتتىڭ كورشىلەس وڭىرلەرگە تاراپ كەتۋىنە الاڭدايدى.
جالپى, قىس جاقىنداعان سايىن يسپانيا سەكىلدى عالامشاردىڭ سولتۇستىك بولىگىندە ورنالاسقان وزگە دە ەلدەردە ىندەتتىڭ قايتا باس كوتەرگەنى بايقالادى. سوڭعى اپتالاردا تىركەلگەن ناۋقاستار سانى ەكىنشى تولقىننىڭ كەلگەنىن بايقاتتى. دۇنيەجۇزىلىك دەنساۋلىق ساقتاۋ ۇيىمى دا كۇن سالقىنداعانعا دەيىن ەۋروپا مەن وزگە ەلدەرگە قاۋىپسىزدىك شارالارىن قايتا كۇشەيتۋگە كەڭەس بەردى.
