ايماقتار • 27 قىركۇيەك، 2020

اتىراۋدا جازاتايىم وقيعادان 5 جۇمىسشى كوز جۇمدى

1382 رەت كورسەتىلدى

ەڭبەك زاڭدىلىعىن بۇزۋ تيىلار ەمەس. مۇنى جىل باسىنان بەرى ازاماتتاردىڭ اتىراۋ وبلىستىق مەملەكەتتىك ەڭبەك ينسپەكتسياسى باسقارماسىنا 762 شاعىم تۇسىرۋىنەن بايقاۋعا بولادى، دەپ حابارلايدى Egemen.kz.

باسقارما ماماندارى 726 شاعىمدى تەكسەرىپ، 313 ازاماتتىڭ ەڭبەك قۇقىعىن قورعادى.

"ەڭبەك ينسپەكتورلارىنىڭ جۇمىس بەرۋشىلەرمەن ىنتىماقتاسا ارەكەت ەتۋىنىڭ ناتيجەسىندە 27 جۇمىسشىنىڭ 3،2 ملن تەڭگە جالاقىسى ءوندىرىلىپ، جۇمىسكەرلەرمەن ەڭبەك شارتتارى جاساقتالدى. ال، شاعىمدار نەگىزىندە، سونداي-اق، جوسپارلى تۇردە 80 تەكسەرۋ جۇرگىزىلدى. سونىڭ ناتيجەسىندە ەڭبەك زاڭناماسىن بۇزۋدىڭ 135 دەرەگى انىقتالدى. اتالعان زاڭسىزدىقتاردى جويۋ ءۇشىن 67 ۇيعارىم ەنگىزىلىپ، 39 اكىمشىلىك حاتتاما تولتىرىلدى. زاڭ تالابىن بۇزۋشىلارعا 14،2 ملن تەڭگە ايىپپۇل سالىندى. ايىپپۇلدىڭ 4،9 ملن تەڭگە ءوندىرىلدى"، دەدى وبلىستىق مەملەكەتتىك ەڭبەك ينسپەكتسياسى باسقارماسىنىڭ باسشىسى يگىلىك اۋباكىروۆ.

ونىڭ ءمالىم ەتۋىنشە، وندىرىستە جۇمىستى دۇرىس ۇيىمداستىرۋعا ءمان بەرىلمەيدى. ءتىپتى جارامسىز كولىكتەر مەن قوندىرعىلار پايدالانىلىپ، قاۋىپسىزدىك ەرەجەلەرى ساقتالمايدى. مۇنىڭ ءبارى جازاتايىم وقيعالاردىڭ ورىن الۋىنا سەبەپ وتىر.

"جىل باسىنان بەرى وسىنداي جاعدايلاردىڭ سالدارىنان 5 جۇمىسشى قازا بولدى. ال، 7 جۇمىسشى اۋىر دەنە جاراقاتىن الدى. وسى دەرەككە قاتىستى ارنايى تەرگەۋ قۇجاتتارى قۇقىق قورعاۋ ورگاندارىنا جولداندى. دەمالىس كۇندەرى ىستەلگەن جۇمىس ءۇشىن ەڭبەكاقىنى تولەمەيتىن بىرنەشە مەكەمە انىقتالدى"، دەدى يگىلىك اۋباكىروۆ.

سوڭعى جاڭالىقتار

ۇقساس جاڭالىقتار