تەاتر • 24 قىركۇيەك، 2020

ناتاليا كاگادي: باستى قۇندىلىق – ماحاببات

14 رەت كورسەتىلدى

جاقىندا «استانا وپەرا» تەاترىندا بەلكانتو­ ءداۋى­رىنىڭ جاۋھارى – گاەتانو دونيتسەتتيدىڭ «دون پاس­كۋالە» وپەراسى­نىڭ پرە­مەراسى وتەدى. قازان ايى­نىڭ 2-3-ءى كۇن­دەرىنە جوس­پارلانعان كلاس­سيكا­لىق مۋزىكا كەشىنە تەاتر ترۋپپاسى قىزۋ دايىن­دىق ۇستىندە. جارتى جىل ۇزىلىستەن كەيىن تەاترسۇيەر قاۋىمدى ەلەڭ ەتكىزگەن ونەر الەمىندەگى وسىناۋ ەلەۋلى ءھام ايتۋلى وقيعاعا وراي وپەرانىڭ قويۋ­شى رەجيسسەرى ناتاليا كاگاديدى از-كەم اڭگىمەگە تارتقان ەدىك.

– ناتاليا حانىم، بۇل ءسىزدىڭ «دون پاسكۋالە» وپەراسىنداعى العاشقى تاجىريبەڭىز بە؟ الدە ايتۋلى وپەرانى بۇعان دەيىن دە قويىپ كورىپ پە ەدىڭىز؟

– جوق، رەجيسسەر رەتىندە «دون پاسكۋالە» وپەراسىن ءبىرىنشى رەت ساحنالاپ وتىرمىن. الايدا بۇل گ.دونيتسەتتي شىعارماشىلىعىن ساحناعا شىعارعان العاشقى سپەكتاكلىم ەمەس. بۇعان دەيىن ونىڭ «ماحاببات سۋسىنىن» قويدىم. جالپى، بۇل كومپوزيتوردىڭ ونەرىنە ءتانتىمىن.

– جانرىن اۆتور كومەديا دەپ انىق­تاعانىمەن، نەگىزىنەن بۇل وپەرانىڭ تا­بيعاتى دراماعا دا جاقىن. ءسىز قايسى­سىنا باسىمدىق بەردىڭىز؟

– دەگەنمەن «دون پاسكۋالە» وپەراسى كومەديا، دالىرەك ايتساق، وپەرا-بۋففا (كۇلكىلى دراما) دەپ قارالعانى ءجون. ياعني، بۇل جانر – كومەديا مەن درامانىڭ قوسىندىسى، ءبىزدىڭ جاعدايدا ساتيرا ەلەمەنتتەرى قوسىلعان. دونيتسەتتيدىڭ پايىمى بويىنشا، وپەرانىڭ سيۋجەتى ەگدە جاستاعى اۋقاتتى مىرزانىڭ جاس قىزعا ۇيلەنۋ تۋرالى شەشىمىن مازاق ەتۋگە ۇندەيدى. قاي كەزدە بولماسىن، مۇنداي نيەت – ابدەن قالىپتى قۇبىلىس. ال كەيىپكەرلەردىڭ مىنەز ەرەكشەلىكتەرىنە كەلەتىن بولساق، مەنىڭ قاھارماندارىم وزدەرىنىڭ امال-ارەكەتتەرى سياقتى ءاردايىم سان قىرلى. كورەرمەن مۇنى ۋۆەرتيۋرادان-اق بىردەن سەزىنەدى. البەتتە، وپەرامەن جۇمىس ىستەۋ كەزىندە مەن اللا سيمونيشۆيلي مەن مانانا گۋنيانىڭ كوركەمدىك تۇجىرىمداماسىن ۇستانامىن. ءبىزدىڭ دون پاسكۋالە – قاراپايىم قاۋساعان شال ەمەس، ەگدە تارتسا دا ادام قىزىعارلىق، كۇش-قۋاتى تاسىعان بويداق ازامات. بىزدەگى دون پاسكۋالە – قىمبات قوناقۇيدىڭ يەسى، ومىرىنە نە كەرەكتىڭ ءبارى بار، تولىققاندى ءارى داۋلەتتى كاسىپكەر. سوندىقتان دا ونىڭ جاس تا سۇلۋ ايەلگە ۇيلەنۋگە قاۋقارى بار. دەگەنمەن مەن ونى ءوز قالاعانىنا قول جەتكىزە المايتىن جاعدايعا اكەلىپ تىرەدىم. مۇنىڭ سەبەبى ونىڭ قارت بولۋىندا ەمەس، ماسەلە – ماحاببات ۇشتىگى مەن ونىڭ ىقپالدى جاعدايىنان دا كۇشتىرەك سەبەپتەردىڭ بولۋىندا.

