بيزنەس • 24 قىركۇيەك، 2020

"بيزنەستىڭ جول كارتاسى-2025" باعدارلاماسىنا بىرقاتار وزگەرىس ەنگىزىلدى

74 رەت كورسەتىلدى

اعىمداعى جىلدىڭ 30 شىلدەسىندە "بيزنەستىڭ جول كارتاسى-2025" بيزنەستى قولداۋ مەن دامىتۋدىڭ مەملەكەتتىك باعدارلاماسىنىڭ ءبىرىنشى باعىتىنا ەنگىزىلگەن تۇزەتۋلەرگە سايكەس، ميكرو جانە شاعىن بيزنەس تە باعدارلاماعا سالالىق شەكتەۋسىز قاتىسا الادى. بۇل تۋرالى "دامۋ" كاسىپكەرلىكتى دامىتۋ قورى مالىمدەدى، دەپ حابارلايدى Egemen.kz

وسى باعىت بويىنشا نومينال سىياقى مولشەرلەمەسى قازاقستان رەسپۋبليكاسىنىڭ ۇلتتىق بانكى بەلگىلەگەن بازالىق پايىزدىق مولشەرلەمەدەن اسپاۋى كەرەك جانە 8،5 پايىزدىق پۋنكتكە ۇلعايعان، كاسىپكەر ءۇشىن نەسيە بويىنشا سىياقى مولشەرلەمەسى جىلىنا 6%-دى قۇرايدى.

كاسىپكەر ءۇشىن نومينال مولشەرلەمە مەن سوڭعى مولشەرلەمە اراسىنداعى ايىرماشىلىقتى مەملەكەت سۋبسيديالايدى (كاسىپكەرگە وتەماقى تولەنەدى). ۇكىمەتتىڭ شەشىمىمەن مەملەكەت «دامۋ» قورى ارقىلى نەسيە جانە ميكروقارجىلار بويىنشا پايىزدىق مولشەرىن پورتفەلدىك سۋبسيديالاپ، كەپىلدىك بەرەدى. سايكەسىنشە، نەسيە تۋرالى شەشىمدى بانك نەمەسە ميكروقارجى ۇيىمى قابىلدايدى، ال نەسيەگە سۋبسيديا جانە كەپىلدىك بەرۋ تۋرالى شەشىم حابارلاما سيپاتىندا بولادى. اينالىم قاراجاتىن تولىقتىرۋعا ارنالعان نەسيە بويىنشا ماكسيمال سوما ەكى جىلعا دەيىنگى سۋبسيديالاۋ مەرزىمىمەن 5 ملن تەڭگەدەن اسپايدى، ال نەسيە جاڭارتىلمايتىن  نەگىزدە بەرىلەدى. ينۆەستيتسيا ماقساتىنداعى نەسيەنىڭ ماكسيمال سوماسى − ءۇش جىلعا دەيىنگى سۋبسيديالاۋ مەرزىمىمەن 20 ملن ءبىر بورىشكەردىڭ قولىنا تيەتىن شەكتى قارجى − 20 ملن تەڭگە. "دامۋ" قورىنىڭ كەپىلدىگى نەسيە سوماسىنىڭ 85%-ىن قۇرايدى.

بۇگىنگى كۇنى "دامۋ" قورى پورتفەلدىك سۋبسيديالار مەن كەپىلدىكتەر تۋرالى ەكىنشى دەڭگەيلى ءۇش بانكپەن ("سبەربانك" اق، "قازاقستان حالىق بانكى" اق، "بانكتسەنتركرەديت" اق) كەلىسىمشارتتار جاساستى. جاقىن ارادا باعدارلاماعا قاتىسۋعا نيەت بىلدىرگەن باسقا ەدب جانە مقۇ-مەن كەلىسىمشارتتار جاسالادى دەپ جوسپارلانعان.

باعدارلامانىڭ وسى باعىتىنىڭ ماڭىزدى جانە جاعىمدى ايىرماشىلىعى – قارجىلاندىرۋ تۋرالى شەشىم تەك بانك نەمەسە ميكروقارجى ۇيىمى دەڭگەيىندە قابىلدانادى. بۇل ءتاسىل نەسيە الۋعا ءوتىنىمدى قاراۋ مەرزىمىن ايتارلىقتاي قىسقارتادى جانە كاسىپكەرلەردىڭ ەكىنشى دەڭگەيلى بانكتەرمەن جانە "دامۋ" كاسىپكەرلىكتى دامىتۋ قورى" اق-مەن قارىم-قاتىناسىن جەڭىلدەتەدى.

"باعدارلاماداعى بۇل جاڭالىق، ەلدەگى كاسىپكەرلىكتىڭ دامۋىنا جانە كاسىپكەرلەردىڭ قارجىلىق اۋىرتپالىعىن جەڭىلدەتۋگە ءسوزسىز ىقپال ەتەتىن، قازىرگى كۇردەلى جاعدايدا ۇكىمەت ۇسىنعان مەملەكەتتىڭ جەدەل جانە ماڭىزدى شەشىمى. بۇل مەملەكەتتىك قولداۋ قۇرالى حالىق اراسىندا كاسىپكەرلىك ىنتانىڭ دامۋىنا سەرپىن بەرەدى، ەكىنشى دەڭگەيلى بانكتەر ارقىلى نەسيە الۋعا شەشىم قابىلداي الماي جۇرگەندەرگە تۇرتكى بولدى"، دەيدى "دامۋ" كاسىپكەرلىكتى دامىتۋ قورى" اق نۇر-سۇلتان قالالىق فيليالىنىڭ ديرەكتورى نۇرسۇلتان ابدوللا.

سوڭعى جاڭالىقتار

ۇقساس جاڭالىقتار