ايماقتار • 23 قىركۇيەك، 2020

كوكشەتاۋدا رۇقسات ەتىلمەگەن قوقىس ۇيىندىلەرى كوبەيگەن

17 رەت كورسەتىلدى

تابيعاتى تامىلجىعان كوكشەتاۋ قالاسىنىڭ توڭىرەگىندە رۇقسات ەتىلمەگەن قوقىس ۇيىندىلەرى جىل وتكەن سايىن كوبەيىپ كەلەدى. ورماندى القاپتىڭ ىشىندە بەي-بەرەكەت شاشىلعان قوقىس ءسال عانا جەل تۇرسا بولدى، توڭىرەكتىڭ ءبارىن بىلعايدى، دەپ حابارلايدى Egemen.kz

قوقىستى وڭدەۋ مەن سۇرىپتاۋ كوڭىلدەگىدەي ەمەس. سوڭعى التى ايدىڭ ىشىندە 138 مىڭ توننا قوقىس جينالعان. سونىڭ نەبارى 3 پروتسەنتى عانا قايتا وڭدەلىپتى. قالعانى اياق استىندا بەي-بەرەكەت شاشىلىپ جاتىر.

وبلىس اۋماعىندا 130 تۇرمىستىق قاتتى قالدىقتار پوليگونىنىڭ زاڭداستىرىلعان جەر اكتىسى بار. ونىڭ تەك 20 پروتسەنتى عانا ەكولوگيالىق، سانيتارلىق تالاپتارعا ساي جۇمىس ىستەۋدە. دەمەك، قوقىس ورىندارىنىڭ كوپ ەكەندىگى كوزگە كورىنىپ تۇرعان جوق پا؟ ەڭ باستىسى، قالدىقتاردى جەكە سۇرىپتاۋ جانە قايتا وڭدەۋ جۇيەسىنىڭ  جولعا قويىلماۋىندا بولىپ وتىر، دەيدى وبلىستىق ەكولوگيا دەپارتامەنتى باسشىسىنىڭ ورىنباسارى ەرجان احمەتوۆ.

"عارىش ساپارى" عارىشتىق مونيتورينگتىڭ ناتيجەسىندە وبلىس كولەمىندە 1593 قوقىس ورنى انىقتالىپ وتىر. ونىڭ 854-ءى ەكولوگيا دەپارتامەنتىنىڭ جاندى جۇمىسىنىڭ ناتيجەسىندە جويىلعان. مامانداردىڭ ايتۋىنا قاراعاندا، قازىرگى كۇنى بارلىق تالاپتارعا ساي جۇمىس ىستەيتىن 26 عانا پوليگون بار ەكەن. وزگەلەرىنىڭ تالاپقا ساي كەلمەۋى، وڭىردەگى ەپيدەميالىق پروبلەمالاردى ۋشىقتىرۋى ابدەن مۇمكىن.

–بيىل قالا ىرگەسىندەگى كراسنويار اۋىلىندا قوقىس ۇيىندىلەرى بىرنەشە مارتە ورتەنىپ، ءبىرسىپىرا ماسەلە تۋعىزدى،–دەيدى كوكشەتاۋ قالاسى اكىمىنىڭ ورىنباسارى ەربول تولەۋوۆ،–بۇل سەلودا جۇمىس ىستەپ تۇرعان پوليگون "ەكو-Dump" كومپانياسىنىڭ مەنشىگى. جاڭا پوليگون سالىنعانشا، وسىنى قولدانامىز.

ەل ۇمىتتەنىپ وتىرعان جاڭا قوقىس زاۋىت قۇرىلىسىنىڭ قۇنى 6 ميلليارد 700 ميلليون تەڭگە. ازىرگە جوباسى عانا بار. بارلىق ەكولوگيالىق تالاپتارعا ساي كەلەتىن اتالمىش جوبا جۇزەگە اسقانشا، كراسنويار اۋىلىنداعى پوليگوننىڭ اۋماعى قاجەتتىلىگىنە وراي كەڭەيتىلە تۇسپەك. ەكولوگتار بولسا، قوقىس قالدىقتارىن سۇرىپتاپ، قايتا وڭدەۋ ەڭ دۇرىس شەشىم دەپ وتىر. ول ءۇشىن جالعىز وبلىس ورتالىعىندا عانا ەمەس، اۋدانداردا دا قايتا وڭدەۋگە بولاتىن قالدىقتاردى جيناقتاپ، ساتىپ الاتىن بولىمشەلەر كوبەيۋى ءتيىس. وسىلاي بولعاندا ارنايى قۇرىلىس سالعاننان ارزانعا تۇسەدى.

وڭىردە وسى ءبىر ماسەلەگە جەتكىلىكتى كوڭىل بولىنسە، كوكشەنىڭ كوركى باستاپقى پاك، تازا قالپىنا كەلىپ قالۋى ابدەن مۇمكىن.

كوكشەتاۋ قالاسى      

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار