مىڭ جارىمنان استام تۇرعىنى بار باستاۋ اۋىلدىق وكرۋگىندە جۇمىس قايناپ جاتىر. قىس قامىنا كىرىسكەن اۋىل تۇرعىندارى ءۇي جايلارى مەن مال قورالارىن سىلاپ-سىرلاپ, قاپىسىز قامدانۋدا. ءتورت قۇبىلادا تەگىس جيناقى قولدىڭ تابى انىق بايقالادى. ءمىنسىز تازالىقتىڭ مۇراتى وسىندايدا كورىنەدى ەكەن. شىنىن ايتقاندا, الىستان قاراساڭىز, ءۇيى قايسى, قوراسى قايسى ەكەندىگىن ايىرا المايسىز. ەكەۋى دە جايناپ تۇر.
مىنە, مىناۋ سالىنىپ جاتقان جاستار ورتالىعى. قۇرىلىس الاڭىندا قازىر 25 ادام قاۋىرت جۇمىس ىستەپ جاتىر. قوڭىر كۇزدىڭ ءاربىر اشىق ءساتىن پايدالانىپ, جۇمىسقا جۇمىلعان قۇرىلىسشىلاردىڭ ەڭبەگى ونىك. اۋىل ورتاسىنداعى ءۇش قاباتتى ەتىپ سالىنۋى كوزدەلگەن عيماراتتىڭ جالپى اۋماعى ءبىر جارىم مىڭ شارشى مەتردى قۇرايدى. وسى جەردە كينوتەاتر, بي زالى, مەكتەپ وقۋشىلارى مەن اۋىل جاستارىنا ارنالعان بىرنەشە ۇيىرمەلەر جۇمىس ىستەيتىن بولادى. قالادان قاي جەرى كەم؟ قايتا كىندىك قانى تامعان توپىراقتا ورنىعىپ وتىرىپ, ەل يگىلىگىنە ۇلەس قوسقان الدەقايدا تارتىمدى ەمەس پە؟ شىندىعىندا وتپەلى كەزەڭنىڭ وكپەك جەلىنە توتەپ بەرگەن بۇل وكرۋگتەن تۇرعىنداردىڭ قونىس اۋدارۋى بۇرىن دا سيرەك بولاتىن. ونىڭ ءبىر سەبەبى, تۇراقتى جۇمىستىڭ بارلىعى, ەكىنشىدەن, ەلدى مەكەندەردە الەۋمەتتىك-تۇرمىستىق جاعداي تۋدىرىلۋى. ەندى ونىڭ ۇستىنە داۋلەتتى ەلدە ساۋلەتتى جاستار ورتالىعى سالىنسا, ەل بەرەكەسى ەسەلەنە تۇسپەك.
"اۋىل – ەل بەسىگى" باعدارلاماسى اياسىندا ءۇش بىردەي جوبا جۇزەگە اسىرىلۋدا", دەيدى اۋىلدىق وكرۋگتىڭ اكىمى ازامات قايىرجان, – ءبىلىم وشاعىنا كۇردەلى جوندەۋ جۇمىستارى جۇرگىزىلىپ, ءوڭى كىرىپ قالدى. جاستار ورتالىعى سالىنىپ جاتىر, ەلدى مەكەندەردىڭ كوشەلەرى تاپ-تۇيناقتاي ەتىلىپ جوندەلىپ, وزگەشە كەيىپكە ەندى. وسىنىڭ بارلىعى مەملەكەت قامقورلىعى دەۋىمىز كەرەك. ءوڭى جاقسىلىق جاعىنان وزگەرگەن اۋىلعا جاستار دا كەلە باستادى. ەندى مەديتسينا قىزمەتكەرلەرى كەلەدى دەگەن ۇمىتتەمىز. اۋىلعا ات باسىن تۇرعان جاس ماماندارعا باسپانا دايىن.
بۇگىنگى تاڭدا 385 وتباسى ءتۇتىن تۇتەتىپ جاتقان باستاۋداعى ءبىلىم وشاعى ەكى تىلدە ءتالىمدى تاربيە, بەرىك ءبىلىم بەرۋدە. №1 ورتا مەكتەپتىڭ جانىنداعى سپورت زالى مەن بىرنەشە سىنىپتارعا كۇردەلى جوندەۋ جۇمىستارىن جۇرگىزىپ, جارقىراتىپ قويىپتى. ءىشى كىرسە-شىققىسىز.
"مەملەكەت تاراپىنان قولعا الىنعان باعدارلاما اۋىل ادامدارى ءۇشىن ءبىر عانيبەت قامقورلىق بولدى", دەيدى №1 ورتا مەكتەپتىڭ ديرەكتورى ايگۇل جۇرىمباەۆا, – بىلتىر بالالار, فۋتبول, حوككەي الاڭدارى سالىنعان بولاتىن. بيىل سالتانات زالى, مەكتەپ ءدالىزى جوندەۋدەن وتكىزىلدى.
مەملەكەتتىك باعدارلاما اياسىندا جالپى ۇزىندىعى التى شاقىرىمعا جۋىق اۋىل كوشەلەرىنە اسفالت توسەلۋدە. بۇل ماقساتقا بيۋدجەتتەن 140 ميلليون تەڭگە قاراجات قاراستىرىلىپتى. اۋىل تۇرعىنى قۋانحان بەكسەيىتوۆتىڭ ايتۋىنا قاراعاندا, ەل قامقورلىقتىڭ جىلۋىن سەزىنە باستاعان. وزدەرى دە ورتاق قازىناعا ۇلەس قوسۋعا ابدەن ىنتالى. بالالارىنىڭ ءبىلىم الاتىن ەكى مەكتەبىنىڭ دە جوندەۋدەن وتكىزىلۋى اتا-انالاردىڭ ريزاشىلىعىن تۋعىزىپ وتىر. ءبىر ايتا كەتەرلىگى, ەل مەرەيىن وسىرەتىن وسىنداي ىزگىلىكتى شارۋانىڭ باسى-قاسىندا جۇرگەندەردىڭ دەنى جاستار.
باستاۋداعى بەرەكە ەل-جۇرتتىڭ ەڭسەسىن كوتەرۋگە سەبەپشى. تۋعان جەردىڭ ءتۇتىنىنىڭ ءتۇزۋ ۇشۋى كىمگە بولسىن قۋانىش ەمەس پە؟!
اقمولا وبلىسى,
اتباسار اۋدانى.
