ساياسات • 25 قىركۇيەك، 2020

جۇمىسپەن قامتۋ – باستى مىندەت

17 رەت كورسەتىلدى

پارلامەنت ماجىلىسىندە وتكەن ۇكىمەت ساعاتىندا جاڭا جۇمىس ورىندارىن قۇرۋ بويىنشا قولعا الىنعان شارالار جايى كەڭىنەن تالقىلاندى. جيىندا پارلامەنت ءماجىلىسى توراعاسىنىڭ ورىنباسارى گۇلميرا يسيمباەۆا ءسوز تىزگىنىن ۇستادى. ول حالىقتى جۇمىسپەن قامتۋ ەلىمىزدىڭ ساياساتىندا ءاردايىم ماڭىزدى ورىن العانىن اتاپ ءوتتى.

 

«مەملەكەت باسشىسى قاسىم-جومارت توقاەۆ ءوز جولداۋىندا اتاپ وتكەن­دەي، قازىرگى جاعدايدا حالىقتىڭ جۇمىس­پەن قامتىلۋى مەن تابىسىن ساقتاۋ ءابسوليۋتتى باسىمدىق بولۋعا ءتيىس. ال حالىق­تى جۇمىسپەن قامتۋ – «ەڭبەك» مەملە­كەتتىك باعدارلاماسىنىڭ ماقساتى مەن مىندەتى. بۇل باعدارلاما ەلباسى نۇرسۇل­تان نازارباەۆتىڭ تاپسىرماسى بو­يىنشا 2017 جىلدان باستاپ ىسكە اسىپ كەلەدى. مينيسترلىكتىڭ مالىمەتى بويىن­شا، باعدارلاما جۇزەگە اسقان جىل­دارى 1 ملن 200 مىڭنان استام ادام جۇمىس­قا ورنالاسقان. دەگەنمەن بۇل ماسە­لەگە دە قازىرگى پاندەميا اسەر ەتپەي قوي­ما­دى. كارانتين كەزىندە كوپتەگەن ادام­نىڭ جۇمىسسىز قالعانى بەلگىلى»، دەدى گ.يسيمباەۆا.

ەڭبەك جانە حالىقتى الەۋمەتتىك قور­عاۋ مينيسترلىگىنىڭ ەسەبىنە سۇيەنسەك، 2020 جىلدىڭ ەكىنشى توقسانىنىڭ قورى­تىن­دىسى بويىنشا جۇمىسسىزدىق دەڭگەيى 5% كورسەتكەن، ال جۇمىسسىزدار سانى 0،2% ءوسىپ، 454 مىڭ ادامعا جەتكەن. وسىعان بايلانىستى گۇلميرا يسيمباەۆا ۇكىمەتتىڭ باستى مىندەتى – قازاقستاندىقتاردى تۇراقتى جۇمىسپەن قامتاماسىز ەتۋ ەكەنىن باسا ايتتى.

«باعدارلامانىڭ ورىندالۋ بارىسىندا دەپۋتاتتار تاراپىنان ءبىراز سىن-ەسكەرتپەلەر ايتىلعان ەدى. اسىرەسە باع­دار­لاماعا باعىتتالعان كوپتەگەن قاراجاتتىڭ جۇمسالۋىنىڭ تيىمدىلىگى ماسەلەسى كوتە­رىلدى. جالپى، 2011 جىلدان باستاپ جۇ­مىس­قا ورنالاستىرۋدى قامتاماسىز ەتۋگە شامامەن 1 ترلن تەڭگە بيۋدجەت قارا­جاتى ءبولىندى. بىراق جۇمىسسىزدىق ايتار­لىق­تاي ازايعان جوق جانە دەپۋتاتتار وسى قاراجاتتىڭ ءتيىمدى جۇمسالۋىنا بىرنەشە رەت ۇكىمەتتىڭ نازارىن اۋداردى»، دەدى ۆيتسە-سپيكەر.

