«QazAvtoJol» ۇلتتىق كومپانياسى» اق اقىلى اۆتوموبيل جولدارى ديرەكتسياسى فيليالىنىڭ ديرەكتورى مارات سۇلەيمەنوۆتىڭ ايتۋىنشا, اقىلى جولداردىڭ جاڭا ۋچاسكەلەرىندە تولەم قابىلداۋدىڭ جاڭا جۇيەسى ەنگىزىلمەك.
– كولىكتەر وتەتىن قاقپاعا ارنايى كامەرالار ورناتىلادى. ول كولىكتىڭ ءبىر ايماقتان ەكىنشىسىنە وتكەنىن تىركەيدى. قاجەتتى سوما جۇرگىزۋشىنىڭ جەكە شوتىنان اۆتوماتتى تۇردە ۇستالىنادى. سونداي-اق اۆتوكولىكتىڭ مەملەكەتتىك ءنومىرى ارقىلى تولەم جۇرگىزۋ ءادىسى دە ساقتالماق. بۇدان بولەك RFID بەلگىلەرى ارقىلى تولەم قابىلداۋ جوسپارلانىپ وتىر, – دەدى م.سۇلەيمەنوۆ.
بەلگىلى بولعانداي, جەكە شوتتى ونلاين تولتىرۋعا بولادى. تەرمينال مەن ۇيالى تەلەفون, ينتەرنەت-بانكينگ ارقىلى دا اقشا اۋدارۋ مۇمكىندىگى قاراستىرىلعان.
قازىر قازاقستاندا جالپى ۇزىندىعى 682 شاقىرىم بولاتىن 4 اقىلى جول ۋچاسكەسى بار. اتاپ ايتقاندا نۇر-سۇلتان – ششۋچينسك (ۇزىندىعى 211 شاقىرىم), نۇر-سۇلتان – تەمىرتاۋ (134 شاقىرىم), الماتى – قاپشاعاي (42 شاقىرىم) جانە الماتى – قورعاس (295 شاقىرىم) ۋچاسكەلەرى جۇمىس ىستەپ تۇر.
بۇعان دەيىن حابارلانعانداي, 2020 جىلدىڭ سوڭىنا دەيىن تاعى بىرنەشە ۋچاسكە اقىلى جۇمىس ىستەۋگە كوشەدى. اتاپ ايتقاندا اقىلى جولداردىڭ قاتارىنا شىمكەنت – تاشكەنت, قاپشاعاي – تالدىقورعان, نۇر-سۇلتان – پاۆلودار, اقتوبە – ورال, ورال – تاسقالا سەكىلدى باعىتتار قوسىلادى دەپ كۇتىلۋدە.
– 2024 جىلعا قاراي 11 مىڭ شاقىرىم جولدى اقىلى ەتۋ جوسپارلانىپ وتىر. قازىر 32 جول ۋچاسكەسىندە ءتيىستى جۇمىستار جۇرگىزىلۋدە. جۇمىستار اياقتالىسىمەن ۋچاسكەلەر كەزەڭ-كەزەڭىمەن ىسكە قوسىلادى. اقىلى جۇيەنى ەنگىزۋ ينۆەستورلاردىڭ قاراجاتى ەسەبىنەن تولەنەدى, – دەدى م.سۇلەيمەنوۆ.
ونىڭ ايتۋىنشا, ءتيىستى جۇمىستار جۇرگىزىلىپ جاتقان اقىلى ۋچاسكەلەردى اشپاس بۇرىن قوعامدىق تىڭداۋ وتكىزىلەدى. جەرگىلىكتى حالىق اراسىندا اقپاراتتىق-ناسيحات جۇمىستارى جۇرگىزىلەدى. ەگجەي-تەگجەيلى زەرتتەۋ جاسالعان سوڭ, يندۋستريا جانە ينفراقۇرىلىمدىق دامۋ مينيسترلىگى تولەم مولشەرى مەن جەڭىلدىكتەردى بەكىتەدى. سونداي-اق اۆتوكولىكتىڭ قانداي تۇرىنە تەگىن ءجۇرۋ ءيا جۇرمەۋ قۇقىعى بەرىلەتىنىن دە وسى ۆەدومستۆو انىقتايدى.
