ايماقتار • 25 قىركۇيەك، 2020

ماڭعىستاۋ چەحيامەن قارىم-قاتىناستى جانداندىرادى

21 رەت كورسەتىلدى

ايماق باسشىسى سەرىكباي ترۇموۆ چەح رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى رۋدولف گيكل مىرزانى قابىلدادى. بۇل تۋرالى ماڭعىستاۋ وبلىسى اكىمىنىڭ ءباسپاسوز قىزمەتى حابارلادى، دەپ جازادى Egemen.kz

ءوڭىر باسشىسى ر.گيكلعا ءىلتيپات ءبىلدىرىپ، كەزدەسۋ ەكىجاقتى بەلسەندى ىنتىماقتاستىقتىڭ باستاۋى بولاتىنىنا سەنىم ءبىلدىردى.

ء"بىزدىڭ ءوڭىر ءوزارا ارىپتەستىك بويىنشا كەز -كەلگەن ديالوگقا اشىق جانە ينۆەستيتسيالار تارتۋعا مۇددەلى. ءبىز ءوز تاراپىمىزدان "اقتاۋ تەڭىز پورتى اەا" ەركىن ەكونوميكالىق ايماعىندا ينۆەستيتسيالىق جوبالاردى ورنالاستىرۋدى ۇسىنا الامىز. بارلىق قىزىعۋشىلىق تانىتقان كاسىپكەرلەرگە قولداۋ كورسەتۋگە دايىنبىز جانە سىزدەردى ءوزارا ءتيىمدى ىنتىماقتاستىققا شاقىرامىز"، دەدى ماڭعىستاۋ وبلىسىنىڭ اكىمى س.ترۇموۆ.

كەزدەسۋدە نەگىزىنەن اۋىل شارۋاشىلىعى، ونەركاسىپ، جاسىل تەحنولوگيالار جانە ستارتاپتار بويىنشا ساۋدا-ەكونوميكالىق ىنتىماقتاستىقتىڭ جاي-كۇيى مەن دامۋ پەرسپەكتيۆالارى ماسەلەلەرى تالقىلاندى. سونىمەن قاتار تاراپتار اقتاۋدى كولىك حابى رەتىندە دامىتۋ مۇمكىندىكتەرى تۋرالى ايتتى.

بۇگىندە ماڭعىستاۋ وبلىسى تۇركيا، رەسەي، قىتاي، يتاليا، اقش، گەرمانيا جانە ت.ب. ءىرى شەتەلدىك ينۆەستورلارمەن ءوز قىزمەتىن جۇزەگە اسىرۋدا. ماڭعىستاۋ وبلىسى مەن چەح رەسپۋبليكاسى اراسىنداعى جالپى تاۋار اينالىمى 2020 جىلعى قاڭتار-شىلدە ارالىعىندا 1640،49 مىڭ اقش دوللارىن قۇرادى. ماڭعىستاۋ وبلىسىندا چەح كاپيتالىنىڭ قاتىسۋىمەن ەكونوميكانىڭ ءتۇرلى سالالارىندا 4 بىرلەسكەن كاسىپورىن تىركەلگەن.

وبلىستى دامىتۋدىڭ باسىم باعىتتارى كولىك لوگيستيكاسى، تۋريزم، اگروونەركاسىپتىك كەشەن جانە ەنەرگەتيكا بولىپ تابىلادى. سەرىكباي ترۇموۆ اگروونەركاسىپ كەشەنى سالاسىندا تابيعي كۇن ساۋلەسىنىڭ ۇزاقتىعىن، مال شارۋاشىلىعىن، بالىق شارۋاشىلىعىن دامىتۋدى ەسكەرە وتىرىپ، جىلىجاي شارۋاشىلىعىن دامىتۋعا بولاتىنىن اتاپ ءوتتى.

سونىمەن قاتار ماڭعىستاۋدىڭ كليماتتىق جاعدايى وڭىرگە ەلەكتر ەنەرگياسىنىڭ قوسىمشا رەسۋرسى ءۇشىن كۇن جانە جەل ەلەكتر ستانتسيالارىن سالۋعا مۇمكىندىك بەرەدى. سوندىقتان بالامالى ەنەرگيا كوزدەرىن دامىتۋ ماڭىزدى سەكتور بولىپ تابىلادى. بۇل بولاشاقتا ەلەكتر ەنەرگياسىن ءوندىرۋدىڭ بارلىق ءداستۇرلى ادىستەرىن جوققا شىعاراتىن ەڭ پەرسپەكتيۆالى رەسۋرستاردىڭ ءبىرى بولماق.

سوڭعى جاڭالىقتار

ۇقساس جاڭالىقتار