سەرىك ىبىراي, ۆالەري ستەپانەنكو, تالعات راحمەتوۆ, سەرگەي ميروليۋبوۆ سىندى جەرگىلىكتى كاسىپكەرلەر ساپاسى جوعارى قات قۇرىلعىنى تابۋدىڭ جولدارىن ىزدەستىرىپ, اقىرى اقش-قا تاپسىرىس جىبەرىپتى. كوپ كەشىكپەي قوستانايعا مۇحيت اسىپ پۋلسوكسيمەتر جەتتى. كاسىپكەرلەر شاعىن قۇرىلعىلاردى بىردەن وبلىستىق بالالار اۋرۋحاناسىنا جەتكىزىپ, باس دارىگەر ۇلىقبەك اسىلبەكوۆتىڭ قولىنا تابىس ەتتى.
– بۇل قۇرىلعىلار پاندەميا جاعدايىندا قوس وكپەسى قابىنعان ناۋقاستارعا اسا قاجەت. بيىلعى بيۋدجەتتە پۋلسوكسيمەتر الۋعا قارجى قاراستىرىلماعان. ونىڭ ۇستىنە قازىر مۇنىڭ باعاسى دا شارىقتاپ كەتتى. بۇرىن بىرەۋىن 5 مىڭ-7 مىڭ تەڭگەگە ساتىپ الۋعا بولاتىن. ال قازىر ءار قۇرىلعى ءۇشىن 150 مىڭ تەڭگە سۇرايدى. ەمدەۋ مەكەمەلەرىندە قاجەت نارسەنى ساتىپ الۋدىڭ ءوزى باياۋ جۇرەدى عوي. بۇل ءۇشىن مەملەكەتتىك ساتىپ الۋدىڭ ساتىلارىنان ءوتۋ كەرەك. وسىلايشا ۋاقىتتان ۇتىلۋعا تۋرا كەلەدى. سىزدەر ناعىز ساۋاپتى ءىستى قولعا الىپسىزدار, بۇگىنگىدەي سىندارلى كەزەڭدە قول ۇشىن سوزىپ, قولداۋ كورسەتىپ جاتقاندارىڭىز ءۇشىن راحمەت! بۇل ولشەگىش قۇرالداردى اۋرۋحانا بولىمدەرىنە تاراتىپ بەرەمىز, – دەدى ۇ.اسىلبەكوۆ.
باس دارىگەردىڭ ايتۋىنشا, پاندەميا باستالعالى بالالار اۋرۋحاناسىنا ءىرىلى-ۇساقتى كاسىپورىندار مەن جەكە كاسىپكەرلەردەن كوپتەپ كومەك تۇسە باستاپتى. مىسالى, جەرگىلىكتى «ولجا-اگرو» سەرىكتەستىگى اۋرۋحانانىڭ بەيىمدەۋ بولىمىنە ەكى گيدروماسساج دجاكۋزيىن الىپ بەرگەن.
– كوپ كاسىپكەرلەر وزدەرى قوڭىراۋ شالىپ, بىزگە قول ۇشىن سوزعىسى كەلەتىنىن ايتىپ, ءتۇرلى ۇسىنىس ءبىلدىرىپ جاتىر. بۇل بيزنەس وكىلدەرىنىڭ الەۋمەتتىك جاۋاپكەرشىلىگىنىڭ جوعارى ەكەنىن كورسەتەدى, – دەيدى باس دارىگەر.
قوستاناي وبلىسى
