ايماقتار • 23 قىركۇيەك، 2020

تۇتاستىقتىڭ تۇعىر ءدىڭى

10 رەت كورسەتىلدى

ادام جانىن گۇلدەتەتىن قايىرىمدىلىق – شۋاقتى دا شىرايلى اسىل قاسيەت. ەلىمىزدە ءورىس العان قايىرىمدىلىق شاراسى اياسىندا وڭىردە سەگىزىنشى ادام باسپانالى بولىپ وتىر. انشەيىندە كوڭىل اۋدارا بەرمەگەنىمىزبەن، وسى ءبىر جاناشىرلىق ءىستىڭ اياسىندا كومەك قولىن سوزعان كوپشىلىكتىڭ بويىنداعى كىسىلىك پەن كىشىلىكتىڭ، اجارلى ازاماتتىقتىڭ مەيلىنشە مول ەكەندىگىن كورگەندە، باياندى بولاشاققا دەگەن ەل سەنىمى دە نىعايا تۇسەدى، دەپ حابارلايدى Egemen.kz.

"قارەكەت" قايىرىمدىلىق قورى تاياۋدا كوكشەتاۋلىق كوپبالالى وتباسىنا جىلى دا جارىق، جايلى پاتەردىڭ كىلتىن سىيلادى. جاڭا پاتەردىڭ جىلى بولعانى جانعا جايلى. ال، توڭىرەگىندەگى ادامداردىڭ جۇرەك جىلۋى ودان دا ىستىق. كوڭىلىڭدى دەمدەيدى ءارى قىسىلىپ-قىمتىرىلساڭ تايانىش بولار ەل-جۇرتىڭ بار ەكەنىن ەسكە سالادى. قالا تۇرعىنى ناۋرىزگۇل تۇرسىنوۆا كوپبالالى انا. وسىدان ەكى جىل بۇرىن تاعدىردىڭ جازۋىمەن جارىنان ايرىلىپ، قازاقتىڭ جالپاق تىلىمەن ايتقاندا، وتىز ومىرتقاسى وپىرىلىپ، قىرىق قابىرعاسى قاۋساپ قالعان بولاتىن. شيەتتەي ءتورت بالاسىن جەتەكتەپ قالانىڭ ءار بۇرىشىنان ارزانقولداۋ پاتەر ىزدەپ، تالاي ءۇيدىڭ تابالدىرىعىن توزدىردى. باسىڭا تارتقان كورپە اياعىڭا جەتپەگەن سوڭ كىسىگە كۇنىڭ تۇسەدى ەمەس پە؟ 

ىلكىدەگى جۇرت جەتىمى مەن جەسىرىن جىلاتپاعان. سان عاسىر بويى ەل بىرلىگىنە وزەك بولىپ كەلە جاتقان وسى ءبىر قايىرىمدىلىق قاعيدا ءالى دە بار. بار بولعاندا قانداي؟! قاراپايىم جۇرت ءوز اۋزىنان جىرىپ دەگەندەي، قايىرىمدىلىق قورىنا قولدان كەلگەنىنشە اقشا اۋدارىپ جاتىر. اقشا ەمەس، جان جىلۋىن توگىپ جاتىر. ىلكىمدى كومەكتىڭ ارقاسىندا بۇل جولى باسپانانىڭ تاقسىرەتىن تارتىپ كەلگەن كوپبالالى اناعا اۋماعى 43 شارشى مەتردى قۇرايتىن ەكى بولمەلى پاتەر سىيعا تارتىلدى. قولىنا باسپانا كىلتىن ۇستاعان ساتتە انانىڭ ءجۇزىن جاس جۋىپ كەتتى. قاتال تاعدىردىڭ قاتىگەزدىگىن كوپ كورگەن، جانى جۇدەگەن انانىڭ وسى ءبىر كوڭىل تولقىنىسى كوپ جايدى اڭعارتىپ تۇرعانداي. وكىنىشتىڭ جاسى ەمەس، حالقىنىڭ قامقورلىعىنا دەگەن قۋانىشتىڭ جاسىنداي.

–حالقىمنان اينالايىن، – دەيدى كوپبالالى انا ناۋرىزگۇل تۇرسىنوۆا، – ءبىر باسپاناعا قولىمىز جەتسە دەگەن ارمانىمىز ورىندالماستاي بولىپ ەدى. ءوز باسىم توزەر ەدىم عوي، بالالارىمنىڭ قۋانعانىن كورسەڭىز. اق نيەتىڭنەن اينالايىن، اق جۇرەكتى جۇرت!

ءسوز اراسىندا قوردىڭ ەلىمىزدە 288، ال، ءبىزدىڭ وبلىستا 8 پاتەر تابىستاپ وتىرعانىن ايتاتۇعىن بولساق، كوپكورىم تاماشا كورسەتكىش.

–قور وسىدان ءۇش جىل بۇرىن قۇرىلعان، – دەيدى قور وكىلى مەيىربەك نۇرماحان، – وسى باسپانانى الۋعا نەبارى 15 كۇن ۋاقىت جۇمسادىق. مەرەيلى ەلدىڭ مەيىرى مول عوي، الدىمەن وتباسىنىڭ جايىن بىلگەن بولاتىنبىز. ەندى مىنە، انا مەن بالا قۋانعان اقجارىلقاپ كۇن تۋدى.

قايىرىمى مول قوعامدا ونەگە دە از ەمەس قوي. باسپانالى بولعان اناعا ەرىكتىلەر توبىنىڭ ءبىر جىل بويى ۇزبەي كومەكتەسىپ، جوق-جىتىگىن بۇتىندەۋگە تىرىسىپ كەلگەندىگىن ايتا كەتسەك تە بولار. اتىن ايتقىسى كەلمەگەن جومارت جاندار پاتەر اقىسىن دا تولەپ بەرگەن. وسى ءبىر جايدىڭ ءوزى ەل ىشىندە ەشكىمنىڭ تاعدىردىڭ تالكەگىمەن جەكپە-جەك قالمايتىنىعىن كورسەتەدى ەمەس پە؟ ەرتەدەگى ەستى قاريالار "ەل ءىشى – التىن بەسىك"  دەپ تاۋبە ەتىپ وتىرۋشى ەدى. الاش جۇرتىنىڭ بويىندا ءدال وسىنداي جۇرەگىڭدى تەبىرەنتەر جاقسى ءداستۇر باردا، ماڭگىلىك ەلدىڭ ەتەك-جەڭى قىمتالىپ، ءبىرتۇرتاس بولا تۇسەدى. تۇتاستىقتىڭ تۇعىر ءدىڭى – قايىرىمدىلىق.

 

اقمولا وبلىسى

سوڭعى جاڭالىقتار

29 قازاندا سەنات وتىرىسى وتەدى

پارلامەنت • بۇگىن، 17:57

ەلورداعا قارجى قۇيۋعا نيەتتى

ەلوردا • بۇگىن، 16:50

29-31 قازان كۇندەرى كۇن جىلىنادى

اۋا رايى • بۇگىن، 12:40

ۇقساس جاڭالىقتار