 

8 ايدا 238 مىڭ جاڭا جۇمىس ورنى

كۇن تارتىبىندەگى تاقىرىپتى تالقىلاۋ ءۇشىن دەپۋتاتتار الدىندا ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ءسوز الدى. ناتيجەلى جۇ­مىسپەن قامتۋدى جانە جاپپاي كاسىپ­كەرلىكتى دامىتۋدىڭ 2017-2021 جىل­دار­عا ارنالعان «ەڭبەك» مەملەكەتتىك باع­دار­لاماسىن ىسكە اسىرۋ شەڭبەرىندە جاڭا جۇمىس ورىندارىن قۇرۋ تۋرالى بايانداعان مينيستر كوروناۆيرۋس پاندەمياسى مەن جاڭا ەكونوميكالىق جاعدايدا حالىقتى جۇمىسپەن قامتاماسىز ەتۋگە ەرەكشە باسىمدىق بەرىلەتىنىن العا تارتتى. باعدارلامانى جۇزەگە اسىرۋ ارقىلى جۇمىسسىز جانە ءوزىن جۇمىسپەن قامتىعان حالىقتى تۇراقتى جۇمىسپەن قامتۋعا، جاڭا جۇمىس ورىندارىن قۇرۋدى قولداۋعا مۇمكىندىك تۋادى.

«2017 جىلدان بەرى باعدارلاماعا 2 ميل­­ليوننان استام ادام، ونىڭ ىشىندە بيىل 430 مىڭ ادام قاتىستى. باعدار­لا­مانىڭ العاشقى باعىتى بويىنشا 394 مىڭ ادامدى ءۇش كومپونەنت: تەحنيكالىق جانە كاسىپتىك ءبىلىم بەرۋ ۇيىمدارىندا، قىسقامەرزىمدى كۋرستاردا جانە دە «بيزنەس باستاۋ» جوباسى بويىنشا كاسىپكەرلىك نەگىزدەرىنە وقىتۋ قاراستىرىلدى. ەكىنشى باعىت شەڭبەرىندە 111 مىڭ ادامعا كاسىپكەرلىكتى دامىتۋعا كومەك كورسەتىلدى. ءۇشىنشى باعىتتا سۋبسيديالاناتىن جۇمىس ورىندارىنا ورنالاستىرۋ جانە حالىقتىڭ ەڭبەك ۇتقىرلىعىن ارتتىرۋ ارقىلى 598 مىڭ ادام جۇمىسپەن قامتىلدى»، دەدى ب. نۇرىمبەتوۆ.

ءمينيستردىڭ ايتۋىنشا، ميكروكرەديتتەر جانە گرانتتار بەرۋ ارقىلى ءوزىن جۇ­مىس­پەن قامتىعان جانە جۇمىسسىزدار قاتارىنان كاسىپكەرلەردى قالىپتاستىرۋ 153 مىڭ تۇراقتى جۇمىس ورنىن قۇرۋعا سەپ­تىگىن تيگىزدى، ونىڭ ىشىندە ميكروكرەديت پەن گرانت الۋشىلار قوسىمشا 42 مىڭ جۇمىس ورنىن اشتى.

46 مىڭ قاتىسۋشى 8 مىڭ اەك-كە دە­يىنگى مولشەردە كرەديت الدى. ولارعا جەڭىلدەتىلگەن جاعداي جاسالدى. ميك­رو­كرەديت الۋشىلاردىڭ سانى ءۇش جىلدا 2،5 ەسە، قوسىمشا جۇمىس ورىندارىنىڭ سا­نى 5 ەسە ءوستى. العاش رەت ميكروكرەديت الۋ­شىلاردىڭ 63%-ى ءوز بيزنەستەرىن اشتى.

ال گرانت مولشەرى 200 اەك-ءتى قۇرايدى، قازىر ول 555 مىڭ تەڭگەگە تەڭ. 65 مىڭ ادام گرانت الدى، ونىڭ 56 مىڭى جەكە كاسىپكەر رەتىندە تىركەلىپ، سالىق تولەي باستادى ءارى ساقتاندىرۋ جانە زەينەتاقى جۇيەلەرىنە ەندى.

«باعدارلاماعا قاتىسۋشىلاردىڭ ەسە­بىنەن شاعىن جانە ورتا بيزنەس سالا­سىن­داعى جۇمىسپەن قامتۋدىڭ ءوسۋ ۇلەسى 11%-دى قۇرادى. ەكونوميكاعا قوسىمشا وڭ اسەر شىعارىلاتىن ءونىمنىڭ جىلىنا شامامەن 73،7 ملرد تەڭگەگە وسۋىمەن باعالانادى»، دەدى ب.نۇرىمبەتوۆ.

