ايماقتار • 27 قىركۇيەك، 2020

قارۋلى كۇشتەردىڭ سپارتاكياداسى ءوتتى

14 رەت كورسەتىلدى

الماتىدا اسكەري-قولدانبالى سپورت تۇرلەرىنەن قر قارۋلى كۇشتەرىنىڭ XVII سپارتاكياداسى اياسىندا اوسك بازاسىندا وفيتسەرلىك جانە اسكەري ءۇشسايىستان چەمپيوناتتار وتۋدە، دەپ حابارلايدى Egemen.kz قورعانىس مينيسترلىگىنىڭ ءباسپاسوز قىزمەتىنە سىلتەمە جاساپ.

وعان ەلىمىزدىڭ قارۋلى كۇشتەرىنىڭ اسكەري تۇرلەرى مەن تەكتەرىنەن، وڭىرلىك قولباسشىلىقتار مەن جوعارى اسكەري وقۋ ورىندارىنان 14 كوماندا بويىنشا 140-تان استام اسكەري قىزمەتشى قاتىسۋدا.

جارىس باعدارلاماسىنا «وفيتسەرلىك ءۇش سايىس» (ماكاروۆ تاپانشاسىنان اتۋ، جۇگىرۋ جانە ءجۇزۋ) جانە «اسكەري ءۇش سايىس» (كالاشنيكوۆ اۆتوماتىنان اتۋ، ف-1 گراناتاسىن لاقتىرۋ كەدەرگىلەر جولاعىنان ءوتۋ) كىرەدى. ءار سايىس بەلگىلى ءبىر شەبەرلىك پەن جاقسى دەنە شىنىقتىرۋدى قاجەت ەتەدى. جۇزۋدە كۇش پەن تەحنيكا، جۇگىرۋدە – توزىمدىلىك پەن جىلدامدىق، اتۋدا-قولدىڭ دالدىگى مەن قاتتىلىعى قاجەت.

-2017 جىلى «دەنە شىنىقتىرۋ جانە سپورت تۋرالى» قر زاڭىنا وزگەرىستەر ەنگىزىلدى. ونىڭ نەگىزىندە نورماتيۆتىك-سپورتتىق بىلىكتىلىككە سايكەس اسكەري قىزمەتشىلەرگە اسكەري – قولدانبالى سپورت تۇرلەرى بويىنشا «قازاقستان رەسپۋبليكاسىنىڭ سپورت شەبەرى» اتاعى، تورەشىلەرگە – «قازاقستان رەسپۋبليكاسىنىڭ ۇلتتىق سپورت تورەشىسى»، «جوعارى ساناتتى ۇلتتىق سپورت تورەشىسى» بەرىلەدى، - دەپ ءتۇسىندىردى قر قم سك-اوسك توراعاسىنىڭ مىندەتىن ۋاقىتشا اتقارۋشى، جارىستىڭ باس تورەشىسى پودپولكوۆنيك ەركەبۇلان ءتۇسىپحانوۆ.

وفيتسەرلىك جانە اسكەري ءۇشسايىس تمد-عا قاتىسۋشى مەملەكەتتەر ارميالارى سپارتاكياداسىنىڭ باعدارلاماسىنا جانە دۇنيەجۇزىلىك اسكەري سپورتتىق ويىندارعا (CISM) ەنگىزىلدى. سايىستا قازاقستاندىق اسكەري قىزمەتشىلەر تۇراقتى تۇردە جۇلدەلى ورىندارعا يە بولادى.

سوڭعى جاڭالىقتار

ۇقساس جاڭالىقتار