ايماقتار • 25 قىركۇيەك، 2020

ءبىلىم – باستى قۇندىلىق

11 رەت كورسەتىلدى

Covid-19 ىندەتىنە بايلانىستى جاريالانعان كارانتين كەزىندە باتىس­قازاقستاندىق مەكتەپتەر وقۋشىلارعا قاشىقتان ءبىلىم بەرۋ ءۇشىن كەشەندى شارالار اتقاردى.

جالپى وڭىردە 380 مەملەكەتتىك مەكتەپ جۇمىس ىستەيدى. بۇل ءبىلىم وردالارىندا 111 282 وقۋشى وقىپ جاتىر.

– بيىلعى جاڭا وقۋ جىلى باستالعاندا الەمدى جايلاعان پاندەمياعا بايلانىس­تى وقۋشىلار مەن قىزمەتكەرلەردىڭ قاۋىپسىزدىگىن، دەنساۋلىعىن قامتاماسىز ەتۋ باستى نازاردا بولدى، – دەيدى وبلىستىق ءبىلىم بەرۋ باسقارماسىنىڭ باسشىسى ايگۇل مىڭباەۆا.

قىركۇيەكتە سانيتارلىق دارىگەردىڭ رۇقساتىمەن ەپيدەميالىق جاعدايى قالىپتى ەلدى مەكەندەردەگى 249 مەكتەپ شتاتتىق رەجىمدە جۇمىسىن باس­تا­عان بولاتىن. قازىر بۇل مەكتەپتەردە 24 399 وقۋشى، ياعني بارلىق وقۋ­شى كونتينگەنتىنىڭ 21،9 پايىزى ادەت­تەگىدەي وقىپ جاتىر. ال 131 مەكتەپتە وقىتۋ قاشىقتان ۇيىمداستىرىلىپ، وقۋشى­لاردىڭ 48،7%-ى (54 273 وقۋشى) قام­تىلعان.

ودان بولەك، اتا-انالاردىڭ وتىنى­شىمەن 15 وقۋشىدان اسپايتىن كەزەكشى سىنىپتار جۇمىس ىستەۋىنە رۇقسات ەتىلگەن بولاتىن. بۇگىندە وبلىستاعى باستاۋىش سىنىپ وقۋشىلارىنىڭ 66،2 پايىزى، ياعني 32 610 وقۋشى، مەكتەپالدى دايارلىق سىنىپتارىنىڭ 53،3 پايىزى، ياعني 4 286 وقۋشى وسىنداي كەزەكشى سىنىپتاردا ءبىلىم الىپ جاتىر.

 

قاۋىپسىزدىك – باستى تالاپ

ارينە، شتاتتىق رەجىمدە جۇمىس ىستەيتىن جانە كەزەكشى سىنىپتارى بار مەكتەپتەر سانيتارلىق-ەپيدەميالىق تالاپتاردى قاتاڭ ساقتاۋى قاجەت.

– بۇل تالاپتاردى ساقتاۋ ءۇشىن جەر­گىلىكتى بيۋدجەت ەسەبىنەن دەزينفەك­تسيالىق قۇرال­دار، تەپلوۆيزورلار، باك­تەريتسيدتى لامپالار ساتىپ الىندى. سونىمەن قاتار يۋنيسەف حالىقارالىق ۇيىمى ارقىلى وبلىستىڭ بارلىق شاعىن جيناقتى مەك­تەبىنە سانيتايزەرلەر، تەمپەراتۋرانى ول­شەۋىش قۇرالدار (تەرموسكانەر) جانە سانيتارلىق نورمالار، گيگيەنانى ساقتاۋ، COVID-19 جونىندە اقپاراتتىق ماتەريال­دار تەگىن تاراتىلدى، – دەيدى ايگۇل مىڭ­باەۆا.

مەكتەپ عيماراتتارىندا وقۋشىلار ءبىر باعىتتا قوزعالۋى ءۇشىن دالىزدەر ەدەنىندە قوزعالىس بەلگىلەرى سالىندى. ۇلكەن مەكتەپتەردە وقۋشىلار بىرنەشە جەردەن كىرۋى ءۇشىن قوسىمشا ەسىكتەر بەلگىلەندى. ءار وقۋشى جەكە پارتاعا وتىرادى. ساباق بارىسىندا بەتپەردەسىن بىرنەشە مارتە اۋىستىرادى. مەكتەپتىڭ كىرەبەرىسىندە اياقكيىمگە ارنالعان دەزينفەكتسيا كىلەمشەلەرى، بارلىق قاباتتا قولدى وڭدەۋگە ارنالعان سانيتايزەرلەر ورناتىلدى.