سونىمەن قاتار 2020 جىلى جۇمىس ورىندارىن قۇرۋ قارقىنىن باسقا مەم­لەكەتتىك باعدارلامالار شەڭبەرىندە ۇستاپ تۇرۋ مۇمكىن بولدى. 8 ايدا 238 مىڭ جۇمىس ورنى قۇرىلدى. بۇل ىسكە «نۇر­لى جول» (117 مىڭ)، «نۇرلى جەر» (28 مىڭ)، «تسيفرلى قازاقستان» (25 مىڭ) باعدار­لا­مالارى ەڭ كوپ ۇلەس قوسقان.

 

ۋاقىتشا جۇمىس جاستارعا ءتيىمدى

ەڭبەك جانە حالىقتى الەۋمەتتىك قورعاۋ ءمينيسترى جۇمىس­سىز­دىقتان الەۋمەتتىك قورعاۋ ارقىلى حالىقتىڭ نىسانالى توپتارى ءۇشىن مەملەكەت سۋبسيديالايتىن 586 مىڭ ۋاقىتشا جۇمىس ورنى قۇرىلعانىن حابارلادى.

وسىلايشا جاستار پراكتيكاسى اياسىندا ءبىلىم بەرۋ ۇيىمدارىنىڭ 115 مىڭ تۇلەگى جۇمىسپەن قامتىلدى. ونىڭ 54%-ى تەحنيكالىق جانە كاسىپتىك ءبىلىم بەرۋ ۇيىمدارىنىڭ، ال 40%-ى جوعارى وقۋ ورىندارىنىڭ تۇلەكتەرى. جوو مەن تجكب-ءنىڭ ءاربىر ونىنشى تۇلەگى 69،5 مىڭ تەڭگە جالاقى الىپ، وسى قولداۋ شارالارىمەن قامتىلعان. پراكتيكادان وتكەن تۇلەكتەردىڭ جارتىسى ونى وتكەن جەرىندە تۇراقتى جۇمىسقا ورنالاسۋدا.

84 مىڭ ادام الەۋمەتتىك جۇمىس ورىندارىنا جۇمىسقا ورنالاستى، ولار – نەگىزىنەن كوپبالالى انالار، مۇمكىندىكتەرى شەكتەۋلى، باس بوستاندىعىنان ايىرۋ ورىندارىنان بوساپ شىققاندار، جەتىم بالالار، زەينەتالدى جاستاعى ادامدار. 12 ايدا 65،6 مىڭ تەڭگە ورتاشا جالاقىنىڭ 35،6%-ى سۋبسيديالانادى. سودان كەيىن 68%-ى تۇراقتى جۇمىسقا ورنالاسادى.

ءۇش جىلدان استام ۋاقىت ىشىندە قو­عام­دىق جۇمىستارعا 387 مىڭ ادام جىبەرىلدى. بۇل بەلگىلى ءبىر سەبەپتەرمەن ءوز بەتىنشە بوس جۇمىس ورىندارىنا تۇ­را الماعان ازاماتتار. قوعامدىق جۇمىس­تار­داعى ورتاشا جالاقى 57،4 مىڭ تەڭگەنى قۇ­رايدى. قوعامدىق جۇمىستارعا قاتىسۋشى­لار­دىڭ 61%-نىڭ تەك ورتا ءبىلىمى بار، 75%-ى جۇمىسسىز، شالعاي اۋىلداردا تۇرا­دى. بۇل ادامدار تۇراقتى جۇمىسقا ورنا­لاس­قانعا دەيىن جۇمىسسىزدار ەسەبىنەن شىعا­رىلمايدى.

«جۇمىس ورىندارىن سۋبسيديالاۋ ەڭ­بەك نارىعىنداعى جاعدايعا جەدەل جا­نە يكەمدى ارەكەت ەتۋ قۇرالى رەتىندە تانىل­دى. وسى تەتىكتى قولدانا وتىرىپ جۇ­مىسپەن قامتۋعا جاردەمدەسۋ جانە كا­سىپكەرلىككە تارتۋ ارقىلى جالپى 739 مىڭ جۇمىس ورنى قۇرىلدى، ونىڭ 153 مىڭى – تۇراقتى جانە 586 مىڭى – ۋاقىتشا. 2017 جىلدان 2019 جىلعا دەيىنگى كەزەڭدە تۇراقتى جۇمىس ورىندارىنىڭ سانى 7 ەسە ءوستى»، دەپ اتاپ ءوتتى مينيستر.

