ۇكىمەت • 27 قىركۇيەك، 2020

ا. مامين مەن تاتارستان پرەزيدەنتى ءۇش اۆتوموبيل جاساۋ جوباسىن باستاپ بەردى

203 رەت كورسەتىلدى

پرەمەر-مينيستر ا. مامين مەن تاتارستان پرەزيدەنتى ر. ميننيحانوۆ ءۇش اۆتوموبيل جاساۋ جوباسىن باستاپ بەردى، دەپ حابارلايدى Egemen.kz پرەمەر-ءمينيستردىڭ ءباسپاسوز قىزمەتىنە سىلتەمە جاساپ.

بۇگىن قوستاناي قالاسىندا قر پرەمەر-ءمينيسترى اسقار مامين مەن تاتارستان پرەزيدەنتى رۋستام ميننيحانوۆ كەلىسسوز جۇرگىزىپ، قازاقستاندا 261 ملرد تەڭگە ينۆەستيتسياعا ءۇش بىرلەسكەن اۆتوموبيل جاساۋ جوباسىن ىسكە اسىرۋدى باستاپ بەردى، اتاپ ايتساق: قوستاناي يندۋستريالىق ايماعىندا «كاماز» شويىن قۇيماسىن جانە جۇك تەحنيكاسىنىڭ كوپىرلەرىنە ارنالعان قۇرامداس بولشەكتەر ءوندىرۋ زاۋىتتارىن سالۋ، سونداي-اق قاراعاندى وبلىسىنىڭ ساران قالاسىندا اۆتوموبيل شينالارى ءوندىرىسىن اشۋ.

قوستاناي قالاسىندا شويىن قۇيماسىن جانە جۇك تەحنيكاسىنىڭ كوپىرلەرىنە ارنالعان كومپونەنتتەردى ءوندىرۋ زاۋىتتارىنىڭ قۇرىلىسىنا ارناپ تاس قويۋ راسىمىنە رف ونەركاسىپ جانە ساۋدا ءمينيسترىنىڭ ورىنباسارى ا. موروزوۆ، «كاماز» جاق باس ديرەكتورى س. كوگوگين جانە «اگروماشحولدينگKZ» اق ديرەكتورلار كەڭەسىنىڭ توراعاسى ا. لاۆرەنتەۆ قاتىستى.

1

بىرلەسكەن كاسىپورىنداردىڭ جوبالىق قۋاتتىلىعى جىلىنا 40 مىڭ قۇيىلعان كومپونەنتتى (تسيليندر بلوكتارى، تسيليندر بلوكتارىنىڭ باستيەكتەرى جانە جۇك اۆتوموبيلدەرىنە ارنالعان كوپىر كارتەرىنىڭ تۇتاس قۇيىلعان ارقالىقتارى) جانە جۇك اۆتوموبيلدەرىنىڭ جەتەكشى كوپىرلەرىنىڭ باس بەرىلىستەرىنىڭ 86 مىڭ رەدۋكتورىن قۇرايدى. ينۆەستيتسيانىڭ جالپى كولەمى — 150،7 ملرد تەڭگە. شەكتەس سالالاردى ەسكەرە وتىرىپ، شامامەن 1 200 جاڭا جۇمىس ورنى قۇرىلادى. ءونىمدى جەرگىلىكتەندىرۋ دەڭگەيى 60-70%-عا جەتەدى. زاۋىتتاردى سالۋدى 2023 جىلى اياقتاۋ كوزدەلگەن.

جوبالاردى ىسكە اسىرۋ قازاقستاندى تمد نارىعىنداعى جۇك تەحنيكاسىن ءىرى ءوندىرۋشى جەتكىزۋشىلەردىڭ جاھاندىق تەحنولوگيالىق تىزبەگىنە قوسادى — «كاماز» جاق – ءونىمنىڭ 95%-ى ەكسپورتتالادى.