 

قاشىقتان وقىعاندار قاتاردان قالمايدى

جاڭا وقۋ جىلى قارساڭىندا جەر­گىلىكتى بيۋدجەتتىڭ ۇنەمدەلگەن قارجىسى ەسەبىنەن 1053 جانە ەل ۇكىمەتى رە­زەر­ۆىنەن 14 970 كومپيۋتەرلىك قۇ­رىل­عى ساتىپ الۋعا قاراجات بو­لىن­گەن. بۇل قۇرىلعى­لاردى ساتىپ الۋ، كوم­پيۋ­­تەرلىك تەحنيكانى ءبولۋ بو­يىنشا «اق­جايىق – ادالدىق الا­ڭى» جوبالىق كەڭسەسى باسشىسى تورا­عالىعىمەن قۇ­رامىندا اتا-انالار كوميتەتتەرى مەن قامقورشىلىق كەڭەس مۇشەلەرى، قو­عامدىق ۇيىم وكىلدەرى بار جۇمىس توبى قۇرىلدى. اۋدان جانە قالا دەڭ­گەيىندە دە مۇقتاج وقۋشىلارعا كوم­پيۋتەرلەردى تاراتۋ جۇمىسى قاتاڭ باوقىلاۋدا بولدى. ءسويتىپ، قاشىقتان وقي­تىن وقۋشىلاردىڭ سۇراۋىنا ساي مەكتەپ بالانسىنداعى كومپيۋتەرلەر ۋاقىتشا پايدالانۋعا بەرىلە باس­تادى. بۇ­گىندە وقۋشىلارعا 11 212 كومپيۋ­تەرلىك قۇرىلعى بەرىلگەن ەكەن.

– كومپيۋتەرى جوق قالعان وقۋشىلار ۇكىمەت رەزەرۆىنەن ساتىپ الىناتىن كومپيۋتەرلەر ەسەبىنەن قامتىلادى. بۇل كومپيۋتەرلەر وبلىسقا 1 قازانعا دەيىن جەتكىزىلەدى، – دەيدى باسقارما باسشىسى.

ينتەرنەت بايلانىسى جوق وقۋ­شىلارعا دا ءتيىستى قۇرىلعىلار ساتىپ الىنىپ، بەرىلۋدە. بيىل ۇيالى بايلانىس وپەراتورلارى قاشىقتان وقىتۋ كەزىندە وقۋشىلارعا ارزانداتىلعان ء«بىلىم» تاريفىن ۇسىندى. وبلىس بويىنشا ءبىلىم بەرۋ ۇيىمدارى ارقىلى بۇل تاريفپەن 2 مىڭعا جۋىق وقۋشى قامتىلعان.

 

قۇرىلىس تا قارقىندى

كارانتين سالدارىنان مەكتەپ عي­ماراتتارىنداعى «دەمالىستى» پاي­دا­لانىپ، مەكتەپتەردى جاڭارتۋ، ماتە­ريالدىق-تەحنيكالىق بازانى جەتىلدىرۋ ءىسى قارقىندى ءجۇرىپ جاتىر.

ورال قالاسىنداعى زاشاعان كەنتىندە 2 مەكتەپ ءۇش اۋىسىمدا قىزمەت ەتەتىن. كوپ- قاباتتى ۇيلەر ءجيى سالىنىپ، تۇر­عىندار سانى ارتقان جاڭا مەكتەپ عيما­راتىن سالۋ وزەكتى بولعان. مىنە، وسى تاپ­شىلىقتى جويۋ ماقساتىندا قازىر 900 ورىندىق جاڭا مەكتەپ قۇرىلىسى ءجۇرىپ جاتىر.

ودان بولەك، جاقىندا عانا شەتەل ينۆەستيتسياسى ەسەبىنەن سالىنعان 450 ورىندىق مەكتەپ عيماراتى پايدالانۋعا بەرىلىپ، ورال قالاسىنداعى ەستەتيكا­لىق باعىتتاعى گيمنازيا ءۇش اۋىسىمدى­لىقتان قۇ­تىلدى. سونداي-اق وڭىردە اپات­تى مەكتەپتەردىڭ ورنىنا 4 مەكتەپ قۇ­رىلىسى جاڭادان سالىنىپ جاتىر. سو­نىڭ ىشىندە اقجايىق اۋدانىنىڭ چا­پاەۆ اۋىلىندا 100 ورىندىق ينتەرناتىمەن 300 ورىندىق اباي مەكتەپ-گيمنازياسى جانە قازتالوۆ اۋدانىندا 60 ورىندىق سارىقۇدىق نەگىزگى مەكتەبى قۇرىلىسى بيىل اياقتالادى.

– اپات جاعدايىندا تۇرعان جانە ءۇش اۋىسىمدا وقىتاتىن مەك­تەپ­تەردىڭ قۇرىلىسىنا جەكە ينۆەستور­لار تارتىلىپ جاتىر. مىسالى، «نۇركاپسترويگاز» كومپانياسى زاشاعان كەنتىندە 900 ورىندىق، «قاز-حولل» كومپانياسى ورال قالاسىندا №31 ورتا مەكتەپ عيماراتىنىڭ قۇ­رىلىس جۇمىسىن باس­تايدى، – دەيدى ايگۇل ادىلگەرەيقىزى.

بۇدان بولەك، مەملەكەتتىڭ «اۋىل بەسىگى»، «جۇمىسپەن قامتۋدىڭ جول كارتاسى» باعدارلامالارى اياسىندا 33 ءبىلىم بەرۋ نىسانىنا كۇردەلى جون­دەۋ جانە قايتا جاڭعىرتۋ جۇ­مىسى دا قاتار ءجۇرىپ جاتىر. بۇل مەم­لەكەتىمىزدىڭ قيىن كەزدە دە ءبىلىم سالاسىنا باسىمدىق بەرىپ، قارجى اياماي وتىرعانىن كورسەتەدى.

 

باتىس قازاقستان وبلىسى

 

سوڭعى جاڭالىقتار

ۇقساس جاڭالىقتار