ول سونىمەن بىرگە ەڭبەك جانە حالىقتى الەۋمەتتىك قورعاۋ مينيسترلىگى «ەڭبەك» باعدارلاماسىنىڭ قۇرالدارىن ۇنەمى جەتىلدىرىپ وتىراتىنىن اتاپ ءوتتى.

«ماسەلەن، ءبىز ەڭبەك ءوتىلى جوق جاستاردى جۇمىسقا ورنالاستىرۋ ءۇشىن «العاشقى جۇمىس ورنى» جوباسىن جۇزەگە اسىرىپ جاتىرمىز. تاعى ءبىر باستاما – «ۇرپاقتار كەلىسىمشارتى»، بۇل زەينەتكەرلىككە شىعاتىن مامانداردىڭ التى اي بويى ءوز تاجىريبەسى مەن جۇمىس ورنىن جاڭا كادرلارعا «تابىستاۋى». ءبىز سونىمەن قاتار مۇمكىندىگى شەكتەۋلى ادامداردى اتاۋلى جۇمىسپەن قامتۋدى جۇزەگە اسىرامىز. بۇل رەتتە 3115 ادام تۇراقتى جۇمىسقا، 6877 ادام ۋاقىتشا جۇمىسقا ورنالاستىرىلدى»، دەدى ب.نۇرىمبەتوۆ.

ەڭبەك جانە حالىقتى الەۋمەتتىك قور­عاۋ ءمينيسترى پاندەميادان تۋىنداعان جا­ھان­دىق داعدارىس جالپى الەمدىك ەكونو­ميكاعا ايرىقشا كەرى اسەر ەتكەنىن باسا ايتتى.

«ۇكىمەت مەملەكەت باسشىسىنىڭ تاپسىرماسى بويىنشا حالىقتى قولداۋ جانە ەكونوميكانى تۇراقتاندىرۋ بويىنشا شۇعىل شارالار كەشەنىن قابىلدادى. مەملەكەتتىك الەۋمەتتىك ساقتاندىرۋ قورىنان كىرىستى جوعالتقانى ءۇشىن ءبىر ەڭ تومەنگى جالاقى مولشەرىندەگى الەۋ­مەت­تىك تولەم – 16 ناۋرىز جانە 11 مامىر ارالىعىنداعى توتەنشە جاعداي كەزەڭىندە 4،6 ملن ادامعا، 5 شىلدە مەن 17 تامىز ارالىعىندا كارانتيندى كۇشەيتۋ كەزىندە 2،4 ملن ادامعا تاعايىندالدى. شىعىستاردىڭ جالپى سوماسى 475 ميللياردتان استام تەڭگە بولدى. حالىقتىڭ الەۋمەتتىك وسال توپتارىنا، ونىڭ ىشىندە جۇمىسسىزدارعا ازىق-ت ۇلىك، تۇرمىستىق جيىنتىق رەتىندە 2 اەك كولەمىندە تولەم جۇرگىزىلدى. مۇنداي تولەمدى ناۋرىز-مامىر ايلارىندا 1 ملن ادام، ال شىلدەدە 1،1 ملن ادام الدى»، دەدى ول.

الەۋمەتتىك قولداۋ شارالارىمەن قاتار جۇمىسپەن قامتۋدىڭ جول كارتاسى دا سالانى ىلگەرىلەتۋگە ايتارلىقتاي ۇلەس قوستى، بۇل جەردە جوبالاردى ىسكە اسىرۋعا 1 ترلن تەڭگە بولىنگەن.

«جۇمىسپەن قامتۋدىڭ جول كارتاسى 179 مىڭ ادامعا جۇمىس تاۋىپ بەرگەن. ولاردىڭ ورتاشا جالاقىسى 130 مىڭ تەڭگەنى قۇرايدى. باعدارلاماعا قاتىسۋشىلاردىڭ وتباسى مۇشەلەرىن ەسكەرە وتىرىپ، 700 مىڭعا جۋىق ادام كىرىسپەن قامتاماسىز ەتىلدى. شاعىن جانە ورتا بيزنەستىڭ 19 مىڭ سۋبەكتىسى 370 ملرد تەڭگەگە تاپسىرىس الدى، بۇل 114 مىڭ جۇمىس ورنىن ساقتاپ قالۋعا مۇمكىندىك بەردى. سونىمەن قاتار جول كارتاسى جوبالارىن ىسكە اسىرۋ بولاشاقتا 100 مىڭنان استام تۇراقتى جۇمىس ورنىن اشۋعا نەگىز بولادى»، دەدى مينيستر.

