ەكونوميكا • 23 قىركۇيەك، 2020

ەققدب قازاقستاندا قۇنى 30 ميلليون دوللارلىق باعدارلامانى ىسكە قوسادى

25 رەت كورسەتىلدى

جاسىل تەحنولوگيالىق شەشىمدەرگە ينۆەستيتسيا بولەتىن ءۇي شارۋاشىلىقتارى مەن جەكەمەنشىك سەكتور ءۇشىن گەندەرلىك باعدارلانعان جاسىل قارجىلاندىرۋدى قولداۋ ماقساتىندا ەۋروپا قايتا قۇرۋ جانە دامۋ بانكى (ەققدب) قازاقستاندا جالپى قۇنى 30 ميلليون اقش دوللارىن قۇرايتىن جاسىل ەكونوميكانى قارجىلاندىرۋ باعدارلاماسىن ىسكە قوستى، دەپ حابارلايدى Egemen.kz

KMF ميكروقارجى ۇيىمى شاعىن بيزنەستى نەسيەلەندىرۋدە 5 ميلليون اقش دوللارلىق نەسيەلىك جەلىنى العان العاشقى جەرگىلىكتى سەرىكتەس قارجى مەكەمەسى بولدى. شاعىن قالالار مەن شالعايداعى اۋىلدىق ەلدى-مەكەندەردى قوسا العاندا، بۇكىل ەل بويىنشا مىڭداعان ءۇي شارۋاشىلىقتارى، جەرگىلىكتى شاعىن جانە ورتا كاسىپورىندار (شوك) كليماتتىڭ وزگەرۋىنە بەيىمدەلۋگە كومەكتەسەتىن تەحنولوگيالىق شەشىمدەر مەن قىزمەتتەردى جۇزەگە اسىرۋ ءۇشىن شامامەن 1500 اقش دوللارى كولەمىندە نەسيە الا الادى. شەشىمدەر عيماراتتىڭ جىلۋ وقشاۋلاۋىن، فوتوەلەكترلىك كۇن پانەلدەرىن، گەوتەرميالىق جىلۋ سورعىلارىن، سۋدى ۇنەمدەيتىن سۋارۋ جۇيەلەرىن ورناتۋدى قامتيدى.

GEFF-قازاقستان سونىمەن قاتار ايەلدەر مەن ەرلەر ءۇشىن جاسىل تەحنولوگيالاردى قارجىلاندىرۋدىڭ تەڭ قولجەتىمدىلىگىنە ىقپال ەتەتىن گەندەرلىك باعدارلانعان جوبالاردى دا قولدايتىن بولادى.

قازاقستاندا قول جەتىمدى ستاندارتتى جاسىل تەحنولوگيالىق شەشىمدەردى تاڭداۋ كەزىندە كليەنتتەر جاسىل تەحنولوگيالار سەلەكتورى - باعدارلاماعا ەنگىزىلگەن قازاقستاندىق جانە شەتەلدىك تەحنولوگيالار مەن جابدىقتاردىڭ كاتالوگىن قولدانا الادى. ەۋروپالىق وداق (ەو) جاسىل تەحنولوگيالار سەلەكتورىن ازىرلەۋدى قارجىلاندىردى. جوبانىڭ ىسكە قوسىلۋىنا ارنالعان بۇگىنگى ءونلاينىس-شارا دونورلاردىڭ، جەرگىلىكتى بيلىك ورگاندارىنىڭ وكىلدەرىنىڭ، جەرگىلىكتى سەرىكتەستى قارجى مەكەمەلەرىنىڭ، كوممەرتسيالىق سەكتور ءۇشىن جاسىل تەحنولوگيالاردى جەتكىزۋشىلەر مەن وندىرۋشىلەردىڭ باسىن قوستى.

جاسىل تەحنولوگيالارعا ينۆەستيتسيالار بولەتىن كاسىپورىندار مەن مەنشىك يەلەرى جاھاندىق ەكولوگيالىق قوردان (جەق) وتەماقى (گرانت) الۋعا قۇقىلى بولادى. سونىمەن قاتار، اۆستريانىڭ فەدەرالدى قارجى مينيسترلىگى GEFF جەلىسى بويىنشا تەحنيكالىق كومەك كورسەتۋدى جانە جاسىل تەحنولوگيالار سەلەكتورىن قۇراستىرۋدى قارجىلاندىرادى.

KMF ءۇشىن نەسيە رەسۋرستارىن ۇسىنا وتىرىپ، ەققدب قازاقستاننىڭ كومىرتەكتى-بەيتاراپ ەكونوميكا قۇرۋعا ۇمتىلىسىنا ءوز ۇلەسىن قوسادى، ەكولوگيالىق شەشىمدەردى ىلگەرىلەتەدى جانە ايەلدەر مەن ەرلەر باسقاراتىن بيزنەسكە جۇگىنە وتىرىپ، كومىرتەگى شىعارىندىلارىنىڭ قارقىندىلىعىن جانە كليماتتىڭ وسالدىعىنا بايلانىستى تاۋەكەلدەردى تومەندەتۋدىڭ جاھاندىق پروتسەسىنە قاتىسادى.

بۇل باعدارلاما قازاقستانعا جىلدىق ەنەرگيا تۇتىنۋدى 150 000 گدج-عا جانە كومىرقىشقىل گازىنىڭ شىعارىلۋىن جىلىنا 40 000 ت CO2-عا قىسقارتۋعا كومەكتەسەدى دەپ كۇتىلۋدە.

GEFF جاسىل ەكونوميكاعا كوشۋ ءتاسىلى (جەك) شەڭبەرىندە كليمات جانە قورشاعان ورتا ءۇشىن جوبالاردى قارجىلاندىرۋدى كەڭەيتۋ جونىندەگى ەققدب-نىڭ جاقىندا جاريالانعان جوسپارىنىڭ بولىگى بولىپ تابىلادى، وعان سايكەس 2025 جىلعا دەيىن بانك گەندەرلىك ماسەلەلەرگە ەرەكشە نازار اۋدارا وتىرىپ، كليماتتىڭ وزگەرۋىنە قارسى كۇرەستى قارجىلاندىرۋعا ءوزىنىڭ جىلدىق ينۆەستيتسيالارىنىڭ 50 پايىزىنان استامىن سالۋعا ۇمتىلاتىن بولادى.

GEFF باعدارلاماسى 27 ەلدەگى 145-تەن استام قارجى ينستيتۋتتارىنىڭ جەلىسى ارقىلى جۇمىس ىستەيدى. بۇگىنگى كۇنى ەققدب-ءنىڭ باعدارلاماسى بويىنشا 190 مىڭ كليەنت ءۇشىن ينۆەستيتسيانىڭ جيناقتالعان كولەمى 4،6 ملرد. ەۋروعا جەتتى. جۇزەگە اسىرىلعان جوبالار جىلدىق CO2 شىعارىندىلارىن 8،6 ميلليون توننادان استامعا ازايتتى

ەققدب ءوز قىزمەتى كەزەڭىندە قازاقستان رەسپۋبليكاسىنىڭ ەكونوميكاسىندا جالپى ينۆەستيتسيا كولەمى 8،6 ميلليارد ەۆرو بولاتىن 276 جوبانى جۇزەگە اسىردى.

سوڭعى جاڭالىقتار

اتىراۋدا 9 بالانى يت تالادى

ايماقتار • 24 قازان، 2020

ۇقساس جاڭالىقتار