– قويۋشى رەجيسسەر رەتىندە ءسىز ءۇشىن «دون پاسكۋالە» وپەراسىنىڭ باستى قۇندىلىعى نەدە؟

– رەجيسسەر رەتىندە مەن ءۇشىن ۇيلەسىمدى قارىم-قاتىناس پەن ساحناداعى جاسامپازدىق – ءۇش قايناسا سورپاسى قوسىلمايتىن دۇنيەلەر. سەبەبى ساحنا قاشاندا اقىر سوڭىندا شەشىمىن تاباتىن قاقتىعىستاردى تالاپ ەتەدى. دونيتسەتتيدىڭ «عاشىقتارىنا» كەلەر بولساق، ءبىزدىڭ قويىلىمىمىزدا كەيىپكەر نورينا سپەكتاكلدىڭ باسىندا ەشكىمدى، ونىڭ ىشىندە ەرنەستونى دا جاقسى كورمەيدى. دون پاسكۋالەمەن نەكەسىنىڭ ارقاسىندا ءوزىنىڭ قارجىلىق جاعدايىن شەشىپ الۋدى كوزدەيدى. ادەتتە، مۇنداي جاعداي شىنايى ومىرىمىزدە، اسىرەسە الەۋمەتتىك جاعدايى تەڭ ەمەس نەكەلەردە كوپ كەزدەسەدى. ال ەرنەستوعا دەگەن ماحابباتى كورەرمەندەردىڭ كوز الدىندا ويانادى جانە بۇل وتە اسەرلى بولادى! مەن ءۇشىن قاي كەزدە دە باستى قۇندىلىق – ادامي سەزىمدەر، سونىڭ ىشىندە شىنايى ماحاببات. مەن ءاردايىم وسىنى العا شىعارعىم كەلدى.

– قويىلىم كىمدەرگە قىزىقتى بولۋى مۇمكىن، ونىڭ تولىق ماعىناسىن ءتۇسىنۋ ءۇشىن قاي جاستان باستاپ كورۋگە بولادى؟

– قانداي دا ءبىر قويىلىممەن جۇمىس ىستەگەندە، الدىما قويىلىمدى قاي جاستاعى كورەرمەنگە بولماسىن قىزىقتى ەتۋ مىن­دەتىن قويامىن. بىراق قالاي دەگەنمەن دە، بۇل قويىلىم ەرەسەكتەر اۋديتورياسىنا ارنالعان.

– قازىرگى ۋاقىتتا وپەرالىق قويى­لىم­داردا اۆتورلىق سيۋجەتتەردى، باس كەيىپكەر­لەردىڭ قارىم-قاتىناسىن، ولاردىڭ مىنەز-ق ۇلىقتارىن وزگەرتۋ قالىپتى جاعدايعا اينالعان. ءسىز دە وسى تاجىريبەگە جۇگىندىڭىز بە؟

– رەجيسسەردىڭ مىندەتى – ساحنادا كومپوزيتور جازعان سيۋجەتتىڭ بەتىندەگىسىن بەينەلەۋ ەمەس، ءاربىر كەيىپكەردىڭ بارىنشا دامۋىنا مۇمكىندىك بەرۋ. قويىلىم بارىسىندا كەيىپكەرلەر ورىنداۋعا جانە شەشۋگە ءتيىس بولاتىن كوپتەگەن ساحنالىق مىندەتتەر مەن كۇرمەۋلى ماسەلەلەردى قويا ءبىلۋ. رەجيسسەر تەك سيۋجەتتەردىڭ رەتىمەن ورىن اۋىستىرىلۋىن عانا ەمەس، ءوزىنىڭ قويىلىمىنا ەرەكشە، قايتالانباس قالىپ بەرگىسى كەلەتىنى ءسوزسىز. نەگىزىندە سيۋجەتتى اۋىستىرۋ مۇمكىن ەمەس، ال قالىپقا ەنۋگە البەتتە بولادى. مىنە، سوندىقتان وپەرانىڭ ارەكەتى تاريحي نەمەسە ءتىپتى عارىشتىق كەڭىستىككە شىعىپ كەتۋى ابدەن مۇمكىن. ال ءبىزدىڭ قويىلىمعا قاتىستى ايتار بولساق، مۇندا دا ونداي وزگەرىس بولادى. ساحنالىق قالىپ – حح عاسىردىڭ باسى. قويۋشى-سۋرەتشى مانانا گۋنيانىڭ ساحنا بەزەندىرۋلەرى وتە ادەمى. نەگىزگى وقيعا قىمبات قوناقۇيدە وتەدى. بىراق بۇل جەردە باستى ەكپىن بايلىققا تۇسپەيدى. وپەرانىڭ وزەگى – تاڭداۋدا، ياعني ءار ادامنىڭ جاسار تاڭداۋىندا. كۇندەلىكتى ومىردە ءبىزدىڭ ارقايسىمىزدىڭ الدىمىزدا دا ءتۇرلى تاڭداۋ تۇرادى. دۇرىس تاڭداۋ جاساي الۋ – جارتى باقىت دەسەم، ارتىق ايتقاندىعىم ەمەس. سول سەبەپتى دە بۇگىنگى جاسار تاڭداۋىمىزعا ەرتەڭگى ءومىرىمىز، جاعدايىمىز تىكەلەي تاۋەلدى ەكەندىگىنە كەلىسەتىن شىعارسىز؟! قويىلىم جايلى بار ايتارىم – وسى. قالعانىنا پرەمەرا كۇنى كۋا بولاسىزدار! تەاتردا جۇزدەسەيىك!

– اڭگىمەڭىزگە راحمەت.

 

اڭگىمەلەسكەن

نازەركە جۇماباي،

«Egemen Qazaqstan»

 

سوڭعى جاڭالىقتار

ۇقساس جاڭالىقتار