جول كارتاسى داعدارىس كەزەڭىندە حالىقتى جۇمىسپەن قامتۋ جانە تابىس­پەن قامتاماسىز ەتۋدەن باسقا الەۋ­مەتتىك، كوممۋنالدىق جانە كولىك ينفرا­قۇ­رىلىمىنىڭ جوندەلگەن جانە جاڭا نىساندارى تۇرىندە بولاشاق ءۇشىن الەۋمەتتىك قور قالىپتاستىرۋدا. بۇل 3 اۋىسىمدى جانە اپاتتى مەكتەپتەر، ءبىلىم بەرۋ، دەن­ساۋلىق ساقتاۋ، اۋىل تۇرعىندارىنىڭ تازا اۋىزسۋعا قولجەتىمدىلىگى، سۋارمالى، جايىلىمدىق جەرلەردىڭ اۋماعىن ۇلعايتۋ جانە اۋىلدىق ەلدى مەكەندەردى گازداندىرۋ سياقتى تۇيتكىلدى ماسەلەلەردىڭ ءبىر بولىگىن شەشۋگە مۇمكىندىك بەرەدى.

ب.نۇرىمبەتوۆ ءوز سوزىندە پاندەميا كەزىندە ەڭبەك نارىعىنا ءتونىپ تۇرعان قاۋىپ-قاتەرلەردى دە اتاپ ءوتتى.

«پاندەميانىڭ ەڭبەك نارىعى ءۇشىن قاتەرلەرى مەن تەرىس اسەرلەرى ءالى دە بار. ءبىزدىڭ باعالاۋىمىز بويىنشا، ەگەر دە كوروناۆيرۋستىڭ ەكىنشى تولقى­نى سەبەبىنەن قاتاڭ شەكتەۋ شارالارى قايتا ەنگىزىلگەن جاعدايدا 2 ملن 200 مىڭ­نان استام ادام قولداۋعا مۇقتاج بولۋى مۇمكىن. بولجام بويىنشا جۇمىس­پەن قامتىلعان حالىقتىڭ جارتىسىنا جۋىعى نەمەسە 4 ملن ادام جۇمىس رەجىمىن ساقتاپ قالادى. نەگىزىنەن بۇل اۋىل شا­رۋا­شىلىعى، قۇرىلىس، ءوندىرىس جانە دەن­ساۋلىق ساقتاۋ سالاسىنداعى قىزمەت­كەر­لەر. ۇشتەن ءبىرى نەمەسە 2،5 ملن ادام قاشىقتان جۇمىس ىستەيدى. 2 ملن ادام­نىڭ جۇمىس ۋاقىتى قىسقارۋى مۇمكىن، ولار اقىلى نەمەسە اقىسىز دەمالىسقا شىعۋى ىقتيمال. بۇل – ساۋدا، كولىك جانە تاماقتانۋ سالاسىندا قىزمەت ەتەتىندەر. باعالاۋ بويىنشا 162 مىڭ ادامنىڭ جۇمىسسىز قالۋى دا مۇمكىن»، دەدى بايانداماشى.

مينيستر ءسوزىنىڭ سوڭىندا، COVID-19 پاندەمياسى مەن كارانتيندىك شەكتەۋ شارالارىن قايتا ەنگىزۋ قاۋپى سەيىل­مەگەن جاعدايدا ۇكىمەت مەملەكەتتىك باعدار­لامالار شەڭبەرىندە حالىقتى جۇمىسپەن قامتاماسىز ەتۋ جانە جۇمىس ورىندارىن قۇرۋ بويىنشا جەدەل جانە جۇيەلى شارالاردى قابىلداۋعا دايىن ەكەنىن اتاپ ءوتتى.

 

باسىم باعىتتار انىق

جيىن بارىسىندا ءماجىلىس دەپۋتاتتارى ءبىرجان نۇرىمبەتوۆكە حالىقتى جۇمىسپەن قامتۋ ماسەلەسىنە قاتىستى سۇراقتارىن قويىپ، پىكىرلەرىن ءبىلدىردى.

سولاردىڭ قاتارىندا دەپۋتات ساۋىتبەك ابدراحمانوۆ مينيسترلىكتىڭ جۇمىس باعىتىنا بايلانىستى تىلەگىن ءبىلدىرىپ، بيىل اشىلعان جاڭا جۇمىس ورىندارى جايلى تولىعىراق سۇرادى.

