ايماقتار • 25 قىركۇيەك، 2020

اتىراۋدا جايىق جاعالاۋى اباتتاندىرىلىپ جاتىر

320 رەت كورسەتىلدى

جايىق وزەنىنىڭ سۋى ازايدى. اعىسى تومەندەپ، ارناسى تارىلدى. سول سەبەپتەن، بىلتىردان بەرى وزەن جاعالاۋىن اباتتاندىرۋ قولعا الىندى. ونىڭ بارىسىن وبلىس اكىمى ماحامبەت دوسمۇحامبەتوۆ قوعام بەلسەندىلەرىمەن، سونداي-اق، جاۋاپتى سالا ماماندارىمەن بىرگە باقىلادى، دەپ حابارلايدى Egemen.kz

جاعالاۋدى اباتتاندىرۋ اتىراۋ قالاسىنىڭ ەۋروپا بولىگىندە قارقىندى جۇرگىزىلۋدە. اباتتاندىرۋ ءىسى بەيبارىس كوشەسىندەگى كوپىردەن جاستار ساياباعىنا دەيىنگى ارالىقتى قامتيدى. ازىرگە 7،86 گەكتارداعى قۇرىلىس-مونتاجداۋ جۇمىسى ءجۇرىپ جاتقان اۋماقتىڭ جالپى ۇزىندىعى 1861 مەتردى قۇرايدى.

قازىر جاعالاۋدىڭ جاڭا ۋچاسكەسىندە اتىراۋ قالاسىنىڭ كوركەمدىك سيمۆولدارى، "شاڭىراق" ارحيتەكتۋرالىق ۇلگىدە جاسالعان اۋماق، بالالارعا ارنالعان جانە دەنەشىنىقتىرۋ، جۇگىرۋ، دەمالىس الاڭدارى، ورىندىقتار مەن كۇنقاعارلار  ورناتىلدى.

1

جاعالاۋدى اباتتاندىرۋمەن تانىسقان وبلىس اكىمى ماحامبەت دوسمۇحامبەتوۆ جۇمىستىڭ ساپالى بولۋىن ەسكەرتىپ، كەيبىر ولقىلىقتاردى تۇزەۋدى تاپسىردى. ويتكەنى اتىراۋلىقتار مەن قوناقتاردىڭ سەرۋەندەۋى ءۇىشن قولايسىزدىق بولماۋى ءتيىس.

ال جاعالاۋعا ارباسىمەن كەلگەن قوعام بەلسەندىسى گۇلناز قوسمۇرزيەۆا جۇگىرۋگە، ۆەلوسيپەتپەن جۇرۋگە، جاياۋ جۇرگىنشىلەرگە ارنالعان جولداردىڭ كوڭىلىنەن شىققانىن ايتادى. بىراق، مۇمكىندىگى شەكتەۋلى جاندار مەن بالالارىن اربامەن سەرۋەندەتەتىن انالارعا دا قولايلى بولۋ ءۇشىن بىرنەشە ۇسىنىسىن مەردىگەر كومپانياعا جەتكىزدى.

جايىق جاعالاۋىن اباتتاندىرۋ جۇمىسى نكوك كومپانياسىنىڭ قارجىلاندىرۋىمەن جۇرگىزىلىپ جاتىر.

سوڭعى جاڭالىقتار

ۇقساس جاڭالىقتار