– وتكىزۋ پۋنكتىندە كەپتەلىس ورىن الماس ءۇشىن الدىن الا تولەم جاساۋ جۇيەسى ەنگىزىلگەن. سونداي-اق جەڭىل اۆتوكولىكتەر ءۇشىن ارنايى جەڭىلدىكتەر قاراستىرىلعان. ماسەلەن, الدىن الا تولەم جاساعان جاعدايدا تولەماقى ەكى ەسە ارزان بولادى. بۇدان بولەك اقىلى اۆتوجولدىڭ ماڭايىنداعى ەلدى مەكەندەردە تىركەلگەن اۆتوكولىك يەلەرى ءۇشىن ءبىر جىلدىق ابونەمەنت قاراستىرىلعان. ونىڭ قۇنى – 1 مىڭ تەڭگە. تۇراقتى تۇردە جولاۋشىلار تاسىمالدايتىن اۆتوبۋستار تولەمنەن بوساتىلعان. قازىر ءتيىستى زاڭدارعا تۇزەتۋ ەنگىزۋ پىسىقتالۋدا. وندا سوعىس ارداگەرلەرىن, مۇمكىندىگى شەكتەۋلى جانداردى جانە ولارعا تەڭەستىرىلگەن ادامداردى اقى تولەۋدەن بوساتاتىن ارنايى نورما بار, – دەدى «QazAvtoJol» ۇلتتىق كومپانياسىنىڭ وكىلى.
ەسكە سالا كەتەيىك, جولدا اقى تولەۋدەن جالتارعاندار اكىمشىلىك جازاعا تارتىلادى. دالىرەك ايتساق, ءتيىستى نورمانى ەلەمەگەن جەكە تۇلعالار 5 ايلىق ەسەپتىك كورسەتكىش كولەمىندە, ال زاڭدى تۇلعالار 10 ايلىق ەسەپتىك كورسەتكىش كولەمىندە ايىپپۇل ارقالايدى.
اقىلى جولداردى ەنگىزۋدەگى نەگىزگى ماقسات – قولايلى ءارى قاۋىپسىز جول قوزعالىسىمەن قامتاماسىز ەتۋ, سونداي-اق بيۋدجەتكە تۇسەتىن جۇكتەمەنى ازايتۋ. بۇل رەتتە اقىلى ۋچاسكەلەر ءوزىن-ءوزى اقتاپ وتىر دەسە دە بولعانداي.
رەسمي مالىمەتكە سۇيەنسەك, 2019 جىلدىڭ قورىتىندىسى بويىنشا قولدانىستاعى ءتورت اقىلى جول ۋچاسكەسىنەن 5 ملرد 380 ملن تەڭگە جينالعان. تارقاتىپ ايتساق, نۇر-سۇلتان – تەمىرتاۋ باعىتىنان 1,7 ملرد تەڭگە, نۇر-سۇلتان – ششۋچينسك باعىتىنان 1, 700 ملن تەڭگە, الماتى – قورعاس باعىتىنان 988 ملن تەڭگە, الماتى – قاپشاعاي باعىتىنان 972 ملن تەڭگە تۇسكەن. وتكەن جىلى اتالعان ۋچاسكەلەر ارقىلى 10,5 ملن اۆتوكولىك ءجۇرىپ وتكەن.
– زاڭعا سايكەس, جينالعان قارجىنىڭ ءبارى اقىلى جولداردى جوندەۋگە, كۇتىپ ۇستاۋعا, قىزمەتىن ۇيىمداستىرۋعا, قاجەتتى تەحنيكالاردى ساتىپ الۋعا جۇمسالادى. قىستا قاردان تازالاۋ كەرەك. قار توقتاتاتىن باعاندار ورناتىلادى. كوكتەمدە سۋ وتەتىن قۇبىرلاردى رەتتەۋ قاجەت. جول بەلگىلەرىن اۋىستىرۋ, جاڭادان قويۋ سەكىلدى جۇمىستار بار. تۇسكەن قارجى تەك وسى ماقساتتارعا عانا جۇمسالادى, – دەدى م.سۇلەيمەنوۆ.
كومپانيا وكىلىنىڭ ايتۋىنشا, اقىلى جولداردىڭ بويىندا اتالعان جۇمىستاردى رەتتەيتىن 8 ورتالىق سالىنعان. جولداردى كۇتىپ ۇستاۋعا ارنالعان 89 تەحنيكا بار. ولاردىڭ بارلىعى دەرلىك بيىلعى قىس ماۋسىمىنا ساقاداي-ساي.
– 30 قىركۇيەككە دەيىن 8 ورتالىقتى قاجەتتى وتىنمەن, كومىرمەن, گازبەن, جانار-جاعارمايمەن قامتۋ جوسپارلانعان. جولداعى قاتقان مۇزدى ەرىتەتىن تۇز ساتىپ الىندى. بىلتىر قىستاعى تايعاقتى جويۋ ءۇشىن ناتري جانە كالتسي ءحلوريدىنىڭ نەگىزىندە الىنعان حيميالىق قوسپالار سىناقتان وتكىزىلگەن ەدى. رەاگەنت تيىمدىلىگىن دالەلدەدى. بيىل ءدال وسىنداي رەاگەنتتىڭ 50 تونناسىن جەتكىزۋ جۇكتەلدى. قازىر قوردا 29 تونناسى بار, – دەدى ول.