بۇل سۇراققا جاۋاپ بەرگەن ءبىرجان نۇرىمبەتوۆ جاڭا جۇمىس ورىندارىن اشۋدا ءۇش سالاعا باسىمدىق بەرىلگەنىن اتاپ ءوتتى. جوعارىدا ايتىلعان 238 مىڭ ورىننىڭ جارتىسى، ناقتىراق 56%-ى قۇرى­لىس، اۋىل شارۋاشىلىعى، كوتەرمە جانە  بولشەك ساۋدا سالالارىندا اشىل­عان. وڭىرلەردىڭ بولىنىسىندە الماتى قالاسى، الماتى، قاراعاندى، جامبىل وب­لىستارى الدا. بۇل – 8 ايدىڭ قورى­تىن­دىسى. مەملەكەتتىك باعدارلاما بو­يىنشا قۇرىلعان جۇمىس ورىندارىنىڭ ەسەبى جەرگىلىكتى ورىندار ارقىلى جانە مينيسترلىكتىڭ اقپاراتتىق جۇيەسىندە ەسەپتەلىپ، سارالانادى. سونداي-اق ول زەينەت­اقى جارنالارى ارقىلى تەكسەرىلەدى. بۇل رەسمي قورىتىندى بيىلعى جىلدىڭ ءبىرىنشى جانە ەكىنشى توقسانىنىڭ ناتيجەسىندە شىعارىلعان.

ءماجىلىس دەپۋتاتى فاحريددين قارا­تاەۆ مۇمكىندىگى شەكتەۋلى جانداردىڭ جۇمىسقا ورنالاسۋىنداعى ماسەلەلەرگە توقتالسا، ب.نۇرىمبەتوۆ مۇمكىندىگى شەكتەۋلى جانداردى جۇمىسقا ورنالاس­تىرۋ مينيسترلىك ءۇشىن اسا ماڭىزدى مىندەتتەردىڭ ءبىرى ەكەنىن اتاپ ايتتى.

«ۆەدومستۆو وسى ماسەلە بويىنشا كەشەندى ۇسىنىستاردى، زاڭ جوباسىن ازىرلەدى. قازىر قوعامدىق تالقىلاۋدان ءوتىپ جاتىر. ونىڭ ىشىندە تەك جۇمىسقا ورنالاستىرۋ عانا ەمەس، مۇمكىندىگى شەكتەۋلى جانداردىڭ جالپى ەكونوميكالىق بەلسەندىلىگىن ارتتىرۋ قاراستىرىلىپ وتىر. وندا وڭالتۋ، ەڭبەك نارىعىنا دايارلاۋ، وقىتۋ، جۇمىسقا قابىلداۋعا قاتىستى تۇستارى بار»، دەدى مينيستر.

سونىمەن قاتار ءماجىلىستىڭ الەۋ­مەتت­ىك-مادەني دامۋ كوميتەتىنىڭ توراعاسى بەيبىت مامراەۆتىڭ ايتۋىنشا، «ەڭبەك» باعدارلاماسى اياسىندا قۇرىلعان تۇراق­تى جۇمىس ورىندارىنىڭ ۇلەسى 16% عانا. قالعانى – ۋاقىتشا جۇمىس ورىن­دارى. ال اۋىلدىق جەرلەردە بۇل كورسەتكىش، ءتىپتى تومەن. بۇل اۋىلداعى نارىق كولەمىنىڭ شەكتەۋلىلىگىنە، ءونىم مەن وت­كىزۋدىڭ اراسىنداعى شەشىلمەگەن ماسە­لەلەرگە جانە ەڭبەك داعدىلارى دەڭگەيىنىڭ تومەندىگىنە بايلانىستى. دەپۋ­تات وسى ماسەلەگە ايرىقشا نازار اۋدارۋ قاجەتتىگىن العا تارتتى.

ب.مامراەۆتىڭ پىكىرىنشە، 80 مىڭداي جۇمىس ورنىنىڭ ءالى بوس تۇرعاندىعىنىڭ سەبەبىن انىقتاپ، بۇل باعىتتاعى جۇمىستى جانداندىرا ءتۇسۋ كەرەك.

ۇكىمەت ساعاتىندا تالقىلانعان ماسەلەلەر بويىنشا دەپۋتاتتار ءتيىستى ۇسىنىمدار قابىلدايتىنىن جەتكىزدى.

سوڭعى جاڭالىقتار

ۇقساس جاڭالىقتار