الەم • 24 قىركۇيەك، 2020

ەكىنشى تولقىننىڭ ەكپىنى كۇشەيە باستادى

3239 رەت كورسەتىلدى

باتىس جارتىشارداعى پاندەميا­مەن ارپالىستىڭ تولاستايتىن ءتۇرى كورىنبەيدى.

بۇرناعى كۇنى مەكسيكانىڭ دەنساۋلىق ساقتاۋ ءمينيسترى ۋگو لوپەس گاتەل Twitter-دەگى پاراقشاسىندا 3 مىڭعا جۋىق ادامنىڭ كۆي جۇقتىرعانىن جاريا ەتتى. پاندەميا باستالعالى 700 580 مەكسيكالىقتان ۆيرۋس تابىلىپ، 73 697 ادام اجال قۇشقان.

 

ارگەنتينادا 24 ساعات ىشىندە 429 پاتسيەنت ومىرمەن قوشتاسىپ، ىندەتتەن كوز جۇمعاندار سانى 13 482-گە جەتكەن. جالپى، COVID-19 تۋدىرعان دەرتتىڭ سالماعىن 540 147 جان سەزىنگەن كورىنەدى. ەل استاناسى بۋەنوس-ايرەس تۇرعىندارى اراسىندا اۋرۋ جۇقتىرۋ ازايماي تۇر. وتكەن ءبىر تاۋلىكتە 3 700 ادامنان اۋرۋ تابىلعان.

الەم بويىنشا ىندەت تاراۋى جونىنەن الدىڭعى ورىننىڭ بىرىندەگى برازيليادا 4 558 068 ادام ىندەت تىرناعىنا ءىلىنىپ، اپتا باسىندا جاڭادان 13 439 ۆيرۋس جۇقتىرۋ فاكتىسى تىركەلگەن. پاندەميا پاتشالىق قۇرعالى برازيليا 137 272 ازاماتىنان ايىرىلعان. بۇل ەلدە ءبىر كۇندە COVID-19-دان 377 ادام قايتىس بولدى.

 * * *

وسلو بيلىگى كوروناۆيرۋس تارالۋى­نا بايلانىستى شەكتەۋ شارالارىن قاتايتتى.

Dagens Nyheter گازەتى جاريالاعان مالىمەتتە وسلودا اۋرۋ كوبەيۋىنە بايلانىستى قالانىڭ بارلىق تۇسىندا «قىزىل ايماقتار» انىقتالعان. بۇل COVID-19 ءورشىپ تۇرعانىن اڭعارتادى.

سوڭعى ءۇش اپتادا وسلودا اۋرۋ تىركەلۋ كوبەيىپ، قالا تۇرعىندارىنا ساقتىق شارالارىن كۇشەيتۋگە كەڭەس بەرىلگەن. ەندى وسلولىقتار قوعامدىق كولىكتەردە، ساۋدا ورىندارىندا، قىسقاسى الەۋمەتتىك قاشىقتىقتى ساق­تاۋ­عا مۇمكىن ەمەس جەرلەردىڭ بار­لى­­عىندا اۋزى مەن مۇرنىن جاۋىپ، تۇمشانى تاستاماۋى ءتيىس. بۇعان قوسا حالىققا ءوز ۇيلەرىندە 10 ادامنان اساتىن توپپەن جينالۋىنا بولمايتىنى قاتاڭ ەسكەرتىلگەن.

* * *

پاريجدىكتەر يتالياعا تەست تاپسىرماي كىرمەيتىن بولدى. فرانتسيا ەو ەلدەرى اراسىندا كۆي تارالۋى جونىنەن الاڭداتارلىق كۇيدە تۇر.

فرانتسۋزداردىڭ تەست تاپسىرماي يتاليا اۋماعىنا كىرگىزىلمەيتىنى تۋرالى قۇجاتقا يتاليا دەنساۋلىق ساقتاۋ ءمينيسترى روبەرتو سپەرانسا
21 قىركۇيەكتە قول قويعان.