ا. مامين مەن تاتارستان پرەزيدەنتى ر. ميننيحانوۆتىڭ قاتىسۋىمەن قاراعاندى وبلىسىنىڭ اكىمدىگى مەن «تاتنەفت» جاق اراسىندا اۆتوموبيل شينالارىن ءوندىرۋ جوباسىن قاراعاندى وبلىسىنىڭ ساران قالاسىندا ىسكە اسىرۋ تۋرالى ينۆەستيتسيالىق مەموراندۋمعا قول قويىلدى.

4

زاۋىتتىڭ وندىرىستىك قۋاتتىلىعى جەڭىل تەحنيكاعا ارنالعان 3 ملن شينا مەن كوممەرتسيالىق تەحنيكا جانە اۆتوبۋستارعا ارنالعان 500 مىڭ شينانى قۇرايدى. مۇندا 1 مىڭنان استام جاڭا جۇمىس ورنى قۇرىلادى. ينۆەستيتسيانىڭ جالپى كولەمى شامامەن 111 ملرد تەڭگەنى قۇرايدى. جوبانى 2022 جىلى ىسكە اسىرۋ جوسپارلانعان.

قر ۇكىمەتىنىڭ باسشىسى اۆتوموبيل جاساۋ سالاسىنداعى جاڭا جوبالار قازاقستان مەن رەسەي اراسىنداعى ونەركاسىپتىك كووپەراتسيانىڭ ناقتى پراكتيكالىق كەڭەيۋىن ايعاقتايتىنىن اتاپ ءوتتى.

«اۆتوموبيل جاساۋ سالاسىنداعى ءوندىرىس كولەمى جىل باسىنان بەرى 51،8%-عا ۇلعايدى، نەگىزگى كاپيتالعا سالىنعان ينۆەستيتسيالار 6،6 ەسەدەن استامعا – 9،4 ملرد تەڭگەگە دەيىن ارتتى»، — دەدى ا. مامين.

ۇكىمەت باسشىسىنا اۋىل شارۋاشىلىعى تەحنيكاسىن جيناۋ جانە كادەگە جاراتۋ زاۋىتىن، سونداي-اق «كاماز» ينجينيرينگ ورتالىعىن اشۋدىڭ بىرلەسكەن قازاقستان – رەسەي جوبالارى تانىستىرىلدى.

ءىس-شارا اياسىندا اۆتوموبيل جاساۋدا بىرلەسكەن جوبالاردى ىسكە اسىرۋ بويىنشا 8 كەلىسىمگە، ونىڭ ىشىندە كولىك قۇرالدارى مەن اۋىل شارۋاشىلىعى تەحنيكاسىنا كومپونەنتتەردى ونەركاسىپتىك قۇراستىرۋ تۋرالى كەلىسىمگە، ينۆەستيتسيالىق كەلىسىمشارتتارعا، قارجى ليزينگى، ۇزاق مەرزىمدى جەتكىزۋ شارتتارىنا، عىلىمي-زەرتتەۋ جۇمىستارىن جۇرگىزۋ جانە ماشينا جاساۋ ءۇشىن كادرلاردى دايارلاۋ ماسەلەلەرى بويىنشا ىنتىماقتاستىق تۋرالى مەموراندۋمعا قول قويىلدى.

جۇمىس ساپارى بارىسىندا قر پرەمەر-ءمينيسترى ا. مامين رەسەيلىك «كاماز» جانە «تاتنەفت»، وزبەكتىڭ «UzAuto» كومپانيالارىنىڭ باسشىلىعىمەن اۆتوموبيل جاساۋ سالاسىنداعى ىنتىماقتاستىقتى ودان ءارى دامىتۋ كەلەشەگىن تالقىلادى، سونداي-اق «سارىارقااۆتوونەركاسىپ» اق قىزمەتىمەن، ونىڭ ىشىندە وندىرىسكە ازىرلەنىپ جاتقان JAC ءاۆتوموبيلىنىڭ جاڭا ۇلگىلەرىمەن تانىستى.

سوڭعى جاڭالىقتار

ۇقساس جاڭالىقتار