رۋحانيات • 27 قىركۇيەك، 2020

اقتوتى رايىمقۇلوۆا بۇكىلالەمدىك تۋريزم كۇنىمەن قۇتتىقتادى

17 رەت كورسەتىلدى

مادەنيەت جانە سپورت ءمينيسترى اقتوتى رايىمقۇلوۆا Facebook پاراقشاسىندا تۋريزم سالاسىنا ۇلەس قوسىپ جۇرگەن ازاماتتاردى بۇكىلالەمدىك تۋريزم كۇنىمەن قۇتتىقتادى، دەپ حابارلايدى Egemen.kz.

"قۇرمەتتى تۋريستىك سالا قىزمەتكەرلەرى! سىزدەردى جانە وسى سالانىڭ دامۋىنا ءوز ۇلەسىن قوسقان بارلىق ازاماتتى جارتى عاسىردان استام ۋاقىت بويى اتالىپ كەلە جاتقان بۇكىلالەمدىك تۋريزم كۇنىمەن قۇتتىقتايمىن"، دەپ جازدى مينيستر.

ونىڭ ايتۋىنشا، سوڭعى جىلدارى ەلىمىزدە تۋريستەردىڭ كەلۋىنە قولايلى بولۋى ءۇشىن بارلىق قاجەتتى جاعداي جاسالۋدا. "ينفراقۇرىلىم دامىپ، نورماتيۆتىك-قۇقىقتىق بازا مەن كادرلىق الەۋەت جەتىلدىرىلۋدە، مەملەكەتتىك قولداۋ شارالارى ەنگىزىلىپ، جاڭا وبەكتىلەر سالىنۋدا، سونداي-اق، قىزمەت كورسەتۋدىڭ جاڭا تاسىلدەرى ەنگىزىلۋدە. تۋريزم ەلىمىزدىڭ كەڭ بايتاق جەرىن ارالاۋعا جانە تاريحي-مادەني نىساندارمەن تانىسۋعا قىزىعۋشىلىعى ارتىپ كەلە جاتقان ادامدار ءومىرىنىڭ اجىراماس بولىگى بولىپ تابىلادى"، دەدى ول.

رايىمقۇلوۆا پاندەميانىڭ تۋريزم سالاسىنا اسەرىن دە ايتىپ ءوتتى.

"پاندەميانىڭ بۇكىل ساياحات يندۋسترياسىنا ۇلكەن وزگەرىستەر ەنگىزگەنى ءسوزسىز، بىراق ءبىز، وسىعان قاراماستان، كارانتيندىك شەكتەۋلەردىڭ اسەرىن جەڭىلدەتەتىن بىرقاتار شارانى بىرگە ازىرلەپ، ەنگىزدىك. بۇل رەتتە تۋريستىك قوعامداستىقتىڭ اتالعان پروتسەستەردىڭ بارلىعىنا بەلسەندى قاتىسقانىن ەرەكشە اتاپ وتكىم كەلەدى. وسى جىلدىڭ بارشا قيىندىقتارىنا قاراماستان، سىزدەر باتىلدىق ساقتاپ، سالامىزدىڭ ودان ءارى جۇمىس ىستەۋىن جالعاستىرۋى ءۇشىن كۇش سالىپ كەلەسىزدەر"، دەدى مينيستر.

مينيستر ىشكى ءتۋريزمنىڭ دامۋىنا قانداي جاعدايلار جاسالىپ جاتقانىن ايتتى.

"بۇگىندە جاعداي بىرتە-بىرتە تۇراقتانۋدا جانە قازاقستان سالانى قالپىنا كەلتىرۋ ءۇشىن، سونداي-اق ودان ءارى دامىتۋ جونىندەگى قوسىمشا شارالار قابىلداۋ ءۇشىن قاجەتتى رەسۋرستارعا يە. ناتيجەسىندە، زاڭنامالىق دەڭگەيدە كاسىپكەردىڭ ينۆەستيتسيالىق شىعىندارىنىڭ ءبىر بولىگىن وتەۋ، سالىقتىق جانە كەدەندىك ارتىقشىلىقتار بەرۋ، كەلۋ ءتۋريزمى سالاسىنداعى تۋروپەراتورلاردى سۋبسيديالاۋ، 15 جاسقا دەيىنگى بالالار ءۇشىن ەل ىشىندە تۋريستىك ماقساتتاردا تەگىن ۇشۋدى ۇسىنۋ سىندى جانە وزگە دە شارالار ەنگىزىلۋدە. وسى شارالاردىڭ بارلىعى ءبىزدىڭ ىشكى جانە كەلۋ ءتۋريزمىن دامىتۋ سالاسىنداعى ۇستانىمدارىمىزدى كۇشەيتۋگە مۇمكىندىك بەرەدى"، دەپ قوستى رايىمقۇلوۆا.

ول وسى سالادا تىنباي ەڭبەك ەتىپ جۇرگەن جاندارعا جاڭا تۋريستىك ونىمدەر مەن سەنىمدى سەرىكتەستىك تىلەدى.

"قىمباتتى دوستار، سىزدەرگە شىدامدىلىقتارىڭىز بەن سالانى دامىتۋعا دەگەن نىق سەنىمدەرىڭىز ءۇشىن شىن جۇرەكتەن العىس ايتامىن. بارشاڭىزعا زور دەنساۋلىق، ويداعى جوسپارلارىڭىزدىڭ تابىستى جۇزەگە اسۋىن، سەنىمدى سەرىكتەستەر مەن جاڭا تۋريستىك ونىمدەر تىلەيمىن!"، دەدى ول.

سوڭعى جاڭالىقتار

ۇقساس جاڭالىقتار