يتاليانىڭ كارى قۇرلىقتاعى پاندەميا ءاۋ باستان تىرناعىن قاتتى باتىرعان مەملەكەت ەكەنى بارشاعا ايان. اۋرۋحانالاردا ورىن جەتپەي، ۆيرۋس جۇقتىرعان جانداردىڭ كوشەلەردە ەم قابىلداعانى، كوپتەگەن يتاليالىقتىڭ ومىرمەن قوشتاسقانى بەلگىلى. سوندىقتان دا العاشقى سوققىدان ەسەڭگىرەپ قالعان يتاليالىقتاردىڭ بۇل قارەكەتىن تۇسىنۋگە بولادى. ءساۋىردىڭ سوڭىنان شىلدەنىڭ باسىنا دەيىن اۋرۋ سانى ازايىپ كەلگەن يتاليادا مىنە، ىندەت قارقىنى كۇشەيگەنى بايقالادى. ال قايتىس بولعانداردىڭ اراسىندا جاستار مەن ورتا بۋىن وكىلدەرىنىڭ كوپ بولۋى دا جۇرتتى الاڭداتىپ وتىر.

فرانتسياداعى COVID-19-عا قارسى ساقتىق شارالارىنىڭ كۇشەيگەنىنە قا­را­ماستان، مۇندا دا كۆي ءورشىپ ب­ا­را­دى. تەك كەشەگى كۇننىڭ وزىندە 5 298 ادام اۋرۋ جۇقتىرىپ، 827 پاتسيەنت اۋرۋحانالاردىڭ جانساقتاۋ بولىمدەرىندە جاتقان كورىنەدى.

 * * *

لوندون مەرى ساديك حان استانادا شەكتەۋ تۇرلەرىن قاتاڭداتۋدى جاريا­ل­ادى.

مەر «اۋرۋدى اۋىزدىقتايتىن وزگە تاڭداۋ جوق. ەكىنشى تولقىننىڭ باسىنان باستاپ شەكتەۋ جاريالاۋدىڭ ماڭىزى زور. كەيىن ۆيرۋس بەلەڭ العاندا شەكتەۋدى قاتاڭداتقاننان گورى قازىر بەكەمدىك تانىتۋ ەل ءۇشىن پايدالى» دەدى. ول بوريس دجونسون باسقاراتىن ۇكىمەتكە مەيرامحانا، بارلاردىڭ ۋاقى­تىن شەكتەۋ، الەۋمەتتىك قاشىق­تىق ۇستاۋعا مۇمكىندىك جوق ورىن­دار­دىڭ بارلىعىندا تۇمشا تاس­تاماۋ تۋرالى ۇسىنىستى جەتكىزەتىنىن ما­لىمدەگەن.

* * *

Sveriges Radio سانيتارلىق نورمالاردى ساقتامايتىن شۆەدتىكتەردىڭ ۆيرۋس تارالۋىنا سەپتەسەتىنىن حابارلادى.

ستوكگولم مەن گەتەبورگتەگى ءاربىر ءۇشىنشى مەيرامحانا مەن باردا الەۋمەتتىك قاشىقتىق قاداعالان­باي­تى­نى جايىنداعى ەسكەرتۋ بەرىلگەن. ستوك­گولمنىڭ قورشاعان ورتانى قور­عاۋ دەپارتامەنتىنىڭ باسشىسى پتەر برودەنمارك: «ناۋرىز ايىنان بەرى شەك­تەۋ جاريالانعالى 2 مىڭنان استام تەكسەرۋ جۇرگىزىلدى. كورسەتىلگەن كەم­شى­لىكتەردى جويۋ بارىسىن باقىلاۋ ءۇشىن جۇرگىزىلگەن ەكىنشى تەكسەرۋدە ءبىز جاع­داي­دىڭ ءالى وڭالماعانىن اڭدادىق»، دەيدى. ول ءاربىر سانيتارلىق نورمانى ۇستامايتىن ازاماتتىڭ اۋرۋ تارالۋىنا كومەكتەسەتىنىنە قىنجىلدى.

گەتەبورگتە تەكسەرۋ جۇرگىزىلگەن 900 تاماقتانۋ ورنىنىڭ 300-ىندە كەم­شى­لىك­تەر انىقتالعان.

 

 

 

سوڭعى جاڭالىقتار

ۇقساس جاڭالىقتار